SETLHOGO SA KA FA NTLE | BASUPI BA GA JEHOFA KE BOMANG?
Basupi ba ga Jehofa ba dumela eng?
Basupi ba ga Jehofa ba dumela gore “lokwalo lotlhe lo tlhotlheleditswe ke Modimo e bile lo tswela mosola.” (2 Timotheo 3:16) Re dirisa Baebele go ithuta ka Mmopi le go tshela botshelo jo bo kgotsofatsang.
Baebele ya re: “Gore batho ba tle ba itse gore wena, yo leina la gago e leng Jehofa, wena o le esi o Mogodimodimo yo o okametseng lefatshe lotlhe.” (Pesalema 83:18) Ka jalo, re obamela Jehofa Modimo e bile jaaka Basupi ba gagwe, re leka go itsise batho leina la gagwe.—Isaia 43:10-12.
E re ka re le Bakeresete, re dumela gore “Morwa Modimo”a e bong Jesu, o ne a tla mo lefatsheng mme a nna Mesia. (Johane 1:34, 41; 4:25, 26) Fa a sena go swa, o ne a tsosiwa gore a ye go tshela kwa legodimong. (1 Bakorintha 15:3, 4) Moragonyana o ne a nna Kgosi ya Bogosi Jwa Modimo. (Tshenolo 11:15) Bogosi joo ke puso ya mmatota e e tla dirang gore lefatshe e nne Paradaise. (Daniele 2:44) Baebele ya re: “Ba ba pelonolo ba tla rua lefatshe, ruri ba tla nna le boitumelo jo bogolo mo letlotlong la kagiso.”—Pesalema 37:11, 29.
“Fa ba bala Baebele, ba dumela gore Modimo o bua le bone. Ka metlha fa go tlhaga mathata, ba batla tharabololo mo Lefokong la Modimo. . . . Ba dumela gore Lefoko la Modimo le sa ntse le tshela.”—Moruti wa Katoliki e bong Benjamin Cherayath, lokwalodikgang lwa Münsterländische Volkszeitung, Germany
Basupi ba ga Jehofa ba dumela gore le gompieno Baebele e ka solegela batho molemo. (Isaia 48:17, 18) Ka jalo, re ikobela melaometheo ya yone. Ka sekai, ga re goge e bile ga re dirise diritibatsi ka gonne Baebele e re laela go tila dilo tse di senyang megopolo le mebele ya rona. (2 Bakorintha 7:1) Gape re tila dilo tse Baebele e di kgalang tse di jaaka botagwa, boitsholo jo bo sa siamang jwa thobalano le go utswa.—1 Bakorintha 6:9-11.
a Baebele ya re Jesu ke “Morwa yo o tsetsweng a le esi wa Modimo” ka gonne ke motho wa ntlha e bile ke ene fela yo o bopilweng ke Jehofa ka tlhamalalo.—Johane 3:18; Bakolosa 1:13-15.