Ol Botol i Kamap Naispela Bis
WANPELA MAN LONG NAIJIRIA I RAITIM DISPELA STORI BILONG KIRAP!
YU MEKIM hariap wanpela samting na nau han bilong yu i laik holim wanpela botol i sindaun long tebol, tasol yu no holim gut, em i pundaun long plua na bruk. Nau yu brumim ol brukpela glas na tromoi i go insait long dram pipia. Long tingting bilong yu, wok bilong dispela botol i pinis.
Tasol long ol man bilong Bida, long Naijiria, wok bilong dispela botol i no pinis. Bilong wanem mipela i tok olsem? Long wanem, long lain Nupe, em wanpela lain i sindaun long Bida, i gat sampela man i gat save long wokim ol naispela bis long ol brukpela botol. Em i wanpela wok papa i bin lainim pikinini bilong em long mekim olsem papa na tumbuna papa i bin lainim em long mekim. Na pasin bilong ol long wokim bis i no bin senis tumas.
Pasin Bilong Wokim Bis Long Bida
Woksop i wanpela liklik raunpela haus ol i wokim long graun malumalum. Namel long plua i gat wanpela kain aven ol i bin wokim long graun. Ol man bilong wokim bis i putim paiawut insait long aven na kirapim paia. Ol i gat sampela kain bek bilong pamim win i go insait long paia bilong mekim paia i go bikpela tru. Taim ol i tromoi sampela paiawut moa, paia i sut i kam antap long aven. Wanpela botol ol i bin pasim long stik, ol i hangamapim antap long aven na taim paia i hatim botol, kwiktaim botol i no strong moa, em i go malumalum.
Man bilong wokim ol rop bis bai wokim wanpela liklik bis pastaim na bihain em bai wokim narapela liklik bis, olsem olsem. Em i save holim wanpela stik i gat sap antap long paia arere long stik i gat botol i hangamap long en. Taim sap bilong stik i hat tru em i save putim dispela stik klostu long stik botol i hangamap long en. Nau pinga bilong em i tantanim stik i gat sap na em i kisim liklik hap glas long narapela stik na tanim i go inap long em i kisim mak bilong wanpela liklik bis.
Nau em i mekim wok long wanpela longpela naip bilong stretim glas na wokim stail bilong bis. Sapos em i gat bikpela save long mekim dispela wok, em bai mekim wok long glas i gat kain kain kala—em bai slipim wanpela kala antap long narapela kala, olsem na olgeta bis i gat kala kala. Bihain em i mekim wok long naip bilong rausim bis long stik—isi isi em i rausim bis na slipim long wanpela plet i gat sit bilong paia long en. Bis bai stap olsem inap long em i kol. Nau bis i redi pinis. Stik i bin wokim hul long bis taim bis i pas long en, em hul man bai mekim wok long en bilong pasim ol bis wantaim long rop. Nau i gat wanpela wok tasol em i mas mekim—wasim bis na pasim wantaim ol narapela bis bilong kamapim wanpela rop bis.
Lain Long Wokim
Olsem wanem wanpela man i save lain long wokim bis? Ol pikinini Nupe i lain taim ol i lukluk long man i wokim bis. Taim ol i kisim 10-pela krismas ol i helpim ol man long bungim na katim paiawut.
Nau ol i mas lain long mekim gutpela wok long samting bilong pamim win. Em tupela bek ol i wokim long laplap na wan wan bek i pas long stik. Bilong winim dispela kain bek, man i mas holim wanpela stik long wanpela han bilong em na narapela stik long narapela han bilong em, na kwiktaim em i mas mekim stik i go antap i kam daun i go antap i kam daun. Bilong mekim olsem skin bilong em i mas strong na olgeta hap bilong skin i mas wok gut wantaim. Skin i mas strong inap long em i ken winim bek i go i go inap long man i wokim pinis ol bis, na dispela wok i no pinis hariap—man bai wokim bis inap sampela aua!
Skin bilong man i mas wok gut inap long em i ken bihainim wankain pasin tasol long winim dispela kain bek. Sapos em i winim isi isi tumas, hat bilong paia i no inap mekim glas i go malumalum bilong man i ken mekim wok long en, na sapos em i winim hariap tumas, hat bilong paia inap mekim na glas bai lus long stik na pundaun insait long paia.
Wanpela man i lain olsem aprentis long wokim bis bai wokim bek bilong pamim win inap 5-pela yia. Bihain em bai lain long wokim bis. Em i mas lain long stap klostu long paia—em hatwok, long wanem, i gat hat bilong paia na hat bilong bikpela san tu.
Isi isi em i lain long dispela wok. Pastaim em i helpim man i gat save long wokim bis long holim tupela stik, na bihain em i skul long wokim ol liklik bis i no gat kala. Bihain moa em i lain long wokim ol bis i bikpela liklik na ol bis i gat kala kala. Ol man i gat save long dispela wok i mekim olsem i no hatwok tumas, tasol bikpela hap taim i mas lus pastaim na man i gat save long wokim wan wan bis i gat wankain bikpela na mak.
Ol man bilong wokim bis i amamas long wok bilong ol. Ol i amamas long lukim ol manmeri long olgeta hap bilong kantri i pasim bis bilong ol, em ol bis i gat kala kala. Pikinini i save pasim ol liklik bis, na ol meri i pasim bis i gat stail, na ol man i pasim ol bikpela bis bilong singsing. Na long taim bilong ol singsing ol man i save amamas, long wanem, ol i save kam long woksop na singsing na danis long pairap bilong bek.
Wanpela buk (History of West Africa) i tok: ‘Wok bilong ol Nupe long mekim wok long glas i nambawan long planti hap bilong Afrika.’ Na sampela man i wanbel long dispela tok. Wanpela misineri Kristen i tok: “Mipela baim bis long Bida na bis bilong sampela narapela hap bilong karim i go na givim long ol pren na wanblut bilong mipela taim mipela i bin go bek long ples na malolo. Taim mipela kamap long Amerika, long olgeta taim ol pren bilong mipela i laik kisim tasol ol bis bilong Bida!”
[Piksa long pes 26]
Hatim glas long aven