Tumelo—E a Re Nonotsha

TUMELO e re naya maatla. Ka sekai Satane o leka go senya kamano ya rona le Jehofa, mme tumelo e re thusa “go tima dibetsa tsotlhe tse di konopiwang tse di fisang tsa yo o boikepo.” (Baef. 6:16) Gape tumelo e re thusa gore re kgone go itshokela mathata. Jesu o ne a raya barutwa ba gagwe a re: “Fa lo na le tumelo ya bogolo jwa tlhaka ya mosetara, lo tla raya thaba eno lo re, ‘Fuduga fano o ye fale,’ mme e tla fuduga.” (Math. 17:20) E re ka tumelo e re thusa go nna le kamano e e nonofileng le Jehofa, mma re tlotle ka dipotso tseno: Tumelo ke eng? Ke eng se se ka re thusang go nna le tumelo? Re ka nonotsha tumelo ya rona jang? Mme re tshwanetse go dumela mo go mang?—Bar. 4:3.

TUMELO KE ENG?

Go nna le tumelo ga go reye fela go dumela se Baebele e se rutang ka gonne tota le “madimona a a dumela [gore Modimo o teng] mme a rorome.” (Jak. 2:19) Ka jalo, tumelo ke eng?

Baebele ya re tumelo e na le dikarolo tse pedi. Sa ntlha, “Tumelo ke go lebelela ka tlhomamisego dilo tse di solofetsweng.” (Baheb. 11:1a) Fa o na le tumelo, o dumela sengwe le sengwe se Jehofa a se solofetsang e bile o a itse gore o tla se diragatsa. Ka sekai Jehofa o ne a raya Baiseraele a re: “Fa lo ka senya kgolagano ya me ya motshegare le kgolagano ya me ya bosigo, gore motshegare le bosigo di se ka tsa tla mo nakong ya tsone, ka tsela e e tshwanang kgolagano ya me le Dafide motlhanka wa me e ka tlolwa.” (Jer. 33:20, 21) A o kile wa tsamaya wa akanya gore gongwe nako nngwe letsatsi ga le kitla le tlhaba kgotsa le phirima? O a itse gore seo se ka se direge. Jaanong fa e le gore o dumela gore letsatsi le tla nna le ntse le le teng, a o ka belaela gore Modimo, ene yo o dirileng letsatsi a ka palelwa ke go dira se a se solofeditseng?—Isa. 55:10, 11; Math. 5:18.

Sa bobedi, tumelo ke“pontsho e e bonalang sentle ya dilo tsa mmatota le fa di sa bonwe.” (Baheb. 11:1b) Re raya jang? Ka sekai a re re ngwana o go botsa gore, ‘o itse jang gore phefo e teng?’ Le fa gone o sa kgone go bona phefo, o ka mmolelela gore re kgona go e utlwa e foka e bile re kgona go bona fa ditlhare di tshikinyega, jalo le jalo. Fa o sena go mo tlhalosetsa jalo, o tla kgona go lemoga gore go a kgonega go dumela gore sengwe se teng le fa tota o sa se bone. Ka tsela e e tshwanang re nna le tumelo mo sengweng fa re na le bosupi jwa gore se teng.—Bar. 1:20.

RE TSHWANETSE GO RATA BOAMMAARURI

E re ka tumelo e ikaegile ka bosupi, motho o tshwanetse go nna le kitso ya boammaaruri gore a nne le tumelo. (1 Tim. 2:4) Mme gone go nna le kitso fela ga go a lekana. Moaposetoloi Paulo o ne a re: “Motho o supa tumelo ka pelo.” (Bar. 10:10) Seno se raya gore motho o tshwanetse go rata boammaaruri. Fa a rata boammaaruri, o tla bontsha gore o na le tumelo ka go tshela go ya ka melao ya Modimo. (Jak. 2:20) Fa motho a sa rate boammaaruri, a ka nna a gana go dumela sengwe le fa gone a bona bosupi jwa sone e le ka gonne a sa batle go fetola se a se dumelang kgotsa a batla go itshelela. (2 Pet. 3:3, 4; Jude 18) Ke gone ka moo bangwe ba ileng ba se ka ba nna le tumelo le fa gone ba ile ba bona Modimo a dira dikgakgamatso. (Dipa. 14:11; Joh. 12:37) Moya wa Modimo o thusa fela batho ba ba ratang boammaaruri gore ba nne le tumelo.—Bagal. 5:22; 2 Bathes. 2:10, 11.

KE ENG SE SE THUSITSENG DAFIDE GO NNA LE TUMELO?

Kgosi Dafide o ne a na le tumelo e e nonofileng. (Baheb. 11:32, 33) Le fa go ntse jalo, bangwe mo lelapeng la bone ba ne ba se na tumelo e e tshwanang le ya gagwe. Ka sekai, nako nngwe fa Dafide a utlwa gore Goliathe o ne a rogaka Jehofa, o ile a galefa. Mme mogoloe Dafide yo o bidiwang Eliabe o ile a bontsha gore o ne a sa dumele gore Jehofa a ka ba golola ka gonne o ile a omanya Dafide. (1 Sam. 17:26-28) Ga re tsholwe re na le tumelo e bile ga re nne le yone fela ka gonne batsadi ba rona ba na le yone. Dafide o ne a na le tumelo ka gonne o ne a na le kamano e e molemo le Modimo.

Mo go Pesalema 27, Dafide o tlhalosa gore ke eng se se mo thusitseng go nna le tumelo e e nonofileng. (Tem. 1) Dafide o ne a tlhatlhanya ka dilo tse di mo diragaletseng mo botshelong le kafa Jehofa a ileng a mo golola ka gone mo bathong ba ba bosula. (Tem. 2 le 3) O ne a rata motlaagana wa ga Jehofa. (Tem. 4) O ne a obamela Jehofa kwa motlaaganeng le batlhanka ba bangwe ba ga Jehofa. (Tem. 6) Gape o ne a rapela Jehofa ka metlha. (Tem. 7 le 8) Mo godimo ga moo, Dafide o ne a batla go itse melao ya ga Jehofa. (Tem. 11) Tumelo e ne e le botlhokwa thata mo go Dafide mo a neng a re: “Tota nkabo ke le kae fa ke ne ke se na tumelo?”—Tem. 13.(NWT)

O KA NONOTSHA TUMELO YA GAGO JANG?

O ka nna le tumelo e e tshwanang le ya ga Dafide fa o dira dilo tse di tlhalosiwang mo go Pesalema 27. E re ka tumelo e theilwe mo kitsong ya boammaaruri, re tshwanetse go bala Baebele le dikgatiso tse di theilweng mo Baebeleng. Fa re dira jalo, go tla nna motlhofo gore re nne le nonofo eno e moya wa Modimo o re thusang go nna le yone. (Pes. 1:2, 3) Fa o bala, iphe nako ya go akanya ka se o se balang. Go akanya ka se re se balang go tla re thusa gore re rate Jehofa. Fa o rata Jehofa, o tla dira dilo tse di bontshang gore o na le tumelo tse di jaaka go ya dipokanong le go ya bodireding. (Baheb. 10:23-25) Gape re bontsha gore re na le tumelo fa re rapela ka metlha. (Luke 18:1-8) Ka jalo, rapela Jehofa o sa kgaotse “ka gonne o a [go] kgathalela.” (1 Bathes. 5:17; 1 Pet. 5:7) Tumelo e re thusa go dira dilo tse di siameng, mme fa re dira dilo tse di siameng, tumelo ya rona e a nonofa.—Jak. 2:22.

DUMELA MO GO JESU

Pele Jesu a tlhokafala, o ne a raya barutwa ba gagwe a re: “Dumelang mo Modimong, dumelang le mo go nna.” (Joh. 14:1) Ka jalo, re tshwanetse go dumela mo go Jehofa le mo go Jesu. Mma re tlotle ka ditsela di le tharo tse re ka bontshang ka tsone gore re dumela mo go Jesu.

Sa ntlha, tsaya setlhabelo sa ga Jesu e le mpho e Jehofa a go e neileng. Moaposetoloi Paulo o ne a re: “Botshelo jo jaanong ke bo tshelang  . . . ke bo tshela ka tumelo e e ka ga Morwa Modimo, yo o nthatileng a ba a ineela ka ntlha ya me.” (Bagal. 2:20) Fa o dumela mo go Jesu, o dumela gore setlhabelo sa gagwe se ka go thusa le gore se dira gore Modimo a go itshwarele. Gape o dumela gore se go naya tsholofelo ya go bona botshelo jo bo sa khutleng le gore se bontsha gore eleruri Jehofa Modimo o a go rata. (Bar. 8:32, 38, 39; Baef. 1:7) Fa o dumela gore setlhabelo sa ga Jesu se ka go thusa, ga o kitla o inyatsa e bile ga o kitla o ipega molato go sa tlhokege.—2 Bathes. 2:16, 17.

Sa bobedi, rapela Jehofa. Setlhabelo sa ga Jesu se re thusa gore re kgone go bua le Jehofa ‘ka kgololesego, gore re tle re amogele kutlwelobotlhoko re bo re bone bopelonomi jo bo sa re tshwanelang gore re bone thuso ka nako e e tshwanetseng.’ (Baheb. 4:15, 16; 10:19-22) Go rapela go re thusa gore re se ka ra leofa.—Luke 22:40.

Sa boraro, ikobele Jesu. Moaposetoloi Johane o ne a re: “Yo o supang tumelo mo go Morwa o na le botshelo jo bo sa khutleng; yo o sa utlweng Morwa ga a kitla a bona botshelo, mme bogale jwa Modimo bo ntse mo go ene.” (Joh. 3:36) Johane o ne a re motho yo o sa reetseng ga a na tumelo. Ka jalo, re bontsha gore re dumela mo go Jesu fa re mo ikobela. Re bontsha gore re ikobela Jesu fa re ikobela “molao wa ga Keresete.” Molao wa ga Keresete ke sengwe le sengwe se Jesu a neng a se ruta le se a re laelang sone. (Bagal. 6:2) Gape re ikobela Jesu fa re reetsa “motlhanka yo o boikanyego le yo o botlhale.” (Math. 24:45) Fa re ikobela Jesu, re tla kgona go itshokela mathata mangwe le mangwe.—Luke 6:47, 48.

‘IKAGENG MO TUMELONG YA LONA E E BOITSHEPOTSHEPO’

Nako nngwe monna mongwe o ne a raya Jesu a re: “Ke na le tumelo! Nthuse fa ke tlhokang tumelo gone!” (Mar. 9:24) Monna yoo o ne a na le tumelo mme gone, o ne a itse gore o tlhoka tumelo e e oketsegileng. Rotlhe re tla kopana le maemo a a tlhokang gore re nne le tumelo e e nonofileng. Ka jalo, re tshwanetse go nonotsha tumelo ya rona gone jaanong. Jaaka re setse re buile, re nonotsha tumelo ya rona fa re ithuta Lefoko la Modimo e bile re tlhatlhanya ka lone. Fa re dira jalo, re tla rata Jehofa le go feta. Gape tumelo ya rona e tla nonofa fa re obamela Jehofa, re bolelela ba bangwe se re se dumelang e bile re rapela ka metlha. Sa botlhokwa le go feta, Baebele ya re: ‘Baratwa, ka go ikaga mo tumelong ya lona e e boitshepotshepo, ipolokeng mo loratong lwa Modimo.’—Jude 20, 21.