Sekolo sa Bodiredi sa Puso ya Modimo sa 1998

Go tsena sekolo go kaya go “rutiwa kana go katisediwa kitso e e rileng kana tiro.” Mo Sekolong sa Bodiredi sa Puso ya Modimo, re nna re ntse re thapisiwa mo kitsong ya Modimo. Gape, go nna ga rona le seabe mo sekolong seno go dira gore re tokafatse dikgono tsa rona tsa go bua le tsa go ruta. Thulaganyo ya sekolo ya 1998 e tla re neela ditshono di le dintsi tsa gore re gatele pele semoyeng.

Fa o ntse o tlhatlhoba thulaganyo ya sekolo ya ngwaga o o tlang, o tla lemoga gore gangwe le gape Puo No. 3 e tla bo e theilwe go Ditlhogo Tsa Puisano. Mo godimo ga moo, buka ya Boitumelo mo Lelapeng e akareditswe mo thulaganyong ya sekolo ya 1998, mme e tla nna e akaretswa mo Puong No. 3 le No. 4. Fa Puo No. 4 e theilwe mo bukeng ya Boitumelo mo Lelapeng, mokaulengwe o tshwanetse go e neela phuthego e le puo. Mme e le go lo gakolola, ga go na ope mo sekolong yo o tshwanetseng go ja nako.

Karolo e Ntšha: Gore re solegelwe molemo ka namana, go tsentswe “Thulaganyo ya Mmalo wa Baebele o o Oketsegileng” mo masakaneng fa thoko ga nomoro ya pina mo bekeng nngwe le nngwe. Le fa gone go se na dikarolo dipe tsa thulaganyo ya sekolo tse di thailweng mo go yone, go dire mokgele wa gago go e latela. Seno se tla dira gore o tlwaele go bala Baebele letsatsi le letsatsi fa o ise o dire jalo.

Go bona tshedimosetso e nngwe ka ga dipuo, kgakololo le ditlhatlhobo tse di kwalwang, tsweetswee bala ka kelotlhoko ditaelo tse di fitlhelwang go “Thulaganyo ya Sekolo sa Bodiredi sa Puso ya Modimo sa 1998,” mmogo le tsebe 5 ya Tirelo ya Rona ya Bogosi ya October 1996.

Fa o ise o ikwadise mo Sekolong sa Bodiredi sa Puso ya Modimo, re go laletsa gore o ikwadise gone jaanong. Sekolo seno se se sa tshwaneng le sepe se nna se ntse se dira karolo e e botlhokwa go thapisa batlhanka ba ba boikokobetso le ba ba ineetseng ba ga Jehofa go nna badiredi ba ba tshwanelegang sentle.—1 Tim. 4:13-16.