Go Tokafatsa Bokgoni Jwa Rona Mo Bodireding—Go Thusa Baithuti ba Baebele go Ineela mo go Jehofa le go Kolobediwa

GORENG GO LE BOTLHOKWA: Gore baithuti ba Baebele ba amogelwe ke Jehofa, ba tshwanetse go ineela mo go ene le go kolobediwa. (1Pe 3:21) Ba ba tshelang go dumalana le boineelo jwa bone ba tla sireletsa kamano ya bone le Jehofa. (Pes 91:1, 2) Mokeresete o ineela mo go Jehofa—e seng mo mothong, tiro kgotsa mokgatlho mongwe. Ka jalo, baithuti ba tshwanetse go ithuta go rata Modimo le go mo anaanela.—Bar 14:7, 8.

SE O KA SE DIRANG:

• Fa lo ntse lo tsweletse ka thuto, tlotlang ka go re tshedimosetso eo e re ruta eng ka Jehofa. Gatelela botlhokwa jwa go bala Baebele letsatsi le letsatsi le go rapela a “sa kgaotse.”—1Bath 5:17; Jak 4:8

• Kgothaletsa moithuti gore a ipeele mokgele wa go ineela mo go Jehofa le go kolobediwa. Gape mo thuse go fitlhelela mekgele e e tshwanang le ya go arabela kwa dipokanong kgotsa ya go rerela baagelani le ba a berekang le bone. Gakologelwa gore Jehofa ga a pateletse ope gore a mo direle. Go ineela mo go Jehofa ke tshwetso ya motho.—Dut 30:19, 20

• Kgothaletsa moithuti gore a dire diphetogo tse di tla itumedisang Jehofa le tse di tla dirang gore a tshwanelege go kolobediwa. (Dia 27:11) E re ka mekgwa mengwe e ka tswa e nweleletse thata mo mothong, moithuti wa Baebele a ka tlhoka go nna a thusiwa go latlha botho jo bogologolo le go apara jo bosha. (Bae 4:22-24) Mmontshe ditlhogo tse di mo makasineng wa Tora ya Tebelo tsa motseletsele wa “Baebele e Fetola Matshelo a Batho”

• Mo tlotlele ka maitemogelo a gago le boitumelo jo o nnileng le jone fa o direla Jehofa.—Isa 48:17, 18