Pe ja jasa mas tʼilan oj bʼobʼ stsaʼ jun kristyano, jani yajelyi ja sakʼanil ja Jyoba sok kʼotel parte ja bʼa spamilya. Ja yuj, ja Jyoba wani skʼana ke spetsanil ja kristyanoʼik oj stsaʼe ja jawi. ¿Jas yuj? Wani skʼana oj yabʼye stsamalil ja yamigoʼajel sok ajyel sakʼan bʼa tolabida (Deut. 30:​19, 20; Gál. 6:​7, 8). Ja Jyoba mi maʼ wa skʼulan obligar bʼa oj yaʼteltay, wani xyaʼakan ke kada jujune a-stsaʼ ja jasa oj skʼuluki. Pe ¿jasa wa x-ekʼ ta jun yaʼtijum Dyos bʼa yiʼunejxa jaʼ wa xkoʼ bʼa jun chaʼan mulal? Ta mi sutxi skʼujol, tʼilani oj eluk ja bʼa kongregasyon (1 Cor. 5:13). Ama jachuk, ja Jyoba wani skʼana sok spetsanil skʼujol ke akumxuk soka yeʼn. Jun rason jel tʼilan yuja yaʼa ja koltanel jani bʼa oj ya perdon ja matik sutxel skʼujole yuja smuleʼi. Ja kala Dyostiki jelni xyajtani bʼa wa skoltay ja matik staʼuneje smul sok wa stsatsankʼujolan bʼa oj sutxuk skʼujole (Zac. 1:3; Rom. 2:4; Sant. 4:8). w24.08 14 par. 1, 2

Yajni ja jekabʼanum Pablo stsʼijbʼan ja yoxil skarta, jujuntik wane spukjel sjejelik mi meranuk sok wane pilwanel. Pe ja tuki «me xyaʼawekan ajyel ja bʼa sbʼejlalil ja smeranili». Wani skʼuʼaneyi ja Jyoba sok me xyawekan ‹yijel ja sakʼanile jastalni wa xyala ja bʼa smandariki› (2 Juan 4, 6). Ja tojik snochumanik Kristo it mini kechan yawe gustoʼaxuk ja Juan, cha jachni ja Jyoba (Prov. 27:11). ¿Jasa wa xnebʼatik? Ja ajyel toj wani xya gustoʼaxukotik (1 Juan 5:3). Jun sjejel, jelni xya gustoʼaxukotik snajel ke wa xkatik gustoʼaxuk ja Jyoba. Ja yeʼn wa xgustoʼaxi ja yajni mi xkisatik ja kʼankʼunelik ja bʼa luʼumkʼinali sok wa xkʼulantik aseptar ja smeranil. Cha wani xgustoʼaxiye tuk yaʼtijumik ja bʼa satkʼinali (Luc. 15:10). Sok wani la gustoʼaxitik yajni ja tuk snochumanik Kristo wa x-ajyiye toj (2 Tes. 1:4). Anto, yajni xchʼaysnajel ja luʼumkʼinal yamanyuj ja Satanás, ojni ajyukujtik ja gustoʼil snajel ke toj ajyelotik soka Jyoba. w24.11 12 par. 17, 18

¿Bʼa janekʼ tyempo oja kʼel lek bʼajtanto oja walyabʼ ja jastal waxa wabʼ bʼa yeʼna? Ta jel wego awalyabʼi, bʼobʼta oj spensaraʼuk ke mi xbʼobʼa komabʼaj (Prov. 29:20). Pe ta ja yeʼn kʼot ya sbʼaj kuenta ja jastal aya xa wabʼi sok mixa walyabʼ wego, bʼobʼta oj spensaraʼuk ke jela wokolani stsajel (Ecl. 11:4). Ajuluka kʼujol ke yajni ay maʼ oja walyabʼ ja jastal aya xa wabʼi mi yajnaluk seguroxa aya bʼa ojxa nupansok. Kechan ajyan seguro ke chapanaxa bʼa oj nupanan sok yeʼnani oj kʼotuk ja machun mas lek bʼa weʼna. ¿Jaxa ta waʼabʼaj kuenta ke ay maʼ wa skʼana oj snaʼ bʼaj? ¿Jas oja kʼuluk? Ta mi junxta waxa wabʼ jastal yeʼna, leʼa modo oja jeyi jaman lek ke miyuk soka bʼa jas waxa kʼulani. Mini jun lekil modoʼal yajelkan ke oj skʼul sbʼaj ilusionar yajni mi meranuki (Efes. 4:25). w24.05 23 par. 9, 10