“Le Eo O Utlwañ A A Kè A Re, Tla”

Mo ngwageng otlhe o o tlang, Basupi ba ga Jehofa mo dinageng tse di fetang 200 mo lefatsheng lotlhe ba tla bo ba dira go dumalana le temana eno ya ngwaga wa 1991: “LE EO O UTLWAÑ A A KÈ A RE, TLA.”

“Mōea le monyadwi ba re, Tla. Le eo o utlwañ, a a kè a re, Tla. Le eo o nyorilweñ a a tlè: eo o ratañ, a a tseè metse a botshelō, a a tseè hèla a sena thèkō.”—TSHENOLŌ 22:17.

1. Re lalediwa go “Tla” kwa ‘metsing’ afe?

O LALEDIWA go “tla.” Go tla go dira eng? Ee, go tla go timola lenyora la gago ka metsi. Ano ga se metsi a a tlwaelegileng mme ke metsi a a tshwanang le ao Jesu Keresete a neng a bua ka one fa a ne a bolelela mosadi wa Mosamaria jaana kwa sedibeng: “Me leha e le mañ eo o tla nwañ metse a ke tla a mo nosañ, ga a ketla a tlhōla a nyōrwa gopè; me metse a ke tla a mo nosañ, a tla cwa mocwedi oa metse mo go èna, a a cwèlèlañ botsheloñ yo bo sa khutleñ.” (Yohane 4:14) Jesu o ne a tsaya kae “metse” ano?

2. “Metse” ano a tswa kae, mme a ne a ka elela fela fa go sena go diragala eng?

² Moaposetoloi Johane o ne a nna le tshiamelo ya go bona ponatshegelo ya kwa “metse” ano a neng a tswa gone, jaaka a kwadile jaana mo go Tshenolō 22:1: “Me a mpontsha noka ea metse a botshelō, e galalèla yaka legwèka, e cwa mo setuloñ sa bogosi sa Modimo le sa ga Kwana.” Ee, motswedi wa metsi ano a a phepa jaaka legweka a a nang le dinonofo tsa go naya botshelo ga se ope fela fa e se Moneibotshelo, Jehofa ka boene, yo a a nayang ka Kwana, ebong Jesu Keresete. (Bapisa Tshenolō 21:6.) Ereka go umakiwa ‘setulo sa bogosi sa Modimo le sa ga Kwana,’ metsi a botshelo a tshwanetse a bo a simolotse go elela fa Bogosi jwa Bomesia bo sena go tlhomiwa ka 1914, ke gore fa letsatsi la Morena le sena go simolola.—Tshenolō 1:10.

3, 4. “Metse” a emela eng, mme ke bomang ba ba ka a bonang?

³ Metsi ano a botshelo a tshwantshetsa eng? A tshwantshetsa seo Modimo o tlileng go se dira ka go busetsa botshelo jwa motho gore bo itekanele gape, botshelo jo bo itekanetseng jo bosakhutleng mo lefatsheng le le fetotsweng paradaise. Metsi a botshelo a emela dilo tsotlhe tse di baakantsweng tsa botshelo ka Jesu Keresete. A dilo tsotlhe tseno di gone jaanong? Nnyaa, eseng tsotlhe, gonne Modimo o tshwanetse go tlosa tsamaiso ya gone jaanong e e boikepo ya dilo le mmusi wa yone, Satane Diabolo. Mme re ka tsaya “metse” a a leng gone jaanong ka go reetsa le go ikobela mafoko a a molemo a Bogosi le go dumalanya matshelo a rona le one.—Yohane 3:16; Baroma 12:2.

⁴ Ka gone, fa a sena go bontsha Johane ‘noka ya botshelo,’ Jesu o ne a bua le Johane ka seo boikaelelo jwa Gagwe e neng e le sone ka go romela moengele wa Gagwe go mmontsha ponatshegelo. Morago Johane o ne a utlwa go tlhaelediwa jaana: “Mōea le monyadwi ba re, Tla. Le eo o utlwañ, a a kè a re, Tla. Le eo o nyorilweñ a a tlè: eo o ratañ, a a tseè metse a botshelō, a a tseè hèla a sena thèkō.” (Tshenolō 22:17) Ka gone, batlhanka ba Modimo ba laletsa botlhe ba ba nyorilweng gore ba simolole go nwa dilo tse Modimo o di ba baakanyeditseng gore ba bone botshelo jo bosakhutleng mo lefatsheng ka Kwana ya Modimo.—Yohane 1:29.

Metsi A Botshelo A Simolola go Nna Botlhokwa

5. Go tlile jang gore batho ba tlhoke paakanyetso eno ya bomodimo?

⁵ Se se utlwisang botlhoko ke gore batsadi ba ntlha ba ba tsetseng losika lwa motho ga ba a ka ba kgomarela tsela ya botshelo eo e ka bong e ile ya naya ditlogolwana tsa bone tshono ya go ipelela botshelo e le batho ba ba itekanetseng mo legaeng la paradaise ka bosakhutleng. Adame o ne a tshwanetse go dira tlhopho e e botlhale go direla Mmopi wa gagwe ka boikobo gore batho ba bone botshelo jo bosakhutleng. Efa o ne a simolola go tsaya kgato e e neng ya felela ka gore batho ba swe, mme monna wa gagwe yo o itekanetseng Adame o ne a tlhopha go kopanela le ene mo tseleng e e bolayang eo, ba tlhotlhelediwa ke sebopiwa sengwe se se tletseng botsuolodi sa semoya. Ka gone, jaaka motsadi wa tlhago wa dikokomana tse di neng tsa latela tsa batho, Adame eleruri ke ene a lerileng loso mo losikeng lotlhe lwa motho. Ka jalo, go ntse fela jaaka Bibela e bolela jaana: “Ke gōna, yaka boleo bo tsenye mo lehatshiñ ka motho a le moñwe hèla, le losho ka boleo; me yalo losho loa hetèla mo bathuñ botlhe, ka botlhe ba leohile.” (Baroma 5:12) Adame le Efa ba ne ba simolola go oketsa losika lwa batho ka maloko a masha fa ba sena go leofa.—Pesalema 51:5.

6. Ke ka ntlha yang fa Jehofa a ne a rulaganyetsa gore “metse” ano a nne gone?

⁶ A Modimo jaanong o ne a se kitla a fitlhelela boikaelelo jwa gagwe jwa go tlatsa lefatshe la paradaise ka batho ba ba itekanetseng? Bibela tota e araba ka gore nnyaa! Lefa go ntse jalo, go fitlhelela boikaelelo jwa gagwe, Jehofa o ne a dira paakanyetso e e lorato eo e neng e tla dirolola go palelwa go go boitshegang ga ga Adame mme lefa go le jalo e dumalana ka botlalo le tshiamiso le tshiamo, tseo Ene ka boene a di supang ka botlalo ebile e le ene fela a ka dirang jalo. O dira seno ka “noka ea metse a botshelō.” O tla e dirisa gore batho ba boikobo bao ba neng ba thibetswe mo Motsweding wa botshelo ba itekanele gape. Noka eno e elela tota mo Pusong ya Dingwaga Tse Di Sekete ya ga Jesu Keresete. Ka gone, go ralala Puso ya ga Keresete ya Mileniamo, batho, go akaretsa le bao ba tsositsweng mo baswing, ba tshwanetse go nwa mo ‘nokeng ya metsi a botshelo.’—Bapisa Esekiele 47:1-10; Ditihō 24:15.

7. “Metse” a rulaganyediwa mo motheong ofe?

⁷ Jehofa o ipelela botshelo jwa gagwe, mme gape o ipelela go naya popo nngwe ya gagwe tshiamelo ya go tshela ka botlhale. Motheo o mo go one Jehofa a baakanyeditseng go naya botshelo ka one ke setlhabelo sa ga Jesu sa thekololo. (Mareko 10:45; 1 Yohane 4:9, 10) Lefoko la Modimo leo ka dinako dingwe Bibela e le bitsang “metse” le lone le a kopanyelediwa. (Baefesia 5:26) Jehofa Modimo ka boene o gololesegile go bolela jaana, “Tla,” mo dibopiweng tsa batho, bao ba neng ba latlhegelwa ke dilo tse Modimo o neng o di neile batho ba babedi ba ntlha ba ba itekanetseng, ebong Adame le Efa.

Setlhopha sa Monyadiwa Se Ntsha Taletso Sa Re, “Tla”

8. “Metse” ano a ne a newa bomang pele mme leng?

⁸ Ba ntlha go ntsha taletso ba re “tla” ke bao ba bopang monyadiwa wa tshwantshetso wa ga Kwana, Morwa wa ga Jehofa wa semoya wa leitibolo. (Tshenolō 14:1, 3, 4; 21:9) Monyadiwa wa semoya wa ga Keresete ga a ipitse a re “Tla,” ke gore, ga a reye bao Jehofa Modimo a santseng a tla ba phutha gore ba nne karolo ya setlhopha sa monyadiwa sa ba ba 144 000 ka palo. Mafoko ao a taletso a laletsa batho bao ba solofelang go bona botshelo jo bo itekanetseng mo lefatsheng morago ga Hara-Magedona. (Tshenolō 16:14, 16) Mo bokhutlong jono jwa tsamaiso ya dilo re ile ra utlwa taletso ya “monyadiwa,” e e dumalanang le moya o o boitshepo wa Modimo go tloga ka 1914.

9. Re itse jang gore ga se a setlhopha se sennye fela?

⁹ Se se kgatlhang ke gore, buka ya bofelo ya Bibela e supa gore “boidiidi yo bogolo yoa batho, yo go señ motho opè eo o ka bo balañ,” bo tla arabela tlhaeletso eo ya mafoko a a molemo a Bogosi jwa Modimo mme bo ne bo tla ema bo nonofile kafa letlhakoreng la puso eo ya segosi. (Tshenolō 7:9, 10, 16, 17) A o mongwe wa boidiidi jo bogolo joo? He, “le eo o utlwañ, a a kè a re, Tla.”

Moya le Monyadwi Ba Re, “Tla”

10. Metsi ano a tshwantshetso a tshwanetse a bo a tswa kae, mme ka ntlha yang?

¹⁰ Mme ke ka ntlha yang fa Modimo le Monyadi wa tshwantshetso ba sa umakiwe mo go Tshenolō 22:17? Sa ntlha, tlhokomela gore temana eno ga e bolele gore ke mang yo o laolang go dira ga moya o o boitshepo. Lefa go le jalo, fa go buiwa ka moya tlhokomelo ya rona e ya kwa go Jehofa Modimo ka boene. Rara ga a a tlogelwa, ereka e le ene Motswedi wa moya o o boitshepo. Sa bobedi, morwa o dirisana ka botlalo le Rraagwe, jaaka a bolela jaana: “Morwa ga a na go diha sepè ka esi, ha e se se o bōnañ Rara a se diha.” (Yohane 5:19) Mo godimo ga moo, lemororo taletso eno e le polelo e e tlhotlheleditsweng e e tswang kwa go Jehofa Modimo, batho ba ka kgona go amogela kaelo ya bomodimo, kana “dipolelo tse di tlhotlheleditsweng,” ka Jesu Keresete, ebong “Lehoko.” (Tshenolō 22:6, NW; gape le 22:17, ntlhanyana e kwa tlase e e go NW Reference Bible; Yohane 1:1) Ka mo go tshwanelang he, re amanya Keresete ebong Monyadi le taletso eno. Ee, re ka tlhomamisega gore Jehofa Modimo, Rraagwe Monyadi, le Jesu Keresete, Monyadi, ba kopanela le “monyadwi” ka moya o o boitshepo mo go boleleng ba re, “Tla.”

11, 12. (a) Ke sesupo sefe sa pele seo se neng sa bontsha gore taletso ya go nwa e ne e tla atolosiwa? (b) Kgang eno e ne ya nna ya phepafala jang fa dingwaga di ntse di feta?

¹¹ Taletso eno ya go “tla” e ne e ntse e ntshediwa batho ba ba nyorilweng “metse a botshelō” ka masomesome a dingwaga. Le eleng morago ka 1918, setlhopha sa monyadiwa se ne sa simolola go rera molaetsa ono oo segolobogolo o neng o ama bao ba neng ba ka tshela mo lefatsheng. E ne e le puo ya phatlalatsa ya setlhogo se se reng “Dimilione Tse Jaanong Di Tshelang Di Ka Nna Tsa Se Ka Tsa Swa.” Seno se ne sa solofetsa gore batho ba bantsi ba tla falola Hara-Magedona mme morago ga moo ba bone botshelo jo bo sa khutleng mo Paradaiseng mo Bogosing jwa Modimo jwa Bomesia. Mme molaetsa oo tota ga o a ka wa supa tsela epe ya go bona tshiamelo eno ya go falola, fa e se go nna tshiamo ka kakaretso fela.

¹² Go fitlhelela batho ba ba oketsegileng ka taletso eno ya “Tla,” batho botlhe bao ba neng ba kgatlhegela go direla Modimo ba ne ba newa molaetsa ono ka 1922: “Itsiseng Kgosi le Bogosi.” Ka 1923 setlhopha sa monyadiwa se ne sa tlhaloganya gore “dinku” le “dipodi” tsa setshwantsho sa ga Jesu se se mo go Mathaio 25:31-46 di tla bonala pele ga Hara-Magedona. Morago, ka 1929, The Watch Tower ya March 15 e ne ya bua ka setlhogo “Taletso ya Bopelotlhomogi.” Temana ya sone ya setlhogo e ne e le Tshenolō 22:17, mme e ne e otlelela boikarabelo jwa setlhopha sa monyadiwa jwa go laletsa ba bangwe go “Tla.”—Ditsebe 87-9.a

Dinku Tse Dingwe Di Kopanela mo go Boleleng Di re, “Tla”

13, 14. Ke ditlhaloso dife tse dingwe gape tse di neng tsa newa ka bo 1930 go bontsha gore ba bangwe le bone ba ne ba tla nwa metsi a tshwantshetso?

¹³ Mo godimo ga moo, bogologolo ka 1932, The Watchtower e ne ya bolela gore “dinku di sele,” le tsone di tshwanetse tsa re “Tla.” (Yohane 10:16) E ne ya bolela jaana mo tokololong ya yone ya August 1, mo tsebeng ya 232, mo serapeng sa 29: “Basupi ba ga Jehofa jaanong ba na le botlhaga jo bo tshwanang le jwa ga Jehu mme ba tshwanetse go kgothaletsa setlhopha sa Jonadabe [dinku di sele] go kopanela le bone mme se nne le seabe mo go boleleleng ba bangwe gore bogosi jwa Modimo bo gaufi.” Fa se sena go tsopola Tshenolō 22:17, serapa seo se ne sa bolela jaana: “A batlodiwa ba kgothatse botlhe ba ba nnang le seabe mo go boleleng mafoko a a molemo a bogosi. Ga ba tlhoke go bo e le batlodiwa ba Morena gore ba kgone go bolela molaetsa wa Morena. Basupi ba ga Jehofa ba gomodiwa tota jaanong ke go itse gore ba letlilwe go isa metsi a botshelo kwa setlhopheng sa batho bao ba ka nnang ba falodisiwa Hara-Magedona mme ba newa botshelo jo bosakhutleng mo lefatsheng ka ntlha ya bomolemo jo bogolo jwa ga Jehofa.”b

¹⁴ Go tloga ka 1934 go ya kwa pele, masalela a a tloditsweng a ne a supa gore dinku tseno jaanong di tshwanetse tsa ineela mo Modimong mme tsa tshwantshetsa boineelo jwa tsone ka go kolobediwa ka metsi mme di kopanele le setlhopha sa monyadiwa mo go boleleng di re, “Tla” mo bathong ba bangwe ba ba santseng ba nyorilwe. Ka gone, jaanong setlhopha sa monyadiwa se ne se laletsa ka tsela e e tlhomameng go phutha dinku di sele tse di nyorilweng tseno go nna “lecomane le le leñwe hèla” kafa tlase ga “modisa a le moñwe hèla,” Jesu Keresete. (Yohane 10:16) Masalela a batlodiwa a ne a tlhotlheletsega tota fa a bolelelwa kwa kopanong ya bone ya kakaretso ya ngwaga oo ka 1935 gore setlhopha sa batho ba dinku di sele bao ba neng ba ba raya ba re, “Tla” tota e ne e le “boidiidi yo bogolo” jwa Tshenolō 7:9-17. Seno se ne sa rotloetsa tiro ya go ntsha taletso fela thata.

15. “Mōea” o ne o na le seabe sefe mo taletsong e e reng “Tla”?

¹⁵ Setlhopha sa monyadiwa se ne se dumalana le moya wa Modimo mo go boleleng se re “Tla.” O ne a dira gore setlhopha sa masalela a monyadiwa se atolose taletso ka go se senolela bokao jwa boperofeti jwa Lefoko le le kwadilweng la gagwe ka moya wa gagwe. Boperofeti joo taletso eno e neng e thailwe mo go jone bo ne bo tlhotlheleditswe ke moya wa Modimo. Ka jalo, totatota, moya wa Modimo o o neng o tla ka Keresete le monyadiwa wa gagwe ke one o o neng o bolelela batho ba sekadinku ba boidiidi jo bogolo o re “Tla.”—Tshenolō 19:10.

16. Moya le monyadiwa ba amana jang le taletso eo gompieno?

¹⁶ Le go fitlha gompieno moya le monyadiwa, ba ba emelwang ke masalela, ba ntse “ba re, Tla.” Masalela a bolelela dinku di sele tseno go laletsa le ba bangwe gore ba “tlè.” Ga ba a tshwanela go ipolokela “metse a botshelō,” jaaka a bonwa gompieno. Ba tshwanetse go ikobela taolo e e tswang go “Mōea le monyadwi,” e e reng: “Le eo o utlwañ, a a kè a re, Tla.” Botlhe bao ba nyorololang lenyora la bone ba tshwanetse go phasalatsa taletso. Ba tshwanetse go e bolelela mongwe le mongwe ba sa lebelele gore ke wa lotso lofe, morafe, puo, kana bodumedi jo a leng mo go jone jaanong—mongwe le mongwe le gongwe le gongwe! “Metse a botshelō” a a leng gone ka nako eno ke ao Basupi ba ga Jehofa ba laletsang le go thusa batho botlhe go a nwa fela mahala!

17. Ke “metse” a mofuta ofe a a leng gone gompieno?

¹⁷ Mo lefatsheng lotlhe, Kwana, Jesu Keresete, eleruri o kaela boidiidi jo bogolo a bo isa kwa “mecwediñ ea metse a botshelō.” (Tshenolō 7:17) Metsi ano ga a leswe, mme a phepa, a tsiditsana, a itekanetse go tswa tota mo Motsweding wa one. Metsi ano a tshwantshetso ga se metsi fela a a tshwanang le fa motho a tlhaloganya boammaaruri jwa Bibela; a kaya dilo tsotlhe tse Modimo o di baakantseng ka Jesu Keresete tse di simololang le eleng jaanong go baya boidiidi jo bogolo mo tseleng ya go bona botshelo jo bo itekanetseng ka boitumelo.

Nna le Seabe Jaanong mo Tlhaeletsong Eno

18. Taletso eno e godisitswe go le kana kang mo motlheng ono wa rona?

¹⁸ Le jaanong, palo ya boidiidi jo bogolo jono e balwa e le dimilione di le mmalwa. Ba tswelela go bolela mafoko a a molemo a Bogosi mo lefatsheng lotlhe le le agilweng ka botlhaga. Ba bega tiro ya bone ya tshimo ya go rera mafoko a a molemo a Bogosi eo jaanong e dirwang mo dinageng di le 212 ka metlha. Fa nako e santse e le gone mo bokhutlong jwa tsamaiso eno ya dilo, taletso eno e tla tswelela fela go ya ka bopelotelele le boitshoko jwa ga Jehofa Modimo, Mmolokanako yo Mogolo. O tla itse fa go sa tlhole go na le nako le lobaka lwa nako ya fa a tla ikitsise botlhe gore ke Jehofa, fela jaaka a solofeditse gore o tla dira jalo mo dipolelong tse di boaboelediwang mo boperofeting jwa Bibela.—Esekiele 36:23; 38:21-23; 39:7.

19. Ke ka ntlha yang fa re ka bolela gore “metse” ano a nowa mahala?

¹⁹ Ka gone, fa go santse go na le nako, a maloko a boidiidi jo bogolo a kopanele ka boitumelo le monyadiwa mo go boleleng ba re: ‘Tlayang mme lo nweng metsi a botshelo mahala!’ Baboledi ba mafoko ano a a molemo a a bolokang botshelo ba tlhaeletsa jaana mahala, ga ba duedise ope ka tiro eno e ba e dirang jaaka ba ntse ba phasalatsa molaetsa wa Bogosi mo lefatsheng lotlhe.

20. Go bo “metse” ano a le gone go tla felela jang?

²⁰ Metsi a botshelo jaanong a gone mo kgolokweng yotlhe, gore batho bao ba batlang go a nwa ba dire jalo mme ba kgotsofale ka botlalo mme go felele ka gore matshelo a bone a bolokege. Batho ba ba golotsweng ba tla ipelela botshelo jo bosakhutleng mo lefatsheng leno, leo le tshwanetseng go fetolelwa go nna paradaise, ba goletsa boikaelelo jo bo molemo tota jwa ga Jehofa. Mmopi wa rona ga a a bopela lefatshe lefela mme o le bopetse go nna tshimo ya Edena kana Paradaise ya boitumelo e e tla tlalang lefatshe lotlhe, mme mo go yone go nna dibopiwa tse e leng batho tse di itekanetseng tseo di leng mo setshwanong sa Modimo, di tshwana le ene tota.

21. Boikaelelo jwa Modimo ka lefatshe bo tla diragadiwa jang?

²¹ Eleruri, e tla bo e le tshiamelo e kgolo jang le boitumelo jo bogolo jang go nna mo lefatsheng leo le lesha! Ka nako eo taolo eo Modimo o neng o e neile banyalani ba ntlha ba batho e e mo go Genesise 1:27, 28 e tla diragadiwa ka botlalo. Re leboga Jehofa ka go dira ka matsetseleko go nyeletsa masetlapelo a a neng a wela losika lwa motho, lefatshe le tla tlhabololwa gore le bo le nne paradaise mme le tla tlala ka batho ba ba itekanetseng. Ee, Modimo o tla bona sengwe le sengwe seo a se dirileng, mme bona, se tla bo se le molemo tota. A o tla nna gone koo? Fa go le jalo, he o tshwanetse wa simolola go nwa metsi a botshelo a mahala ka kanaanelo. “Tla” mme o nwe o kgore mme o nyorolole lenyora la gago ka metsi a botshelo a a setseng a simolotse go elela jaanong mme a tla elela ka botlalo mo Mileniamong o o tlang. Mme a mongwe le mongwe yo o utlwang taletso e e monate eno a re: “Tla.”

[Ntlha e e kwa tlase]

Karabo ya Gago Ke Efe?

◻ Ke “metse” afe a go buiwang ka one mo go Tshenolō 22:17?

◻ “Metse” ano a tswa kae?

◻ Ke ka ntlha yang fa “metse” ano a tlhokega, mme a ne a ka simolola leng fela go elela?

◻ Mo temaneng eno ya rona, go umakiwa ga “mōea” go kaya eng, mme “monyadi” o kopanyelediwa jang?

◻ Ke bomang ba ba ka nwang “metse” ano, mme go ka felela jang?