Ipaakanyetse Sentle go Ruta
1. Fa re tshwara thuto ya Baebele, ke ka ntlha yang fa re tshwanetse go tlhoma mogopolo mo go direng gore moithuti a nne le kanaanelo?
1 Fa re tshwere thuto ya Baebele, re tshwanetse ra bo re baakanyeditse sentle gore re tlhotlheletse moithuti go direla Jehofa. Matsapa a rona e ka se ka ya nna a bophiri fa re thusa moithuti gore a anaanele boammaaruri jwa Baebele. Mme seno se tla mo tlhotlheletsa. (Dute. 6:5; Dia. 4:23; 1 Bakor. 9:26) Mme gone, re ka dira seno jang?
2. Thapelo e ka re thusa jang go baakanyetsa thuto sentle?
2 Rapela fa o Baakanyetsa: E re ka Jehofa e le ene a dirang gore peo ya boammaaruri e mele mo pelong ya moithuti, go a tshwanela gore re simolole go baakanyetsa thuto ka go rapelela moithuti ka tlhamalalo le dilo tse a di tlhokang. (1 Bakor. 3:6; Jak. 1:5) Le rona thapelo e e ntseng jalo e ka re thusa go bona gore re ka thusa jang go tlatsa pelo ya gagwe ka “kitso ya boammaaruri” ya thato ya ga Jehofa.—Bakol. 1:9, 10.
3. Re ka baakanyetsa jang re akantse ka moithuti?
3 Akanya ka Moithuti: Jesu o ne a itse gore thuto e e nang le matswela e akaretsa go akanya ka bareetsi. Bobotlana mo makgetlhong a le mabedi, Jesu o ne a bodiwa potso eno e e tshwanang: “Ke tla rua botshelo jo bosakhutleng ka go dira eng?” Lekgetlho lengwe le lengwe fa a araba, o ne a dirisa tsela e e farologaneng. (Luke 10:25-28; 18:18-20) Re tshwanetse go akanya ka moithuti fa re baakanyetsa. Ke ditemana dife tse di umakilweng tse re tla di balang le ene? Re tla leka go bala tshedimosetso e e kana kang? Ke dintlha dife mo thutong eno tse go ka nnang thata gore moithuti a di tlhaloganye kgotsa a di amogele? Fa re ka akanyetsa dipotso dingwe tse moithuti a ka di botsang, re ka ipaakanyetsa botoka gore re di arabe ka tsela e e tla mo solegelang molemo.
4. Go baakanyetsa sentle go akaretsa eng?
4 Boeletsa se lo Tla se Balang: Go sa kgathalesege gore re badile tshedimosetso eo ga kae mo nakong e e fetileng, e tla bo e le lekgetlho la ntlha re e bala le moithuti yono. Fa re batla go fitlhelela pelo ya gagwe, go botlhokwa gore re baakanyetse thuto nngwe le nngwe sentle. Seno se raya gore re dire se re kgothaletsang motho yo re ithutang le ene gore a se dire. Boeletsa tshedimosetso e lo tla e balang, go akaretsa le ditemana tse di umakilweng, o akantse ka moithuti mme gongwe o bo o thalela dintlha tsa konokono.—Bar. 2:21, 22.
5. Re ka etsa Jehofa jang?
5 Jehofa o kgatlhegela thata kgatelopele ya moithuti mongwe le mongwe wa Baebele. (2 Pet. 3:9) Fa re ipha nako ya go baakanyetsa thuto nngwe le nngwe ya Baebele, le rona re tla bo re bontsha gore re amega ka tsela e e lorato jalo.