Bihain Bai i Gat Bel Isi na No Gat Pairap?
TAIM ol i askim ol turis bilong Briten ol i laikim wanem samting taim ol i go malolo long narapela kantri, long olgeta 4-pela 4-pela turis klostu 3-pela i tok: “Bel isi na wanpela hap i no gat pairap.” Planti pairap i wanpela bikpela hevi long olgeta hap bilong graun, olsem na planti man i ting bel isi tru na wanpela hap i no gat pairap, dispela samting em i wanpela driman nating.
Maski ol i mekim bikpela wok long daunim planti pairap ating yu tingting olsem: I stret long bilip olsem wok bilong ol bai kamap gutpela. Olsem wanem long ol narapela i no save tingting planti olsem yu?
Winim Ol Hevi
I hatwok tru long toktok wantaim ol man i gat narapela tingting, na i hatwok tu long helpim ol long save long tingting bilong yu. Taim ol lain yangpela i bung ausait long haus bilong Ron na pairap bikpela, Ron i kirap na prenim ol. Em i lain long nem bilong ol. Na em i stretim wilwil bilong wanpela. Kirap long dispela taim ol i no givim moa hevi long em.
Tingim Marjorie, em wanpela tasol i lukautim yangpela pikinini meri bilong em. Em i stap long wanpela flet na antap na aninit long flet bilong em i gat ol lain i save pairap bikpela. Famili i save slip long flet antap, ol i no gat mat long plua. Olsem na taim ol pikinini i raun long su i gat wil, o ol i tromoi bal long plua, o ol i kalap i go daun long bet, dispela ol pairap i save givim hevi long Marjorie. Na tu, mama bilong ol dispela pikinini i save raun insait long haus long su i pairap bikpela. Long gutpela pasin Marjorie i askim dispela mama long ol i no ken pairap tumas, tasol narapela i no save long tok ples bilong narapela, olsem na hevi i kamap. Kaunsil i tok ol bai salim wanpela man bilong tanim tok bilong helpim tupela long stretim hevi, olsem na Marjorie i wet bilong stretim dispela hevi.
Aninit long flet bilong Marjorie i gat wanpela man i save pilai musik long olgeta moningtaim kirap long 7 klok i go inap 8 klok, na dispela musik i pairap bikpela olgeta taim. Long gutpela pasin Marjorie i go lukim dispela man tasol em i tok, em i mas harim kain musik olsem bambai ‘em i ken amamas taim em i laik go long wok.’ Olsem wanem Marjorie i save karim ol dispela hevi?
Em i tok: “Mi wok long bosim skin na no ken les kwik. Mi bin senisim sedyul bilong mi, na maski i gat pairap mi save sindaun na ritim buk. I no longtaim na tingting bilong mi i stap tasol long buk. Em nau, mi no tingim tumas ol pairap.”
Tasol Heather i save sindaun long wanpela flet klostu long wanpela ples disko. Bihain long ol i mekim nabaut long nait, disko i save pinis long 6 klok moningtaim. Maski Heather i kamapim dispela hevi long kaunsil, ol i no mekim bikpela wok tumas bilong stretim hevi.
Pairap Bai Pinis?
Saveman Ross Coles bilong wanpela lain (Britain’s Medical Research Council’s Institute of Hearing Research), em i tok: ‘Planti manmeri i no stap isi sapos i no gat pairap liklik.’ Ol naispela krai bilong ol pisin, na gutpela pairap bilong si i bruk isi isi long nambis, na singaut bilong ol pikinini taim ol i amamas—ol dispela pairap na sampela moa i save amamasim yumi. Maski long nau yumi laik tru long lusim pairap, yumi amamas long bung wantaim ol gutpela pren i save toktok wantaim yumi. God i tok promis long givim bel isi na malolo long ol gutpela wokboi bilong em.
Long Baibel, man bilong raitim Song i tok: “Ol manmeri i daunim nem bilong ol yet, bai God i givim olgeta graun long ol.” (Song 37:11) Klostu nau Kingdom bilong God long heven bai kirap na pinisim wok nogut bilong ol man. (Daniel 2:44) Long dispela taim, aninit long wok king bilong Krais Jisas, “taim mun i lait yet, planti gutpela samting i ken kamap.”—Song 72:7; Aisaia 9:6, 7.
Yu ken bilip olsem God bai kamapim bel isi na malolo yumi olgeta i laik kisim, olsem profet bilong God, em Aisaia, em i tok profet long en: “Stretpela pasin bai i kamapim pasin bel isi na ol manmeri bai i no pret moa na bai ol i sanap strong oltaim. Na Bikpela i tok olsem, ol manmeri bilong em bai . . . ol i stap gut na malolo long ol ples bilong ol.”—Aisaia 32:17, 18.
Long nau tu, yu inap painim bel isi na malolo long ol samting bilong spirit long ol miting bilong ol Witnes Bilong Jehova long hap yu stap long en. Maski sampela taim planti tausen i save bung wantaim bilong lotu long ol bikpela kibung na long ol dispela kibung ‘ol man na meri na pikinini i save pairap,’ pairap bilong ol i no save skrapim bel bilong ol narapela, nogat; em gutpela pairap. (Maika 2:12, NW) Yu yet i ken save long dispela samting sapos yu bung wantaim ol Witnes long hap yu stap long en o sapos yu salim pas long ol long wanpela atres i stap long pes 5 bilong dispela nius. Yu ken amamas na stap isi tru taim yu bung wantaim ol long nau na ating inap oltaim.