Go Tokafatsa Bokgoni Jwa Rona mo Bodireding—Tsamaisa Buka ya Baebele e Ruta Eng

Lebaka La go Bo go Le Botlhokwa: Buka ya Baebele e Ruta Eng ke sedirisiwa sa konokono se re se dirisang go ruta batho Baebele. Mme gone, mongwe le mongwe wa rona o tshwanetse go itse kafa a ka e tsamaisang ka gone mo bodireding. (Dia. 22:29) Go na le ditsela di le dintsi tsa go dira jalo mme gone baboledi ba ka dirisa tsela epe fela e ba bonang e dira.

Kafa O ka Go Dirang ka Gone:

Botsa mong wa ntlo potso e e tla dirang gore lo bale kgaolo nngwe e e rileng mo bukeng eno. Gongwe e bile o ka nna wa dirisa nngwe ya dipotso tse di tlhagelelang kwa tshimologong ya kgaolo nngwe le nngwe. Fa mong wa ntlo a sena go araba potso, bala temana go tswa foo o mmontshe serapa se se buang ka kgang eno, gongwe lo bo lo tlotla ka sone.
Kakantsho e nngwe ke go dirisa ditsebe tsa ntlha tsa buka eno mme go tswa foo fa mong wa ntlo a kgatlhega, o ka mmontsha gore karabo ya Baebele e fa kae mo bukeng eno. Ka sekai, o ka nna wa bua ka tiragalo nngwe e e utlwisang botlhoko e go buiwang ka yone mo dikgannyeng mme o bo o mo tlhalosetsa gore batho ba le bantsi ba ipotsa dipotso tseno tse di mo tsebe 3. Kgotsa o ka nna wa mmolelela gore o etela batho go ba bolelela ka dilo tse di molemo tse di tla diregang mo nakong e e tlang. Go tswa foo, mmontshe ditshwantsho tse di mo tsebe 4-5 mme o bo o mmotsa go re: “Ke tsholofetso efe e o ka ratang go bona e diragadiwa?” Kakantsho e nngwe ke go bolelela mong wa ntlo gore o etile ka nakwana go tla go thusa batho go araba dipotso tsa botlhokwa mo botshelong. Go tswa foo, mmontshe dipotso tse di mo tsebe 6 mme o mmotse gore ke efe a ka ratang go itse karabo ya yone.
Bolelela mong wa ntlo gore o eletsa go ithuta Baebele le ene. O ka nna wa re: “Re bontsha baagelani ba rona buka eno ya Baebele. A o kile wa e bona? [Mo letle a arabe.] Fa o ka mpha metsotsonyana fela, nka rata go go bontsha kafa o ka e dirisang ka gone le Baebele ya gago.”

Leka Seno mo Kgweding Eno:

Lekang go dirisa dikakantsho tseno ka nako ya kobamelo ya lona ya lelapa.
Bolelela motho yo o tsamayang le ene mo bodireding gore o ipaakanyeditse go bua o reng. (Dia. 27:17) Fetola puisano ya gago fa o bona gore ga e bereke.