‘Nnelang Ruri mo Lefokong la Me’

“Fa lo nnela ruri mo lefokong la me, ruri lo barutwa ba me, mme lo tla itse boammaaruri, mme boammaaruri bo tla lo golola.”—JOHANE 8:31, 32.

Bokao Jwa Mafoko Ano: ‘Lefoko’ la ga Jesu le kaya dithuto tsa gagwe tse di neng di tswa kwa go mongwe wa maemo a a kwa godimo go mo feta. Jesu o ne a re: “Rara ka boene yo o nthomileng o nneile taelo ka ga gore ke bolele eng le gore ke bue eng.” (Johane 12:49) Fa Jesu a ne a rapela Jehofa Modimo, Rraagwe yo o kwa legodimong, o ne a re: “Lefoko la gago ke boammaaruri.” Gangwe le gape o ne a nopola Lefoko la Modimo go tshegetsa dithuto tsa gagwe. (Johane 17:17; Mathaio 4:4, 7, 10) Ka jalo, Bakeresete ba boammaaruri ba ‘nnela ruri mo lefokong la gagwe’—ke gore, ba tsaya Lefoko la Modimo, Baebele, le le “boammaaruri” e bile e le lone le le laolang se ba se dumelang mmogo le se ba se dirang.

Kafa Bakeresete ba Bogologolo ba Neng ba Dira Seo ka Gone: Mokeresete yo o neng a kwala dibuka tse dintsi tsa Baebele e bong moaposetoloi Paulo o ne a tlotla Lefoko la Modimo fela jaaka Jesu. O ne a kwala jaana: “Lokwalo lotlhe lo tlhotlheleditswe ke Modimo e bile lo tswela mosola.” (2 Timotheo 3:16) Banna ba ba neng ba tlhomilwe gore ba rute Bakeresete ka bone ba ne ba tshwanetse go “tshwarelela ka nitamo mo Lefokong la Modimo le le tlhomameng e bile le ikanyega.” (Tito 1:7, 9, The Amplified Bible) Bakeresete ba bogologolo ba ne ba gakololwa gore ba gane “botlhajana le tsietso e e lolea go ya ka ngwao ya batho, go ya ka dilo tsa tshimologo tsa lefatshe mme e seng go ya ka Keresete.”—Bakolosa 2:8.

Ke Bomang ba ba Dirang Seo Gompieno?: Molaotheo wa Dogmatic Constitution on Divine Revelation wa Vatican o o neng wa dirisiwa ka 1965 wa bo wa nopolwa mo Catechism of the Catholic Church, wa re: “Dilo tsotlhe tse di senotsweng tse Kereke [ya Katoliki] e tlhomamisegileng ka tsone ga di a thewa fela mo Dikwalong Tse di Boitshepo. Ka jalo, dithuto tse di boitshepo tsa kereke le Dikwalo Tse di Boitshepo di tshwanetse go ikanngwa le go tlotlwa ka tsela e e tshwanang.” Setlhogo sengwe mo makasineng wa Maclean’s se ne sa nopola moruti mongwe wa kwa Toronto, Canada a botsa jaana: “Ke eng fa re tlhoka go kaelwa ke mafoko a a ‘tlisang diphetogo’ a dingwaga di le dikete tse pedi tse di fetileng? Re nna re tla ka dikgopolo tse di molemo mme ka metlha di a reketla ka gonne re tshwanetse go di tshegetsa ka mafoko a ga Jesu le ka Dikwalo.”

Buka nngwe ya tshedimosetso ya New Catholic Encyclopedia e bua jaana ka Basupi ba ga Jehofa: “Ba tsaya Baebele e le yone fela motswedi wa dilo tse ba di dumelang e bile e laola tsela e ba itshwarang ka yone.” Bosheng jaana, monna mongwe kwa Canada o ne a tsena ganong mongwe wa Basupi ba ga Jehofa fa a ntse a ikitsise mo go ene. O ne a bua jaana a supa Baebele ya Mosupi yoo: “Ke itse gore lo bomang. Ke bona ka letshwao la lona.”