Animal Hai-ina​—Ol Man i Gat Tingting Kranki Long En

I no gat planti animal ol man i save toknogutim olsem ol i mekim long animal hai-ina (hyena). Na tru, dispela animal i no gat gutpela skin samting na bai ol man i ken laikim em. Ai bilong en i liklik, na het bilong en i go antap na baksait i go daun, na em i olsem skin dai. Na tu em i save lap lap nating olsem longlong man. Yumi tingim ol dispela samting bilong dispela animal na skin bilong yumi i guria!

Planti man i gat tingting kranki long dispela animal, olsem na ol i toknogutim em. Orait, nau yumi ken stretim sampela bilong ol dispela tingting kranki. Wanpela tingting kranki bilong ol em olsem: Ol i ting dispela animal em i wanpela kain wel dok. Tasol nogat. Long skin tasol em i olsem dok.

Planti man i ting hai-ina i save pret. Tasol sapos dispela animal i save pret, orait bai em i no inap ranim gut ol animal na kilim ol i dai bilong kaikai, a? Tasol tru ol hai-ina i save painim abus olsem? Tru tumas! Ol i no save kaikai tasol abus ol narapela animal i bin kilim i dai. Sol bilong hai-ina i strong tru na em i gat strongpela maus, winim olgeta narapela animal bilong Afrika em ol i save kaikai abus, olsem na em inap tru long kilim i dai abus bilong kaikai. Em inap ranim na kilim i dai ol traipela animal tu, olsem bikbel.

Wanpela man bilong raitim buk, em Chris McBride, em i wok long lain na kisim save long ol animal long Afrika em ol i save kaikai abus. Planti taim em i bin lukim ol hai-ina i rausim ol laion meri i wok long kaikai abus ol laion yet i bin kilim. Sapos i gat planti hai-ina liklik, laion man inap pait wantaim ol na sakim ol, tasol ol laion meri nogat. Olsem na sapos ol hai-ina i animal bilong pret, yu ting ol i laik pait wantaim strongpela birua olsem wanpela laion man? Nogat, a?

Bilong Wanem Em i Save Lap?

Sapos yu harim lap bilong hai-ina, ating bai i no gutpela long yau bilong yu. Tasol em rot bilong en bilong singaut long ol wanlain bilong en. Profesa G. Mills i tok: “Ol hai-ina i gat makmak long skin, olgeta wan wan i gat lap bilong en yet na ol wanlain bilong en i save long en.” Long dispela rot, ol inap singautim ol wanlain bilong ol, maski ol i stap nabaut longwe long ol, na ol i ken i kam bung bilong sakim birua i kam insait long hap bilong ol, o bilong raun wantaim na painim abus. Taim ol i kilim pinis wanpela animal bilong kaikai o ol i painim pinis skin bilong wanpela animal i dai pinis na i sting, ol i save amamas tru na ol i lap planti na lap i go antap.

Tasol i no olgeta hai-ina i save mekim dispela kain krai olsem lap. I gat wanpela kain hai-ina bilong hap bilong saut long Afrika i braunpela na i no bikpela olsem ol dispela planti hai-ina i gat makmak. Dispela kain hai-ina i no save bung wantaim ol wanlain na raun. Em i kisim save long ol narapela hai-ina long rot bilong smelim samting.

Long wanpela hap insait long as bilong en, em i save kamapim wanpela samting kain olsem pekpek i gat narapela kain smel bilong en, na bilong olgeta wan wan hai-ina, smel bilong dispela samting i narapela narapela kain. Em i save pekpekim dispela samting long stik bilong kunai na long ol liklik diwai na long ol ston samting, na taim narapela hai-ina i smelim dispela kain pekpek, em inap save em pekpek bilong hai-ina man o hai-ina meri, na em i wanlain bilong en o nogat.

Olsem wanem? Yu no save laikim ol hai-ina? Tru, yumi no laik holim ol na skin samting bilong ol i no gutpela long ai bilong yumi, tasol ating yumi pilim narapela samting bilong ol, olsem bikpela strong bilong ol o smat bilong ol. Olsem na i gat planti samting bilong animal hai-ina em yumi pilim na kirap nogut long en.