Mekim Moa Yet Wok Bilong Helpim Ol Narapela

LONG yia 1973 taim mi gat 22 krismas tasol, wanpela samting i bin kamap. Mi gat gutpela skin na mi save painim planti amamas. Mi save insait long kain kain spot na mi save laik long mekim kain kain wok. Taim mi gat malolo mi save go long nambis na subim wara. Mi save laik long draivim ka. Tasol wanpela taim mi belhat na dispela pasin i bagarapim olgeta gutpela amamas bilong mi.

Wanpela taim mi wantaim meri bilong mi Gema i bin go lukim sampela wanblut. Long dispela taim mipela lukim sampela manki i wokabaut i kam long rot na ol i rausim ol hap plang long banis bilong gaden bilong sampela haus. Taim ol dispela manki i lukim mipela, ol i tromoi ol dispela hap plang long gaden bilong wanblut bilong mipela na long veranda bilong haus, em ples mipela sanap long en. Wanpela hap plang i paitim Pipa, em liklik pikinini meri bilong mipela, em i gat 4-pela krismas tasol. Nau mi belhat tru na mi tromoi strong glas bilong dring long ol dispela raskol. Dispela haus mipela stap long en, em i antap tru inap olsem 3.7 mita. Olsem na taim mi tromoi dispela glas long ol raskol lek bilong mi i wel na mi pundaun long het bilong mi. Taim mi pundaun, sampela liklik bun insait long nek bilong mi i bagarap.

Klostu wanpela yia mi mas slip long bet long haus sik. Olsem na mi tingting planti long dispela hevi i bin painim mi. Man i slip klostu long mi long haus sik em i kilim i dai skin bilong em yet na bihain sampela moa i mekim olsem. Bikpela bel hevi i painim mi, olsem bel na tingting bilong mi i bagarap. Long wanem mi save nau mi givim bikpela wok long ol narapela, long wanem ol i mas lukautim mi, na mi save skin bilong mi i no inap orait gen. Yes, planti taim mi tingting long kilim i dai skin bilong mi yet. Wanpela taim mi askim meri bilong mi long kisim sampela strongpela marasin bilong dring na long dispela rot mi inap kilim i dai skin bilong mi. Tasol em i no harim tok bilong mi na em i tok, sapos mi mekim dispela pasin mi longlong. Long nau mitupela i amamas tru long em i no bin harim tok bilong mi taim mi laik kilim i dai skin bilong mi!

Sampela senis i kamap long i stap bilong mipela taim anti bilong Gema, em wanpela Witnes Bilong Jehova, i kirapim stadi long Baibel wantaim Gema. Gema i kisim gutpela tingting taim em i stadi, tasol mi no givim bel long lotu. Taim mi harim ol toktok bilong ol pris long televisen, dispela samting i mekim na mi les tru long lotu. Na tu, mi no man bilong kaunim kaunim ol buk. Tasol taim Gema i save toktok wantaim mi long dispela nupela bilip bilong em, tupela samting i kirapim bel bilong mi.

Namba wan samting em i helpim mi long save long en em olsem: Baibel na sampela stori bilong bipo i gat wankain tok. Dispela samting i kirapim mi tru, long wanem long skul mi save laikim tru ol stori bilong bipo. Namba tu samting i kirapim mi long tingim God, em stretpela pasin bilong em. Bipo mi ting i no gat rot bilong stretim ol samting nogut i save kamap. Tasol taim mi lain long laik bilong Jehova na long Kingdom bilong em, mi kisim save olsem stretpela pasin bai kamap tru long graun.​—Lo 32:4; Luk 18:​7, 8.

I Stap Bilong Mi i Gat As Bilong En

Kwiktaim mi wok long kisim save long Baibel. Nau i stap bilong mi i gat as bilong en, maski skin bilong mi i no gat strong na mi no inap wokabaut. I gat planti as na mi ken tok tenkyu long Jehova, tasol taim mi stadi long Baibel na kisim gut save, nau mi kisim tingting olsem mi inap mekim bikpela wok long dispela save bilong helpim ol narapela man.

Nau wanpela askim i kamap long tingting bilong mi. Olsem wanem mi ken kamap strong long ol samting bilong spirit? Mitupela Gema i baptais wantaim na bihain mi wok strong long stadi long Baibel. Sampela gutpela tisa bilong Baibel i save helpim mi long kamap strong long ol samting bilong spirit. Tasol bikpela samting i kamap long i stap bilong mi taim mi kaunim wanpela stori long wanpela Witnes Bilong Jehova long ples Lebanon. Dispela man i gat 46 krismas na em i bin slip long bet inap 18 yia olgeta, long wanem bagarap i bin painim em. Tasol maski em i gat dispela hevi, em i wanpela wasman bilong kongrigesen Kristen! Inap long taim mi kaunim dispela stori bilong em em i bin helpim 16 manmeri long dediketim laip bilong ol long Jehova na kisim baptais. Na tu em i save mekim 7-pela Baibel-stadi long olgeta mun. Taim mi kaunim dispela stori bilong em, olaman! Dispela i strongim mi tru.

Gavman i givim wanpela haus long mipela. I gat planti samting bilong helpim mi long raun gut insait long haus. Mi gat planti samting bilong helpim mi long skin. Lain bilong mitupela i bung wantaim na baim wanpela ka, em wilsia bilong mi inap i go insait long en. Dispela i helpim gut mitupela Gema na pikinini long i go long ol miting long Haus Kingdom bilong ol Witnes Bilong Jehova. Na mipela amamas long wanem ol brata insait long kongrigesen i tingim mipela na nau mipela i gat Buk-Stadi long haus bilong mipela yet.

Mi gat laik tru long go long haus bilong ol man na autim tok bilong Baibel. Ol brata sista insait long kongrigesen i helpim mi long inapim dispela laik, na ol i subim wilsia bilong mi i go long haus bilong ol man. Taim wanpela i mekim olsem mi inap toktok wantaim man bilong haus, tasol mi no inap opim Baibel na kamapim tok bilong en, long wanem han bilong mi i dai. Olsem na mi save kamapim ol tok bilong Baibel long tingting bilong mi na dispela brata o sista i bin subim wilsia bilong mi em i save opim Baibel bilong em na kaunim ol dispela tok. Bihain em i soim sampela buk o nius long man bilong haus, em mi yet mi bin tokaut long en.

Planti man i save kam lukim mi long haus, na long dispela rot mi inap skulim ol long tok bilong Baibel. Na nau mi lain pinis long holim pen long maus bilong mi na raitim pas. Dispela tupela samting i helpim mi long autim tok bilong God long olgeta taim. Insait long 3-pela yia nau mi bin mekim wok painia haptaim.

Wok Strong long Kamap Tisa Bilong Baibel

Bihain mi kamap wanpela wokman bilong kongrigesen. Tasol olsem wanem mi inap go antap long pletfom na lainim ol man? Taim mi kirap na stadi long Baibel mi bin lain long holim wanpela stik long tit bilong mi na long dispela stik mi save opim ol pes bilong Baibel. Em gutpela rot bilong opim ol pes bilong Baibel, tasol taim mi mekim, mi no inap toktok. Bihain liklik mi save long rot bilong winim dispela hevi​—mi mas mekim wok long tang bilong mi bilong opim ol pes bilong Baibel! Olsem na nau mi save mekim dispela samting.

Dispela narapela kain rot i helpim mi long mekim gut tok. Na taim mi insait long Skul Tiokratik na mekim ol tok, dispela tu i helpim mi long toktok gut. Long yia 1984 ol i makim mi long kamap wanpela elda insait long kongrigesen! Bel bilong mi i amamas tru long dispela samting.

Bihain mi gat wok long mekim wanpela pablik-tok, em inap olsem 45 minit, olsem na mi mas wok strong long redim gut. Dispela wok i mekim na skin bilong mi i les tru, long wanem mi no gat strong, tasol mi save strong long mekim dispela samting. Sampela taim mi save go long sampela kongrigesen i stap klostu na givim pablik-tok long ol. Insait long ol dispela kongrigesen ol pikinini i save kirap nogut tru long lukim mi i opim ol pes bilong Baibel long tang bilong mi. Na sampela taim ol i wok long bihainim dispela pasin bilong mi. Tasol ol i save les hariap, long wanem, man i mas mekim mekim planti taim bilong lain long dispela kain pasin.

Mi inap tingim yet dispela bikpela bel hevi bilong mi taim mi bin lusim haus sik. Mi save planti meri ol i bin lusim man bilong ol taim man i bin kisim wankain bagarap. Sapos meri bilong mi, Gema, i bin lusim mi olsem, mi no inap belhat long em, long wanem dispela wok bilong lukautim mi bai givim bikpela hevi long em. Tasol em i no bin mekim olsem. Em i save sori tru long mi na i stap gutpela poroman bilong mi, na pikinini meri bilong mitupela, em Pipa i save helpim mi tu. Tupela i helpim mi gut, na kongrigesen tu i helpim mi gut, olsem na mi inap mekim moa yet wok bilong helpim ol narapela man. (2 Korin 6:13)​—Em stori bilong Tony Wood.

[Ol Piksa long pes 27]

Em mi wantaim meri bilong mi Gema na pikinini meri bilong mi, Pipa

Mi save opim ol pes bilong Baibel long tang bilong mi