Go Tokafatsa Bokgoni Jwa Rona mo Bodireding—Go Thusa Motho yo o Tsamayang le Ene

Lebaka La go Bo go Le Botlhokwa: Jesu o ne a lemoga botlhokwa jwa go tsamaya le motho yo mongwe fa o rera. Ka jalo, fa a ne a roma barutwa ba gagwe ba le 70 gore ba tsamaye pele ga gagwe ba ye go rera, o ne a ba roma ka bobedi le bobedi. (Luke 10:1) Motho yo o tsamayang le mmoledi, a ka mo thusa fa go tlhaga mathata kgotsa fa a sa tlhomamisege gore a ka araba mong wa ntlo jang. (Mor. 4:9, 10) A ka dirisa maitemogelo a gagwe mme gangwe le gape a neye motho yo a tsamayang le ene kakantsho e e ka mo thusang go nna moreri yo o atlegileng thata. (Dia. 27:17) Gape a ka mo kgothatsa ka motlotlo o o agang fa ba se mo matlong.—Bafil. 4:8.

Kafa O ka Go Dirang ka Gone:

Reetsa ka kelotlhoko fa motho yo o tsamayang le ene a rera. (Jak. 1:19) Fa go balwa temana, bala mo Baebeleng ya gago. Seno se tla dira gore o kgone go thusa fa go tlhokega.
Dirisa temogo go bona gore ke leng go siametseng gore o kopanele mo motlotlong. (Dia. 25:11) Fa o tsamaya le mmoledi yo mongwe kwa thutong ya gagwe ya Baebele, o tla anaanela dikakgelo tse o di dirang gangwe le gape. Le fa go ntse jalo, fa lo rera ka ntlo le ntlo, motho yo o berekang le ene mo tshimong a ka itumela fa o ka mo letla gore a bue fa e le tshono ya gagwe ya go dira jalo. Mme gone, fa e le ke mmoledi yo o sa tswang go simolola go ya tshimong kgotsa a sa tlhomamisege gore a arabe jang potso kgotsa kganetso, a ka nna a itumela fa o mo thusa. Mme go sa kgathalesege gore o tsamaya le mmoledi mongwe mo tirong ya ntlo le ntlo, kwa maetong a go boela kgotsa kwa thutong ya Baebele, o se ka wa mo tsena ganong, ya nna wena o tswelelang ka motlotlo kgotsa wa simolola kgang e nngwe.
Dirisa maitemogelo a gago. Fa ka dinako dingwe o ka kgona go naya mmoledi yo o tsamayang le ene kakantsho e e tla mo thusang go atlega mo bodireding, dira jalo. (Dia. 3:27) Fa go tshwanela, o ka nna wa simolola ka go re: “O akanya gore go tsamaile jang mo ntlong ele?” kgotsa “A nka go naya kakantsho?” kgotsa “Gantsi nna ke leka go dira jaana.” O se ka wa lebala gore le fa batho ba bangwe ba anaanela kakantsho ka dinako dingwe, ba tla kgobega marapo fa ba bontshiwa phoso nngwe le nngwe e ba e dirang.

Leka Seno mo Kgweding Eno:

Fa o sena go bereka le mongwe mo bodireding, mmolelele gore ke eng se a se buileng kgotsa se a se dirileng se se dirang gore a nne mothusi yo o molemo mo bodireding.