Setlhogo se se Thusang Basadi ba ba Kileng ba Sotliwa
“BASADI le basetsana ba le dimilione mo lefatsheng lotlhe ba kile ba sotliwa. A o mongwe wa bone? Bona gore ke eng fa Modimo a amega ka wena le gore o tlile go dira eng ka batho ba ba sotlang basadi.”
Ao ke mafoko a a simololang a setlhogo se se reng “Baebele e a Reng ka Pabalesego ya Basadi?” se se mo jw.org. Kwa bofelong jwa setlhogo seo go na le linki ya PDF e o ka downloudang setlhogo seno ka yone, go tswa foo o ka kgona go e printa o bo e menaganya gore e nne pampitshana ya ditsebe tse nnê. Kgaitsadi mongwe wa kwa United States yo o bidiwang Stacy a re: “Nna le kgaitsadi mongwe re ile ra printa dikhopi tsa setlhogo seo, re bo re di isa kwa lefelong lengwe le basadi ba ba kileng ba sotliwa ba tlhokomelwang kwa go lone mo tshimong ya rona.”
Mosadi mongwe yo o berekang kwa lefelong leo, o ile a kopa dikhopi tse dingwe tse di oketsegileng gore a kgone go di naya batho ba ba nnang koo. Bokgaitsadi bao ba ile ba mo isetsa dikhopi tse dingwe di le 40 mmogo le dikarata tsa go ikgolaganya le rona tsa jw.org di le 30. Moragonyana fa ba ile gape kwa lefelong leo, manejara o ne a batla gore ba bontshe basadi ba ba nnang kwa lefelong leo gore thuto ya Baebele e tshwarwa jang.
Stacy le bokgaitsadi ba bangwe ba babedi ba ile ba diragalelwa ke se se tshwanang kwa lefelong le lengwe le go tlhokomelwang basadi ba ba kileng ba sotliwa. Fa ba le koo ba ile ba naya mosadi yo o berekang koo dikhopi di le tlhano tsa pampitshana eo, mme o ile a kopa tse di oketsegileng. Mosadi yoo o ile a re: “Pampitshana eno e tla thusa basadi ba le bantsi mono. Ruri re a e tlhoka!” Moragonyana fa bokgaitsadi ba boela kwa lefelong leo, basadi ba le bantsi ba ile ba phuthega gore ba bone gore thuto ya Baebele e tshwarwa jang. Ba le babedi mo go bone ba ne ba batla go ya dipokanong kwa Holong ya Bogosi mo mafelobekeng a a latelang.
Stacy a re: “Re ne re gakgametse tota fa re bona batho ba itumelela go bala pampitshana eno. E ntle tota fa e printilwe e bo e menwa, e bile go nna motlhofo go e dirisa fa o bolelela basadi ba ba kileng ba sotliwa molaetsa wa Bogosi Jwa Modimo. Go ne go itumedisa tota go bona batho ba itumelela tshedimosetso eo. Gape re lebile pele go bona kafa Jehofa a tla tswelelang a segofatsa maiteko a rona a go rerela basadi bano dikgang tse di molemo.”