Nna Mmulatsela

Fa re ipeela mekgele mo tirelong ya ga Jehofa re tla dirisa maatla a rona sentle. (1Bk 9:26) Go setse nako e e khutshwane pele lefatshe leno le fedisiwa, ka jalo fa re ipeela mekgele re tla dirisa nako ya rona sentle. (Bae 5:15, 16) Fa lo tshwere kobamelo ya lelapa tlotlang ka mekgele e lo ka ipeelang yone mo ngwageng o mosha wa tirelo. Bukana eno ya dipokano e na le ditlhogo tse di farologaneng tse di ka go thusang go akanya ka mekgele e o ka ipeelang yone.—Jak 1:5.

Ka sekai, jaaka lelapa lo ka nna la dumalana gore lo tla ema nokeng mongwe wa lona yo o tla nnang mmulatsela wa ka metlha. Fa o akanya gore o ka se kgone go fitlhelela diura tse di tlhokegang, bua le mongwe wa babulatsela ba ka metlha ba maemo a bone a tshwanang le a gago. (Dia 15:22) Gongwe o ka rulaganya go botsolotsa mongwe wa babulatsela ka nako ya lona ya kobamelo ya lelapa. Go tswa foo, o ka kwala lenaneo le le tla go thusang go bona gore o ka fitlhelela jang diura tse di tlhokegang. Fa o kile wa nna mmulatsela mo nakong e e fetileng, akanyetsa gore a maemo gone jaanong a go letla go nna mmulatsela gape.

A gongwe bangwe mo lelapeng ba ka nna babulatsela ba ba thusang kgwedi e le nngwe kgotsa di le mmalwa? Le fa o le bokoa mo mmeleng, o ka nna mmulatsela yo o thusang ka go nna gone mo bodireding letsatsi le letsatsi mme o bo o bereka nako e e khutshwane. Fa o sa kgone go nna gone mo bodireding mo gare ga beke ka gonne o bereka kgotsa o tsena sekolo, gongwe o ka tlhopha kgwedi e e nang le malatsi a boikhutso kgotsa e e nang le mafelobeke a le matlhano. Fa o batla go nna mmulatsela yo o thusang, kwala mo khalendareng gore o tla bo tsaya ka kgwedi efe le gore o tla fitlhelela diura tseo jang.—Dia 21:5.

LEBANG BIDIO YA NNA PELOKGALE . . . MMULATSELA, LO BO LO ARABA POTSO E E LATELANG:

• Jehofa o ne a tlhokomela jang Kgaitsadi Aamand, mme seno se re ruta eng?