Ikanye Gore Jehofa O Tla Diragatsa Boikaelelo jwa Gagwecry

“Basiami ba tla rua lehatshe, ba tla aga mo go yeōna ka bosakhutleñ.”—PESALEMA 37:29.

1. Boikaelelo jwa ga Jehofa ka batho le ka lefatshe leno ke eng?

JEHOFA o ne a bopa Adame le Efa, batsadi ba rona ba ntlha, ba itekanetse. E bile o ne a ba bopetse gore ba tshelele ruri mo lefatsheng leno—fa ba ne ba ka ikobela melao ya gagwe. (Genesise 1:26, 27; 2:17) Mo godimo ga moo, Modimo o ne wa ba baya mo lefelong le e neng e le paradaise. (Genesise 2:8, 9) Jehofa o ne a ba raya a re: “Atañ, lo ntsihalè lo tlalè ka lehatshe, lo le henyè.” (Genesise 1:28) Ka jalo, kgabagare bana ba bone ba ne ba tla tlala mo lefatsheng lotlhe, e bile polanete eno e ne e tla nna paradaise e e tletseng ka batho ba ba itekanetseng, batho ba ba itumetseng. A bo dilo di ne di ntse sentle jang ne fa lelapa la motho le ne le simologa! “Modimo oa bōna señwe le señwe se o se dihileñ, me, bōnañ, ga bo go le molemo thata.”—Genesise 1:31.

2. Ke dipotso dife tse di tsosiwang ke kafa seemo sa motho se ntseng ka teng?

² Lefa go ntse jalo tsela e dikgang tsa motho di ileng tsa nna ka yone ka diketekete tsa dingwaga ga e tshwane gotlhelele le kafa Modimo o neng o ikaeletse gore go nne ka teng kwa tshimologong. Batho ga ba a itekanela e bile ga ba a itumela. Maemo a lefatshe a ile a ngomola pelo thata, e bile jaaka go ne ga perofesiwa, a ile a nna maswe thata mo motlheng ono wa rona. (2 Timotheo 3:1-5, 13) Ka jalo, re ka tlhomamisa jang gore boikaelelo jwa Modimo ka batho bo tla diragadiwa gautshwane fela mo isagweng? A go santse go tla feta dipaka tse ditelele tsa nako maemo a a ngomolang pelo ano a ntse a le teng?

Ke Eng Se Se Dirileng Gore go Nne Maswe Jaana?

3. Ke eng fa Jehofa a ne a sa nyeletse botsuolodi jwa batho ka bonako?

³ Ba ba itseng Lefoko le le tlhotlheleditsweng la Modimo ka tlhomamo ba itse lebaka la go bo Jehofa a letlile maemo a a maswe ano mo lefatsheng. E bile ba itse gore o tlile go dira eng ka one. Ba ithutile go tswa mo pegong ya Bibela gore batsadi ba rona ba ntlha ba ile ba se ka ba dirisa sentle mpho e e molemo thata e Modimo o e fileng batho ya go itlhophela se ba se ratang. (Bapisa 1 Petere 2:16.) Ba ne ba dira phoso mme ba tlhopha go se busiwe ke Modimo. (Genesise, kgaolo 2 le 3) Botsuolodi jwa bone bo ne jwa tsosa dipotso tse dikgolo tota, jaaka: A Molaodi wa Lobopo o na le tshwanelo ya go busa batho? A puso ya gagwe ke yone e e ba siametseng thata? A batho ba ka kgona go ipusa ba sa okamelwa ke Modimo? Tsela fela e dipotso tseno di neng di ka arabiwa ka yone e ne e le ka go tlogela motho gore a buse ka makgolokgolo a dingwaga. Ditlamorago tsa gone di ne di tla supa kwantle ga pelaelo gore a motho o ne a ka kgona go ipusa ka katlego kwantle ga Modiri wa gagwe.

4, 5. (a) Go gana ga motho go busiwa ke Modimo go ile ga felela jang? (b) Go feta ga nako go ne ga supa eng kwantle ga pelaelo?

⁴ Fa Adame le Efa ba ne ba latlha Modimo, ga a ka a tlhola a ba nonotsha gore ba nne ba itekanetse. Ba ne ba koafala thata gonne a ne a sa ba nonotshe. Go ne ga felela ka bosaitekanelang, botsofe, mme kgabagare loso. Ka melawana ya go gotsa, batsadi ba rona ba ntlha ba ne ba fetisetsa dipopego tse di sa siamang tseo mo ditlogolwaneng tsotlhe tsa bone, go akaretsa le rona. (Baroma 5:12) Mme go tweng kaga tsela e go ipusa ga motho ka diketekete tsa dingwaga go ileng ga felela ka yone? Go ile ga felela ka masetlapelo, fela jaaka Moreri 8:9 e bolela jaana ka boammaaruri: “Go na le motlha o motho o nañ le thata mo go eo moñwe ka ōna go ikutlwisa botlhoko.”

⁵ Lobaka lwa nako lo lo neng lwa feta lo ne lwa bontsha kwantle ga pelaelo gore batho ba ka se kgone go laola dikgang tsa bone ka katlego kwantle ga Mmopi wa bone. Jeremia, mokwadi yo o tlhotlheleditsweng wa Bibela o ne a bolela jaana: “Yehofa, kea itse ha tsela ea motho e se mo go èna ka esi: ga goeō mo mothuñ eo o tsamaeañ ka dinaō go siamisa dikgatō tsa gagwè.”—Yeremia 10:23; Duteronome 32:4, 5; Moreri 7:29.

Boikaelelo jwa Modimo Ga Bo A Fetoga

6, 7. (a) A hisitori ya diketekete tsa dingwaga e ile ya fetola boikaelelo jwa ga Jehofa? (b) Ke eng se se akarediwang mo boikaelelong jwa ga Jehofa?

⁶ A dingwaga tse di fetileng tse di diketekete tsa hisitori ya motho—tse di tletseng boikepo le pogisego—di ile tsa fetola boikaelelo jwa Modimo? Lefoko la gagwe le bolela jaana: “Go bua yana Yehofa eo o tlhodileñ magodimo; ke èna Modimo; o o bopileñ lehatshe oa le diha; o no oa le tlhōmamisa, o no o se ka oa le tlhōlèla lehèla, oa le bopèla go uñwa.” (Isaia 45:18) Ka jalo Modimo o ne o diretse lefatshe gore batho ba nne mo go lone, e bile seo e santse e le boikaelelo jwa gagwe.

⁷ Jehofa ga a bopela lefatshe gore le agiwe fela gape o ne a ikaeletse gore e nne paradaise e e tla nniwang ke batho ba ba itekanetseng ba ba itumetseng. Ke gone ka moo Bibela e neng ya bolelela pele gore go ne go tla nna le “lehatshe ye lesha,” losika lo losha lwa batho, le go ‘tla nnang tshiamo mo go lone.’ (2 Petere 3:13) E bile Lefoko la Modimo mo go Tshenolō 21:4 le re bolelela gore mo lefatsheng la gagwe le lesha, “o tla phimola dikeledi cotlhe mo matlhoñ a [batho]; me ga go ketla go tlhōla go le losho; le gōna ga go ketla go tlhōla go le bohutsana, leha e le selelō, leha e le botlhoko: dilō tsa pele di hetetse rure.” Mabaka ao ke one a a dirileng gore Jesu a bitse lefatshe le lesha le le tlang leo a re ke “Paradaisa.”—Luke 23:43.

8. Ke eng fa re ka tlhomamisa gore Jehofa o tla dira fela jaaka a ikaeletse?

⁸ Ga go na motho ope yo a ka kgoreletsang maikaelelo a ga Jehofa gonne o maatla otlhe e bile ke Mmopi yo o botlhale go gaisa wa lobopo. “Yehofa oa mashomōshomō o ikanne, a re, Rure yaka ke gopotse, go tla dihala yalo, le yaka ke ikaeletse go tla èma hèla yalo.” (Isaia 14:24) Ka jalo, fa Modimo o re o tla dira lefatshe leno paradaise e e tla nniwang ke batho ba ba itekanetseng, go tla nna fela jalo. Jesu o ne a re: “Go segō ba ba pelonomi: gonne ba tla rua lehatshe.” (Mathaio 5:5; bapisa Pesalema 37:29.) Re ka tlhomamisa tota gore tsholofetso eo e tla diragala. Tota e bile re ka neela matshelo a rona ka botlalo ka ntlha ya yone.

Ba Ne Ba Ikanya Jehofa

9. Ke eng se Aberahame a neng a se dira se se supang gore o ne a ikanya Jehofa?

⁹ Batho ba bantsi ba ba boifang Modimo ba ne ba neela matshelo a bone ka botlalo ka ntlha ya maikaelelo a Modimo ka lefatshe gonne ba ne ba tlhatswegile pelo gore o tla a diragatsa. Le mororo ba ne ba sa itse go le kalo ka Modimo, ba ne ba mo ikanya mme ba tshela matshelo a bone ba dira thato ya gagwe. Ka sekai, yo mongwe e ne e le Aberahame yo a neng a tshela dingwaga di ka nna 2 000 pele Jesu a tla mo lefatsheng—bogologolo pele Bibela e simolola go kwalwa. O ne a ikanya Jehofa gore o tla diragatsa ditsholofetso tsa Gagwe. Go lebega Aberahame a ne a utlwa ka Mmopi mo go rraagwemogologolwane yo a neng a ikanyega e bong Sheme, yoo ene a neng a rutilwe ke Noa. Ka jalo fa Modimo o ne o raya Aberahame o re a tswe mo motseng o o humileng wa Ure wa Bakaladea mme a ye kwa nageng e a sa e itseng e e kotsi ya Bakanana, tlhogo eo ya lotso e ne e itse gore e ka ikanya Jehofa, ka jalo e ne ya tsamaya. (Bahebera 11:8) Jehofa o ne a mmolelela jaana go ise go e kae: “Ke tla diha morahe o mogolo ka wèna.”—Genesise 12:2.

10, 11. Ke eng fa Aberahame a ne a batla go isa Isake, morwawe yo o tsetsweng a le esi, setlhabelo?

¹⁰ Go ne ga diragala eng fa Isake a sena go tsalelwa Aberahame? Jehofa o ne a bolelela Aberahame gore ditlogolwana tsa gagwe di tla nna morafe o mogolo ka Isake. (Genesise 21:12) Ka jalo, go ka tswa go ne ga lebega Jehofa a ikganetsa fa a ne a leka tumelo ya ga Aberahame ka go mo raya a re a ye go ntsha Isake, morwawe setlhabelo. (Genesise 22:2) Lefa go ntse jalo, Aberahame o ne a ikanya Jehofa ka botlalo mme a tsaya dikgato go dira jaaka a ne a mo laetse, a tsaya thipa go bolaya Isake. Modimo o ne wa romela moengele go thibela Aberahame fela fa a setse a tla dira jalo.—Genesise 22:9-14.

¹¹ Ke eng fa Aberahame a ne a le kutlo jaana? Bahebera 11:17-19 e senola seno: “Ka tumèlō Aberahame, e rile a lekwa, [go ne ga tshwana fela le fa a ntshitse Isake setlhabelo, NW]: E, èna eo o na a amogetse dipolèlō tsa choloheco ka boitumèlō, o na a re, o isa morwawè eo o tsecweñ a le esi chupèlō; Eboñ èna eo go builweñ naè, ga twe, Losika loa gago lo tla bolèlwa mo go Isake. Ka a kaea, go re, Modimo o nonohile go mo cosa, leha e le mo bashwiñ; lo o bileñ a mo amogèla rure ka sechwanchō.” Baroma 4:20, 21 le yone e bolela jaana ka tsela e e tshwanang: “Ea re ka [Aberahame] a lebile polèlō ea choloheco ea Modimo, a se ka a thèèkèla ka go tlhōka go dumèla . . . a ikantse ka botlalō, go re, se [Modimo] o se mo sholoheditseñ, o bile o nonohile go se diha.”

12. Aberahame o ne a duelwa jang ka ntlha ya tumelo ya gagwe?

¹² Aberahame o ne a duelelwa tumelo ya gagwe e seng fela ka go falodiwa ga ga Isake le ka go dira gore a nne le “morahe o mogolo” ka ene mme o ne a duelwa ka tsela e nngwe gape. Modimo o ne wa raya Aberahame wa re: “Merahe eotlhe ea lehatshe e tla segōhala mo losikeñ loa gago; ka u utlwile lencwe ya me.” (Genesise 22:18) Jang? Kgosi ya Bogosi jwa Modimo jwa selegodimo e ne e tla tswa mo losikeng lwa ga Aberahame. Bogosi joo bo ne bo tla thubaganya bo tlosa lefatshe leno le le bosula le le busiwang ke Satane. (Daniele 2:44; Baroma 16:20; Tshenolō 19:11-21) Morago ga foo, fa Bogosi bo busa lefatshe le le phepa, Paradaise e tla atolosediwa mo lefatsheng lotlhe, mme batho ba ba tswang mo ‘merafeng yotlhe’ ba ba dirang thato ya Modimo ba tla itumelela botsogo jo bo itekanetseng e bile ba tla tshelela ruri. (1 Yohane 2:15-17) Le mororo Aberahame a ne a itse go le gonnye fela kaga Bogosi, o ne a ikanya Modimo mme a lebelela pele go bo bona bo tlhongwa.—Bahebera 11:10.

13, 14. Ke eng fa Jobe a ne a ikanya Modimo?

¹³ Morago ga makgolo a le mmalwa a dingwaga go ne ga nna le monna mongwe go twe Jobe, yoo a neng a tshela fa gare ga lekgolo la bo 17 le la bo 16 la dingwaga B.C.E. kwa jaanong e leng Arabia. Le ene o ne a tshela pele Bibela e simolola go kwalwa. Jobe “o na a itekanetse, a le thōkgamō, e le motho eo o boihañ Modimo, a tshaba boshula.” (Yobe 1:1) Fa Satane a ne a itaya Jobe ka bolwetsi jo bo maswe jo bo botlhoko, monna yo o ikanyegang yoo ga a ka a “bua lefa e le lefoko le le lengwe fela la boleo” fa a ntse a diragalelwa ke dilo tseno. (Yobe 2:10, The New English Bible) Jobe o ne a ikanya Modimo. Le mororo a ne a sa itse mabaka a go bo a ne a boga thata jalo, o ne a neela Modimo botshelo jwa gagwe ka botlalo a bo a bo neela le ka ntlha ya ditsholofetso tsa Gagwe.

¹⁴ Jobe o ne a itse gore le fa a ne a ka swa, Modimo o ne a tla dira gore a tshele ka letsatsi lengwe ka go mo tsosa mo baswing. O ne a supa fa a solofetse seno fa a ne a raya Jehofa Modimo a re: “Ua bo u ka ka ua mphitlha mo Bobipoñ . . . ua ka ua ntaolèla motlha o o tlhōmameñ, me ua nkgakologèlwa. Ha monna a shwa a o tla ba a tshela? . . . U nu u ka bitsa, ke ne ke tla gu araba.” (Yobe 14:13-15) Le mororo a ne a boga thata, Jobe o ne a supa fa a dumela gore Jehofa ke molaodi fa a ne a re: “Ga nketla ke itlosa thōkgamō ea me, go ba ke tla ke shwa.”—Yobe 27:5.

15. Dafide o ne a bolela jang go supa gore o ikanya maikaelelo a ga Jehofa?

¹⁵ Dafide o ne a bolela fa a solofetse lefatshe le lesha makgolo a le marataro a dingwaga Jobe a setse a sule le dingwaga tse di ka nnang sekete pele Jesu a tla mo lefatsheng. O ne a bolela jaana mo dipesalemeng: “Ba ba lebeletseñ mo go Yehofa, ba tla rua lehatshe. Gonne e tla re kwa pelenyana moikepi a bo a sa tlhole a le gōna . . . Me bapelonomi ba tla rua lehatshe; ba tla inatehisa mo letlotloñ ya kagishō. Basiami ba tla rua lehatshe, ba tla aga mo go yeōna ka bosakhutleñ.” Dafide o ne a kgothatsa jaana gonne tsholofelo ya gagwe e ne e tlhomame tota: “Ikanya Yehofa . . . Inatehisè mo go Yehofa; me o tla gu naea dikeleco tsa pelo ea gago.”—Pesalema 37:3, 4, 9-11, 29.

16. ‘Boidiidi jwa basupi’ bo ne bo solofetse eng?

¹⁶ Go kgabaganya makgolo a dingwaga, banna le basadi ba ba ikanyegang le bone ba ile ba solofela go tshelela ruri mo lefatsheng. E bile tota, ba ne ba dira ‘boidiidi jwa basupi’ ba ba neng ba neela matshelo a bone ka botlalo ka ntlha ya ditsholofetso tsa ga Jehofa. Bontsi jwa basupi bano ba ga Jehofa ba bogologolo ba ne ba bogisiwa le go bolaelwa tumelo ya bone, “e le gore ba tlè ba bōnè go coga mo loshuñ mo go molemō bogolo.” Jang? Mo lefatsheng le lesha le Modimo o tla ba duelang ka go ba tsosa mo baswing ka tsela e e molemo bogolo le ka go lebelela go tshelela ruri.—Yohane 5:28, 29; Bahebera 11:35; 12:1.

Basupi ba Bakeresete Ba Ikanya Modimo

17. Bakeresete ba lekgolo la ntlha la dingwaga ba ne ba ikanya Jehofa thata jang?

¹⁷ Mo lekgolong la ntlha la dingwaga C.E., Jehofa o ne a senolela phuthego e e neng e fetsa go tlhongwa ya Bokeresete dilo dingwe tse di oketsegileng kaga Bogosi le puso ya jone mo lefatsheng. Ka sekai, moya wa gagwe o ne wa tlhotlheletsa moaposetoloi Johane go kwala gore palo ya ba ba tlileng go busa le Jesu Keresete mo Bogosing jwa legodimo e tlile go nna 144 000. Bano e ne e tlile go nna batlhanka ba ba ikanyegang ba Modimo ba ba “cwañ go rèkwa mo lehatshiñ.” (Tshenolō 7:4; 14:1-4) Ba ne ba tla busa mo lefatsheng jaaka “dikgosi,” (NW) le Keresete kwa legodimong. (Tshenolō 20:4-6) Bakeresete bao ba lekgolo la ntlha la dingwaga ba ne ba ikanya Jehofa tota gore o tla diragatsa boikaelelo jwa gagwe kaga Bogosi jwa selegodimo le lefelo le bo tla le busang le le mo lefatsheng mo e leng gore ba ne ba ineetse gore ba ka swela tumelo ya bone. Bontsi jwa bone bo ne jwa dira fela jalo.

18. Basupi ba ga Jehofa ba gompieno ba etsa ba bogologolo jang?

¹⁸ Gompieno mo e ka nnang Basupi ba ga Jehofa ba ba ka tshwarang dimilione di le tlhano ba ikanya Modimo ka tsela e e tshwanang fela jaaka go ne ga dira ba ba neng ba tshela makgolo a dingwaga pele ga bone. Basupi bano ba motlha wa segompieno ba ile ba tshela ba lebeletse dilo tse Modimo o di solofeditseng. Ba ile ba mo neela matshelo a bone mme tumelo ya bone e nonotshiwa ke Bibela. (2 Timotheo 3:14-17) Basupi bano ba ga Jehofa ba motlha wa segompieno ba etsa balatedi ba ga Jesu ba lekgolo la ntlha la dingwaga ba ba neng ba bolela gore “re na le go utlwa Modimo bogolo go batho.” (Ditihō 5:29) Mo lekgolong leno la dingwaga bontsi jwa Basupi bano ba Bakeresete ba ile ba bogisiwa botlhoko. Bangwe ba ile ba bo ba bolaelwa tumelo ya bone. Bangwe ba ile ba swa ka ntlha ya bolwetsi, dikotsi, kana botsofe. Lefa go ntse jalo, ba ile ba ikanya Modimo fela jaaka basupi ba ba ikanyegang ba metlha ya bogologolo, gonne ba ne ba itse gore o ne a tla dira gore ba tshele gape mo lefatsheng le lesha la gagwe ka go ba tsosa mo baswing.—Yohane 5:28, 29; Ditihō 24:15; Tshenolō 20:12, 13.

19, 20. Ke eng se re se lemogang kaga boperofeti jwa Bibela mo motlheng ono wa rona?

¹⁹ Basupi ba ga Jehofa ba itumelela gore go ntshiwa ga bone mo merafeng yotlhe le go dirwa bakaulengwe ba ba utlwanang mo lefatsheng lotlhe go sale go bolelelwa pele bogologolo mo boperofeting jwa Bibela. (Isaia 2:2-4; Tshenolō 7:4, 9-17) E bile Jehofa o ba neile tiro ya gore ba rere mo lefatsheng lotlhe ba phutha batho ba bangwe ba ba peloephepa gore a ba rate le go ba sireletsa. (Diane 18:10; Mathaio 24:14; Baroma 10:13) Botlhe ba ikanya Jehofa ka botlalo, ba itse gore o tla tloga a lere lefatshe le lesha le le gakgamatsang.—Bapisa 1 Bakorintha 15:58; Bahebera 6:10.

²⁰ Boperofeti jwa Bibela bo bontsha gore lefatshe la ga Satane ga le bolo go tsena mo metlheng ya lone ya bofelo ka dingwaga tse di ka nnang 80 jaanong, go simolola ka ngwaga wa ditiragalo tsa botlhokwa wa 1914. Lefatshe leno le atamela kwa bokhutlong. (Baroma 16:20; 2 Bakorintha 4:4; 2 Timotheo 3:1-5) Ka gone, Basupi ba ga Jehofa ba pelokgale gonne ba lemoga gore Bogosi jwa Modimo bo tla tloga bo laola dikgang tsotlhe tsa lefatshe. Modimo o tlile go tlosetsa ruri maemo a a maswe a a sa bolong go nna teng mo lefatsheng ka dingwaga tse di makgolokgolo ka go nyeletsa lefatshe la gone jaanong le le boikepo le go lere lefatshe la gagwe le lesha la tshiamo.—Diane 2:21, 22.

21. Ke ka ntlha yang fa re ka itumela le mororo go na le mathata jaanong?

²¹ Go tloga foo, ka lobaka lo lo sa khutleng, Modimo o tla re tlamela fela thata ka go re tshololela masego a a tla duelelang botlhoko bope fela jo re ileng ra bo boga mo nakong e e fetileng. Go na le dilo tse dintsi tse di molemo tse di tlileng go re diragalela mo lefatsheng le lesha mo re tlileng go lebala mathata a rona a nako e e fetileng. A bo go gomotsa jang ne go itse gore ka nako eo Jehofa o tla ‘huporolola seatla sa gagwe mme a kgorise keletso ya ditshedi tsotlhe fela.’—Pesalema 145:16; Isaia 65:17, 18.

22. Ke eng fa re tshwanetse go ikanya Jehofa?

²² Batho ba ba ikanyegang ba tla bona Baroma 8:21 e diragadiwa mo lefatsheng le lesha: “Lobopo lo tla gololwa mo botlhankeñ yoa go bōla, lo isiwa mo kgololesegoñ ea kgalalèlō ea bana ba Modimo.” Ba tla bona thapelo eno ya ga Jesu e a neng a e ruta balatedi ba gagwe e diragadiwa: “Bogosi yoa gago a bo tlè. Go rata ga gago a go dihwè mo lehatshiñ yaka kwa legodimoñ.” (Mathaio 6:10) Ka jalo, ikanye Jehofa ka botlalo ka go bo tsholofetso ya gagwe e e tlhomameng ya re: “Basiami ba tla rua lehatshe, ba tla aga mo go yeōna ka bosakhutleñ.”—Pesalema 37:29.

O Ne O Tla Araba Jang?

◻ Boikaelelo jwa ga Jehofa ke eng ka batho le ka lefatshe leno?

◻ Ke eng fa Modimo o letlile maemo a a maswe mo lefatsheng?

◻ Batho ba ba ikanyegang ba bogologolo ba ne ba bontsha jang gore ba ikanya Jehofa?

◻ Ke eng fa batlhanka ba Modimo ba gompieno ba ikanya Jehofa?

[Setshwantsho mo go tsebe 16]

Modimo o ne wa bopela batho go tshelela ruri ka boitumelo mo lefatsheng la paradaise

[Setshwantsho mo go tsebe 18]

Aberahame o ne a ikanya Jehofa tota gore o kgona go tsosa baswi