Go Tokafatsa Bokgoni Jwa Rona mo Bodireding—Go Rerela Motho yo o Buang Puo e Sele

Lebaka La go Bo go Le Botlhokwa: Jehofa o batla gore batho “mo setšhabeng sengwe le sengwe” ba atamalane le ene. (Dit. 10:34, 35) Ka jalo, Jesu o ne a re dikgang tse di molemo di tshwanetse go rerwa “mo lefatsheng lotlhe le le nang le banni” le “mo ditšhabeng tsotlhe.” (Math. 24:14) Sekarea o ne a bolelela pele gore batho “ba ba tswang mo dipuong tsotlhe tsa ditšhaba” ba ne ba tla reetsa molaetsa. (Seka. 8:23) Mo ponatshegelong ya ga moaposetoloi Johane, batho ba ba falolang pitlagano e kgolo e tla nna batho ba ba ‘tswang mo merafeng yotlhe le ditso le ditšhaba le diteme [dipuo, ntlha e e kwa tlase mo NW].’ (Tshen. 7:9, 13, 14) Re akantse ka seno, re tshwanetse go leka go rerela motho ope fela yo o buang puo e sele yo re kopanang le ene mo tshimong ya rona.

Kafa O ka Go Dirang ka Gone:

Nna o ipaakantse. Tsenya bukana ya Good News for People of All Nations mo bekeng ya gago ya tshimo. Itse ditaelo tse di mo tshimologong ya bukana eno mo setlhogong se se reng “How to Help Those Who Speak Another Language.” Akanya ka dipuo tse di ka tswang di buiwa mo lefelong la lona, mme o ipolokele mo sedirisiweng sa gago sa ileketeroniki bidio kgotsa kgatiso ya dipuo tseo e o ka e itseelang mo jw.org. Leka go dirisa JW Language app go ithuta mafoko mangwe. Fa o rera ka ntlo le ntlo mo tshimong e e berekiwang ke diphuthego tse di buang dipuo tse di farologaneng, tsaya fela dikgatiso tsa puo ya phuthego ya lona. Le fa go ntse jalo, fa o rera phatlalatsa mo lefelong le go buiwang dipuo tse dintsi mo go lone, tsaya dikgatiso tsa dipuo tsa batho ba o ka kopanang le bone.
Fa o kopana le motho yo o buang puo e sele, leka ka natla go mmolelela “dilo tse dikgolo tsa Modimo” ka puo ya gagwe. (Dit. 2:11) Mo kgothaletse go tsena mo jw.org go bona tshedimosetso e e oketsegileng ka puo ya gagwe. Fa a bontsha kgatlhego, rulaganya gore mongwe yo o buang puo ya gagwe a mo etele. Tswelela o etela motho yo o bontshitseng kgatlhego go fitlha baboledi ba ba buang puo ya gagwe ba mo etela.

Leka Seno mo Kgweding Eno:

Mo maitseboeng a a latelang a Kobamelo ya Lelapa, ikatisetseng go rerela motho yo o buang puo e sele.