Modimo o Tlhokomela Jang Ba ba Sa Kgoneng go Utlwa?

Gompieno mo lefatsheng lotlhe go na le batho ba ba ka nnang dimilione di le 70 ba ba sa kgoneng go utlwa, mme bontsi jwa bone ba buisana ba dirisa nngwe ya dipuo tsa diatla di feta 200. Se se utlwisang botlhoko ke gore, batho ba le bantsi ga ba tshware batho bano sentle, fela jaaka dintlha tse di latelang di bontsha:

• “Mo lefatsheng lotlhe ditshwanelo tsa batho ba ba sa kgoneng go utlwa gotlhelele le tsa ba ba sa kgoneng go utlwa sentle, gantsi di a gatakwa.”—National Association of the Deaf (U.S.).

• “Batho ba ba sa kgoneng go utlwa, ba ba nnang kwa dinageng tse di sa ntseng di tlhabologa ke bangwe ba batho ba ba humanegileng fela thata mme ga ba kgone go bona thuto, tiro le tshedimosetso e ba e tlhokang.”—World Federation of the Deaf.

Modimo o ikutlwa jang ka batho ba ba sa kgoneng go utlwa? Baebele e a reng ka bone? Mme Basupi ba ga Jehofa ba ba thusa jang gompieno?

Tsela e Modimo a Lebang Ba ba Sa Kgoneng go Utlwa ka Yone

Baebele e a re Jehofaa Modimo o amega ka batho ba ba sa kgoneng go utlwa. O batla gore ba tshwarwe sentle le gore ba solegelwe molemo ke thuto e a e neelang batho.

Temana: “Ga o a tshwanela go tlhapatsa motho yo o susu.”—Lefitiko 19:14.

Temana: “Modimo ga a na tlhaolele.”—Ditiro 10:34.

Temana: “Jesu o ne a tswa letsholo . . . , a rera dikgang tse di molemo tsa Bogosi.”—Mathaio 9:35.

Temana: Jesu o ile a dira gore “bosusu ba utlwe le ba ba sa kgoneng go bua ba bue.”—Mareko 7:37.

Temana: “Ditsebe tsa bosusu di tla thibololwa.”—Isaia 35:5.

Se e se kayang: Jehofa o ile a bolelela pele gore batho ba ba sa kgoneng go utlwa ba tla utlwa.—Isaia 29:18.

Kafa Basupi ba ga Jehofa ba Thusang Batho Ba ba Sa Kgoneng go Utlwa ka Gone

Basupi ba ga Jehofa ba rera molaetsa wa Modimo mo lefatsheng lotlhe, ba o rerela le batho ba ba sa kgoneng go utlwa. Re dira eng gore re kgone go ba rerela? Re gatisa Dibaebele le dibidio tsa go ithuta Baebele ka dipuo tsa diatla di feta 100. Re ithuta Baebele le batho ka puo ya diatla, gape re rulaganya gore go nne le dipokano tsa Bokeresete ka puo eo. Re dira seno sotlhe re sa duedise ope fela yo o batlang go itse Modimo. Goreng? Ka gonne Jesu o ile a re: “Lo ne lwa amogela mahala, nayang mahala.”—Mathaio 10:8.

O ka kgona go bona dikgatiso tseno kgotsa wa di downlouda mo Internet mo:

JW.ORG. Tobetsa karolo e e kwa godimo e e bontshang puo mo websaeteng, go bona tshedimosetso ka puo ya diatla e o e batlang.

App ya JW Library. Tsenya app eno ya mahala mo sedirisiweng sa gago mme o tla kgona go downlouda kgotsa go lebelela dibidio ka dipuo tsa diatla di feta 100.

Ke Didirisiwa Dife Tsa go Ithuta Baebele Tse re Nang le Tsone?

Baebele ka puo ya diatla. Baebele ya ntlha e e ileng ya ranolwa e feletse mo lefatsheng lotlhe, ke Baebele ya Thanolo ya Lefatshe le Lesha ya Dikwalo Tse di Boitshepo ka Puo ya Diatla ya America. Gone jaanong Baebele e teng e feletse kgotsa e sa felela ka dipuo di le dintsi tsa diatla. Mme ngwaga le ngwaga go tsenngwa dipuo tse dingwe. (Fa o batla go bona dipuo tse di leng gone kgotsa o batla go lebelela Baebele mo Internet, bona lebokoso le le reng “Baebele ya Thanolo ya Lefatshe le Lesha ka Puo ya Diatla.”)

• Go bona gore ke eng se re se dirang gore re kgone go nna le Baebele ka puo ya diatla, bona bidio e e reng, The Complete New World Translation Is Available in ASL.

• Gore o kgone go itumelela go bala Baebele sentle, tsenya app ya JW Library. App eno e go thusa gore o kgone go tlhopha temana e e rileng mo Baebeleng ya puo ya diatla.

• Dmytro le Vita ga ba kgone go utlwa mme bana ba bone ba kgona go utlwa. Bona gore lelapa la bone le thusitswe jang ke go lebelela Baebele ka puo ya diatla letsatsi le letsatsi.

Dibidio tse di thusang batho go ithuta Baebele. Basupi ba ga Jehofa ba dirile dibidio tsa dipuo tsa diatla tse di thusang batho go tlhaloganya le go dirisa kgakololo ya Baebele e e amang . . .

• Banyalani le malapa

• Basha

• Bana

Go ithuta Baebele le mongwe. Ithute Baebele le mongwe ka puo ya diatla ka selekanyo se o ka se kgonang. Kopa go bontshiwa gore thuto eno ya mahala ya Baebele e tshwarwa jang.

Jeson Senajonon o nna kwa Philippines. Bona gore thulaganyo ya rona ya go ithuta Baebele e mo thusitse jang go nna tsala ya Modimo.

Mario Antúnez e ne e le moruti mo kerekeng nngwe kwa Honduras. Bona gore o ile a bona jang dikarabo tsa dipotso tse a neng a na le tsone ka Baebele mo setlhogong se se reng, “Ke ne Ke na Le Dipotso di le Dintsi.”

Dipokano le dikokoano. Re na le diphuthego le ditlhopha tsa dipuo tsa diatla mo lefatsheng lotlhe, kwa batho ba ba sa kgoneng go utlwa ba kopanang gone beke le beke go ithuta le go obamela Modimo. Gape ngwaga le ngwaga re rulaganya dikokoano tse dikgolo tsa go ithuta Baebele ka puo ya diatla. Kwa dipokanong le kwa dikokoanong tsa rona, batho ba ba sa kgoneng go utlwa e bile ba sa kgone go bona ba ranolelwa puo ya diatla e e ranolwang ka gore motho a tshware diatla tsa yo mongwe gore a kgone go tlhaloganya se se buiwang. Gape re dira dikgatiso tsa mokwalo wa difofu mahala.

• Batla phuthego e e gaufi le wena.

• Bona tshedimosetso ka dikopano tsa rona tse dikgolo le tse dinnye, tse di tshwarwang ngwaga le ngwaga.

• Nna gone kwa Segopotsong sa loso lwa ga Jesu, e leng tiragalo e e botlhokwa thata e re e tshwarang ngwaga le ngwaga.

José Luis Ayala o nna kwa Mexico. O tshotswe a sa kgone go utlwa mme moragonyana o ne a foufala. Bona gore o thusitswe jang gore e nne morutisi wa Baebele yo o nang le bokgoni.