Ke Ititeile Sehuba go Direla Jehofa

KA 1991, nna le mosadi wa me e bong Satta, re ne ra tshaba gore re se ka ra bolawa fa masole a batsuolodi a ne a tlhasela le go gapa motse wa ga rona wa Koindu, Sierra Leone. Mo dingwageng tse robedi tse di neng tsa latela, re ne ra nna mo dikampeng tse dintsi tse di farologaneng tsa batshabi. Mo go tsone, re ile ra lebana le go tlhaela ga dijo le malwetse mme re ne re dikologilwe ke batho ba ba dirang boitsholo jo bo sa siamang ba re neng re nna le bone mo dikampeng.

Mo kampeng nngwe le nngwe, re ne re kopa setsha sa go aga Holo ya Bogosi mo balaoding. Ka dinako tse dingwe re ne re se fiwa, mme ka dinako tse dingwe re ne re sa se fiwe. Le fa go ntse jalo, ka metlha re ne re rulaganya gore re nne le lefelo le re ka kopanang mo go lone go obamela. Re ne re ititeile sehuba go direla Jehofa. Kgabagare re ne ra aga Diholo Tsa Bogosi di le nnè mo dikampeng.

Fa ntwa e sena go fela, ga re a ka ra kgona go boela gae. Koindu e ne e fetogile matlotla ka ntlha ya ntwa e e tsereng dingwagangwaga. Ka jalo, re ne ra romelwa kwa kampeng e nngwe gape ya batshabi gaufi le Bo. Mme koo re ne ra aga Holo ya Bogosi ya botlhano ka madi a a neng a tswa kwa ofising ya lekala.