O ne A Rata Boammaaruri

KA May 1963, go ne ga tsoga dikhuduego tsa go tlhasela Ba-China mo Java Bophirima. Toropo e e neng e amegile thata e ne e le ya Sukabumi, kwa kgwebo ya rona ya diteraka e neng e le gone. Batho ba le makgolokgolo, go akaretsa le baagisani ba rona ba ne ba thuba kwa gae. Re ne re ba lebile fela ka letshogo fa ba ntse ba re senyetsa e bile ba re tseela dithoto.

Fa segongwana seno se sena go tsamaya, baagisani ba bangwe ba ne ba tla go re gomotsa. Rre o ne a ya go nama maoto fa fatshe le bone ka go ne go se na ditulo. O ne a fitlhela Baebele ya gagwe e tona ya Se-Sunda mo dithotong tsa rona tse di sentsweng. O ne a e bula a bo a bolelela baagisani gore Baebele ga e bolo go porofeta ka mathata ano. A bo a tlhalosa ka tsholofelo e re nang le yone ya Bogosi.

Rre ga a ise a ko a tsamaye a tlhome mogopolo mo go ipolokeleng matlotlo mo lefatsheng. O ne a re gakolola ka metlha go re: “Dilo tsa ga Jehofa di tshwanetse go tla pele!” Ka ntlha ya sekao sa gagwe, Mmè, bana ba bone ba barataro, rremogolo wa dingwaga di le 90 le bontsi jwa ba masika le baagelani ba ne ba amogela boammaaruri.