Bidio e Ntšha ya go Simolola Dithuto Tsa Baebele

Bidio e khutshwane e e nang le setlhogo se se reng Ke Eng fa o Tshwanetse go Ithuta Baebele? e fitlhelela babadi ba le bantsi thata mo go jw.org. Bidio eno e diretswe go tlhotlheletsa batho ba ba kgatlhegang go amogela taletso ya rona ya go ithuta le bone Baebele mahala. O ka kgona go e bula ka go tlhopha “Kopa Thuto ya Baebele” kwa tlase mo tsebeng ya kwa tshimologong kgotsa ka go skena khouto ya QR (quick response) e e gatisitsweng kafa morago ga pampitshana nngwe le nngwe ya rona e ntšha. Fa tlase fano go na le ditsela dingwe tsa kafa re ka dirisang bidio eno ka tsela e e molemo ka gone.

• Fa o dira loeto lwa go boela, raya mong wa ntlo o re: “A nka go bontsha bidio e khutshwane e e tlhalosang kafa o ka bonang dikarabo tsa dipotso tsa Baebele ka gone?” Fa a dumela, mmontshe bidio mo sedirisiweng sa gago sa ileketeroniki kgotsa mo khomputareng ya gagwe.

• Fa re tsamaisa nngwe ya dipampitshana tse disha fa re ntse re rera re se mo bodireding, re ka bontsha motho khouto ya QR mme re bo re mo kgothaletsa go e skena ka sedirisiwa sa gagwe sa ileketeroniki. E re ka mo dipuong di le dintsi khouto ya QR e go isa ka tlhamalalo kwa bidiong e e mo go Web site ya rona, o ka kgona go tshameka bidio eo gone ka nako eo o dirisa sedirisiwa sa gago sa ileketeroniki.

• Bolelela badirimmogo, ba o tsenang sekolo le bone, ba losika le batho ba bangwe ba o ba itseng ka bidio eno mme o ithaopele go ba e bontsha. Kgotsa ba romelele e-mail ya link ya bidio eo mme o bo o ba kopa gore ba lebelele.

Ka go dirisa sedirisiwa seno se sesha, re ka kgona go simolola dithuto tse di oketsegileng tsa Baebele, re thusa batho ‘ba ba nang le tshekamelo e e siameng ya go bona botshelo jo bo sa khutleng’ semoyeng.—Dit. 13:48.