A o Tsibogela Lorato Lwa ga Keresete?
1 Moaposetoloi Johane o ne a kwala jaana fa a ne a bolela ka botshelo jwa mong wa gagwe: “Jesu, ka a ne a ratile ba gagwe ba ba neng ba le mo lefatsheng, a ba rata go ya bokhutlong.” (Joh. 13:1) Mo nakong eno ya Segopotso, re simolola go akanya ka tsela e kgolo e Keresete a neng a re bontsha lorato ka yone. Re ka tsibogela lorato loo ka go dumela mo thekololong, go nna le seabe ka tlhoafalo mo tirong ya go rera le ka go itshoka “go ya bokhutlong,” fela jaaka Jesu.—Math. 24:13; 28:19, 20; Joh. 3:16.
2 Go Tsibogela Lorato Lwa ga Keresete: Jesu o ne a tshwaregile thata mo bekeng ya bofelo ya botshelo jwa gagwe a le mo lefatsheng. (Math. 21:23; 23:1; 24:3) Jaaka baetsi ba ga Keresete, le rona re tlhotlhelediwa ke lorato gore re ‘iteke ka tlhagafalo’ mo tirelong ya ga Jehofa. (Luke 13:24) A o ka dirisa dithulaganyo tseno tse di oketsegileng tsa go neela bosupi ka tsela e e molemo ka April, ka go oketsa nako e o e dirisang mo bodireding?
3 Sejo sa Morena sa Maitseboa sa monongwaga se tla ketekiwa mo maitseboeng a Laboraro, April 19. Ke ba le kae ba ba tla bong ba le teng mo tiragalong eno e e botlhokwatlhokwa? Gantsi seno se ikaega ka rona. A o dirile lenaane la batho ba o ikaelelang go ba laletsa—batho ba o ithutang le bone Baebele le ba bangwe ba ba kgatlhegang, ba losika, batho ba o dirisanang le bone mo go tsa kgwebo, le ba o tsenang sekolo le bone? A o setse o buisane le bone mme wa ba laletsa go tswa pelong? A o tla ba gakolola fa go setse malatsi a sekae pele ga Segopotso? A ba tlhoka gore o ba thuse gore ba fitlhe gone? Gape bagolwane ba laletsa batho bape ba ba ileng ba tsidifala mo bodireding. Lebaka la go bo Segopotso se tlile go tshwarwa mo maitseboeng a mo gare ga beke mme e seng mo mafelobekeng, ga le fokotse botlhokwa jwa gore botlhe ba nne gone.
4 Tla o Ipaakantse: Go botlhokwa gore re tle re ipaakantse le go nna le mogopolo o o tshwanetseng fa re le mo Segopotsong. Paulo o ne a rotloetsa badumedikaene go gakologelwa bomasisi jwa tiragalo eno. (1 Bakor. 11:20-26) O ka nna wa bala dikgaolo 13 go ya go 17 tsa Efangele ya ga Johane mo thutong ya lona ya lelapa ya Baebele mme go tswa foo lo dire gore mongwe le mongwe mo lelapeng a bolele gore setlhabelo sa ga Jesu se kaya eng mo go ene. O se ka wa lebala go bala le mmalo wa letsatsi le letsatsi wa Baebele wa beke ya Segopotso!
5 Re rata Keresete fela thata, mme tsela e re mo ratang ka yone ga e felele fela ka April 19. Re ikemiseditse go mo rata ka bosakhutleng! Mokete wa monongwaga wa Segopotso o tla re thusa go nonotsha boikaelelo joo.