Ko e fili mahuʻinga taha ʻe lava ke fai ʻe ha taha ko e fili ke fakatapui kia Sihova pea hoko ko e konga Hono fāmili ʻo e kau lotú. Ko e finangalo ia ʻo Sihová ke fai pehē ʻa e tokotaha kotoa. Ko e hā hono ʻuhingá? ʻOkú ne loto ke nau kaumeʻa mo ia pea moʻui taʻengata. (Teu. 30:​19, 20; Kal. 6:​7, 8) Kae kehe, ʻoku ʻikai ke fakamālohiʻi ʻe Sihova ha taha ke tauhi kiate ia. ʻOkú ne fakaʻatā ʻa e tokotaha taki taha ke fili ʻa e meʻa te ne faí. Kae fēfē kapau ʻoku maumauʻi ʻe ha Kalisitiane ʻosi papitaiso ʻa e lao ʻa e ʻOtuá, ʻo fai ha angahala mamafa? Kapau ʻoku ʻikai ke ne fakatomala, kuo pau ke fakamavaheʻi ia mei he fakatahaʻangá. (1 Kol. 5:13) Neongo ia, ʻoku ʻamanaki loto-moʻoni ʻa Sihova ʻe toe foki kiate Ia ʻa e tokotaha faihalá. Ko hono moʻoní, ko e taha ia ʻo e ʻuhinga mahuʻinga naʻá ne tokonaki mai ai ʻa e huhuʻí—ke malava ʻo fakamolemoleʻi ʻa e kau faiangahala fakatomalá. Ko hotau ʻOtua anga-ʻofá ʻokú ne kōlenga loto-māfana ki he kau faihalá, ʻo fakalototoʻaʻi ke nau fakatomala.—Sāk. 1:3; Loma 2:4; Sēm. 4:8. w24.08 14 ¶1-2

ʻI he taimi naʻe fai ai ʻe Sione ʻene tohi hono tolú, ko e niʻihi tāutaha naʻa nau fakamafola holo ha ngaahi akonaki loi pea fakatupunga ha ngaahi māvahevahe. Kae kehe, ko e niʻihi naʻe hokohoko atu ʻenau “ʻaʻeva . . . ʻi he moʻoní.” Naʻa nau talangofua kia Sihova pea naʻa nau “ʻaʻeva ai pē ʻo fakatatau ki heʻene ngaahi fekaú.” (2 Sio. 4, 6) Ko e kau Kalisitiane faitōnunga ko ení naʻe ʻikai ngata pē ʻi heʻenau ʻai ke fiefia ʻa Sioné ka naʻe toe fiefia foki ai mo Sihova tonu. (Pal. 27:11) Ko e hā ʻa e lēsoni kiate kitautolú? Ko e faitōnungá ʻoku taki atu ki he fiefia. (1 Sio. 5:3) Ko e fakatātaá, ʻoku tau maʻu ʻa e fiefia ʻi hono ʻiloʻi ʻoku tau ʻai ʻa Sihova ke fiefia. ʻOkú ne fiefia ke sio ʻoku tau talitekeʻi ʻa e ngaahi fakatauele ʻa e māmaní pea tali ʻa e moʻoní. ʻOku toe fiefia foki mo e niʻihi kehe ʻi hēvani. (Luke 15:10) ʻOku lava foki ke tau maʻu ʻa e fiefia ʻi he sio ki he nofoʻaki faitōnunga ʻa e niʻihi kehé. (2 Tes. 1:4) Pea ʻi he taimi ʻe mole atu ai ʻa e fokotuʻutuʻu ko ení, te tau maʻu ʻa e fiemālie ʻi hono ʻiloʻi naʻa tau fakahāhā ʻetau mateaki kia Sihová naʻa mo e ʻi ha māmani naʻe puleʻi ʻe Sētane. w24.11 12 ¶17-18

Ko e hā hono fuoloa ʻoku totonu ke ke siofi ai ʻa e tokotahá ki muʻa ke ke fakahaaʻi ange hoʻo tokanga fakaemanakó? Kapau ʻe fuʻu vave hoʻo fakaofiofi ki ha taha, te ne pehē nai ʻokú ke loto-ʻoho. (Pal. 29:20) ʻI he tafaʻaki ʻe tahá, kapau ʻe fuʻu fuoloa hoʻo tatalí, te ne pehē nai ʻokú ke lotolotoua, tautefito kapau ko e tokotaha ʻe tahá kuó ne ʻosi ʻiloʻi ʻokú ke tokanga ange. (Tml. 11:4) Manatuʻi, ki muʻa ke ke fakaofiofi ki ha taha, ʻoku ʻikai fiemaʻu ia ke ke tuipau te ke mali mo e tokotaha ko iá. Ka ʻoku totonu ke ke tuipau ʻokú ke mateuteu ki he nofo malí pea ko e tokotaha ʻe tahá ʻe lava ke ne hoko ko ha hoa feʻungamālie kiate koe. Kae fēfē kapau ʻokú ke ongoʻi ʻoku tokanga atu ha taha kiate koe? Kapau ʻoku ʻikai ke ke tokanga koe kiate ia, feinga ke ʻai ia ke hā mahino ʻi hoʻo tōʻongá. Ko ha taʻeʻofa ia ke ʻai ʻa e tokotahá ke ne fakakaukau ʻoku ʻi ai ha faingamālie ke mo kaumeʻa ka ʻoku ʻikai ko e tuʻungá ia.—ʻEf. 4:25. w24.05 22-23 ¶9-10