BASHA BA BOTSA JAANA
Nka Dira Eng fa Ke sa Ikobela Nngwe ya Melao ya Batsadi ba me?
Bontsi jwa malapa a na le melao, ka sekai, gore o boa nako mang mo lapeng, o dirisa sediriswa sa gago sa ileketeroniki ka nako e e kae, le gore o tshwara batho ba bangwe jang.
O ka dira eng fa o robile nngwe ya melao eo? O ka se fetole se se diragetseng, le fa go ntse jalo o ka dira sengwe se se tla go thusang gore maemo a seka a nna maswe le go feta. Setlhogo seno se tla go thusa gore o ka dira seno jang.
Ke eng se ke sa tshwanelang go se dira?
Fa batsadi ba gago ba sa itse gore o robile nngwe ya melao, o ka raelesega go fitlha phoso e o e dirileng.
Fa ba itse gore o robile nngwe ya melao, o ka raelesega go dira seipato kgotsa wa pega motho yo mongwe molato.
Ga go epe ya dilo tseno e e siameng. Goreng? Ka gonne go fitlha se o se dirileng kgotsa go ntsha diipato tse di sa utlwaleng tsa se o se dirileng ke bongwana. Se se bontsha batsadi ba gago gore o sa ntse o tlhoka go gola.
“Ga go a siama go bua maaka. Kwa bofelong, batsadi ba gago ba tla itse nnete, mme kotlhao ya bone e tlile go nna botlhoko go gaisa fa o kabo o buile nnete go tswa kwa tshimologong.”—Diana.
Tsela e e botoka ya go dira dilo
Amogela phoso e o e dirileng. Baebele e a re: “Motho yo o fitlhang maleo a gagwe ga a kitla a atlega, Mme yo o ipolelang maleo a gagwe a bo a a tlogela o tla utlwelwa botlhoko.” (Diane 28:13) Batsadi ba gago ba a itse gore o a tle o dire diphoso. Potso ke gore, a mme gone o tla bua nnete?
“Batsadi ba gago ba tla go itshwarela fa o ka bua nnete. Fa o le motho yo o buang nnete batsadi ba gago ba tla go tshepa fela thata.”—Olivia.
Kopa maitshwarelo. Baebele e a re: “lo nne boikokobetso.” (1 Petere 5:5) Kopa maitshwarelo go tswa pelong mme o seka wa dira diipato ka se o se dirileng.
“Fa motho a nna a dira diipato ka se a se dirileng, o feleletsa a sa tlhole a bona go le molato fa a dira diphoso. Fa nako e ntse e tsamaya dilo tse di phoso tse a di dirang di ka se tlhole di mo tshwenya.”—Heather.
Amogela ditlamorago. Baebele e a re: “Reetsang kotlhao.” (Diane 8:33) O se ka wa ngongorega, amogela dithibelo tse batsadi ba gago ba go beelang tsone.
“Go ngongorega ka kotlhao e o e newang go tlile go dira dilo thata le go feta. Batla tsela ya go amogela dithibelo go na le gore o tlhome mogopolo mo go se se go latlhegetseng.”—Jason.
Dira gore ba go tshepe gape. Baebele e a re: “lo apole botho jwa lona jwa bogologolo jo bo tsamaisanang le tsela e lo kileng lwa bo lo itshwara ka yone pele.” (Baefeso 4:22) Tswelela o dira ditshwetso tse di molemo gore batsadi ba gago ba kgone go go tshepa gape.
“Fa o tswelela o dira ditshwetso tse di molemo, mme o bontsha batsadi ba gago gore o ka se boeletse phoso e o neng o e dirile ba tla go tshepa gape.”—Karen.
KAKANTSHO: Dira go feta ka fa ba go kopileng ka gone, go bontsha gore ba ka kgona go go tshepa gape. Ka sekai, fa o ile golo gongwe, leletsa batsadi ba gago o ba bolelele gore o mo tseleng ya go tla gae. Le fa go ise go fete nako e le dumalaneng ka yone ya go fitlha mo lapeng, se se tla dira gore ba bone gore o batla ba go tshepe gape.