Ba ba Godileng ba Rera ba sa Kgaotse
1 Fa batho ba ntse ba gola, bontsi jwa bone ba lebeletse pele nakong e ba tla tlogelang tiro ya bone ya go itshedisa mme ba tshele botshelo jwa boiketlo mo dingwageng tsa bone tse di setseng. Ba ka nna ba ikutlwa gore ba berekile thata mme jaanong ba tlhoka go ikhutsa. Kana ba ka nna ba batla go itumelela botshelo fela mo dingwageng tsa bone tse di setseng tsa botshelo.—Luke 12:19.
2 Jaaka batlhanka ba ga Jehofa ba ba ineetseng, re na le pono e e farologaneng ka botshelo. Re itse gore ga re ka ke ra iketla mo tirelong ya Modimo. Pono ya rona e farologane ka gonne re na le “tebelelo ya botshelo jo bo sa khutleng.” (Juda 21) Kitso le maitemogelo tse motho a di kgobokantseng mo dingwageng di ka tokafatsa temogo le botlhale jwa motho. Seno se ka dira gore motho a nne botlhale le go feta mme a nne tekatekanyo thata e bile a bontsha gore o anaanela botshelo thata. Dinonofo tseno di solegela motho molemo thata fa a le modiredi wa dikgang tse di molemo.
3 Go tsofala ga se go gola ka dingwaga fela; mme go akaretsa gape le tsela e motho a ikutlwang ka teng mo mogopolong. Fa o lebeletse go tshela nako e telele mme o leka go nna o lebega o le mosha, go ka kgonega thata gore o fitlhelele dilo tseno tse pedi. Batho ba ba tsofetseng ba ka tokafatsa matshelo a bone ka go oketsa kitso ya bone ya semoya le ka go e bolelela le ba bangwe.—1 Bakor. 9:23.
4 Dikai tsa Mmatota mo Botshelong: Fa a le dingwaga di le 86, kgaitsadi mongwe o ne a re: “Fa ke tlhatlhanya ka dingwaga tse 60 tse di fetileng e sa le ke ithuta boammaaruri, ke itumedisiwa ke tsholofetso e e ikanyegang ya Modimo. Ee, Jehofa yo o dirisanang ka boikanyego jo bo nitameng le ba ba ikanyegang ka nitamo o dira gore re bone boitumelo jo bogolo.” (Pes. 18:25) Mokaulengwe mongwe yo o tsofetseng o gakologelwa ka tsela eo a neng a amiwa thata ke loso lwa mosadi wa gagwe ka yone, mme botsogo jwa gagwe bo ne jwa koafala thata morago ga moo. O ne a re: “Le fa go ntse jalo, ka bopelonomi jo bo sa tshwanelang jwa ga Jehofa, ke ne ka tokafala thata mo ke ileng ka kgona go tsenela tirelo ya babulatsela dingwaga tse pedi morago ga moo. A bo ke leboga Jehofa thata jang ne gore boitekanelo jwa me bo ne jwa tokafala thata fa ke ne ke nna le seabe se segolwane mo tirelong ya go rera!”
5 A bo go kgothatsa jang ne go bo ba le bantsi ba ba ba godileng ba ikemiseditse go tswelela ba rera go ya bokgakaleng jo boitekanelo le maatla a bone a ba letlang ka gone—ba sa tlogele! Ba na le lebaka le le molemo go ka bua jaana: “Modimo o sa le wa nna wa nthuta le mo bokaung jwa me, ke ntse ke bolela ditiro tsa gago tse di gakgamatsang, nako e sa le eno.”—Pes. 71:17.