Go Tokafatsa Bokgoni Jwa Rona mo Bodireding—Go Simolola go Isetsa Batho Dimakasine ka Metlha

Lebaka La go Bo go Le Botlhokwa: Batho ba bantsi ba ba itumelelang go bala dimakasine tsa rona ga ba batle go ithuta Baebele le rona. Gongwe ba rata bodumedi jwa bone kgotsa ba tsaya gore ga ba na nako ya go ithuta. Le fa go ntse jalo, fa ba ntse ba bala dimakasine tsa rona ba ka eletsa go ithuta Lefoko la Modimo. (1 Pet. 2:2) Setlhogo sengwe se ka ba ama dipelo kgotsa maemo a bone a ka fetoga. Fa re nna re ba etela ka metlha, seo se tla dira gore ba gololesege go bua le rona e bile se tla re thusa go lemoga se ba se kgatlhegelang le se se ba tshwenyang. Re ka feleletsa re ithuta Baebele le bone.

Kafa O ka Go Dirang ka Gone:

Rulaganya gore kgwedi nngwe le nngwe o isetse mong wa ntlo dimakasine tsa bosheng tsa Tora ya Tebelo le Tsogang! Gongwe o ka mo etela gape mo kgweding eo gore o mo kgothaletse go bala setlhogo sengwe mo dimakasineng tse o mo tlogeletseng tsone kgotsa mo kgatisong e e tsamaisiwang. Ka metlha kwala se lo tlotlileng ka sone.—Bona Tirelo ya Rona ya Bogosi ya Ferikgong 2014, ts. 3.
Nako le nako fa o isetsa mongwe dimakasine baakanyetsa sentle. Go na le gore o tlogelele mong wa ntlo dimakasine fela, tlotla le ene mme o leke go dira gore lo nne ditsala le gore a nne a kgatlhegela molaetsa.
Nna o lebile ditshono tsa go simolola thuto. Fa motho yo o mo isetsang dimakasine a go botsa ka kgang nngwe ya Baebele, mo isetse kgatiso e re tshwarang dithuto tsa Baebele ka yone e e arabang potso ya gagwe lo bo lo tlotla ka yone. Pele o tsamaya, mmotse potso e e amanang le se lo neng lo tlotla ka sone mme lo tlotle ka yone mo nakong e e tlang. Fa lo nna le metlotlo ya Baebele ka metlha le fa e le mekhutshwane kgotsa o dirisa dikgatiso tse re tshwarang dithuto ka tsone, tota o tshwara thuto ya Baebele. A o kile wa isetsa mong wa ntlo boroutšhara jwa Dikgang Tse di Molemo o bo o mmontsha ka bokhutshwane gore thuto ya Baebele e tshwarwa jang? A o kile wa mmontsha bidio ya Ke Eng fa o Tshwanetse go Ithuta Baebele? le ya Thuto ya Baebele e Tshwarwa Jang? Tota le fa motho a ne a sa batle go ithuta Baebele mo nakong e e fetileng, maemo a a fetoga. A o ka se leke gape?

Leka Seno mo Kgweding Eno:

Dira lenaane la batho ba o ka ba isetsang dimakasine ka metlha. Ba neye dimakasine tsa bosheng o bo o ba bolelela gore o tla ba tlisetsa tsa kgwedi e e latelang.