Monna wa Kwa Asia Botlhaba o Fitlhetswe Kwa Italy wa Bogologolo

GO TLILE jang gore monna wa kwa Asia Botlhaba a felele a le kwa Mmusomogolong wa bogologolo wa Roma dingwaga di le 2 000 tse di fetileng? Eno ke potso e baithutamarope ba neng ba e ipotsa fa ba sena go ribolola sengwe se se gakgamatsang kwa borwa jwa Italy ka 2009.

E ne e le kwa mabitleng a bogologolo a kwa Roma kwa Vagnari, dikilometara di le 60 kwa bophirima jwa Bari. Go ne ga epololwa marapo a batho ba le 75. Diteko tse di ileng tsa dirwa mo marapong ao di ne tsa bontsha gore bontsi jwa batho bao ba ne ba tsholetswe mo mafelong a a fa gaufi. Mme marapo a monna mongwe a ne a gakgamatsa babatlisisi. Fa go sekasekwa mitochondrial DNA ya gagwe go ne ga fitlhelwa gore mongwe wa losika lwa ga mmaagwe o ne a tlholega kwa Asia Botlhaba.a Marapo a monna yono a ne a bontsha gore o tshedile mo lekgolong la ntlha kgotsa la bobedi la dingwaga C.E. Go ya ka pego nngwe e e tlhalosang ka marapo ano, “go lebega e le lekgetlo la ntlha marapo a motho yo o tlholegang kwa Asia Botlhaba a bonwa mo Mmusomogolong wa Roma.” Jaanong monna yono e ne e le mang?

Yone pego eo ya re: “Kwa tshimologong go ka nna motlhofo go tsaya gore motho yono o ne a amana ka tsela nngwe le kgwebo ya sei e e neng e atlegile magareng ga China le Roma.” Le fa go ntse jalo, go akanngwa gore kgwebo eno e ne e dirwa ke batho ba le mmalwa ba ba neng ba neeletsana, mo e leng gore ga go na motho ope yo o neng a tsamaya sekgala sotlhe sa dikilometara di le 8 000 fa gare ga China le Italy.

Lefelo le go neng ga fitlhelwa marapo ano mo go lone le ka re ruta eng? Mo metlheng ya bogologolo, Vagnari e ne e le motse wa selegae o o neng o laolwa ke mmusimogolo o kwa go one badiri ba neng ba nyerolosa tshipi e bile ba dira dithaele tsa letsopa. Bontsi jwa badiri ba koo e ne e le batlhanka, mme go ka direga gore monna yono wa kwa Botlhaba le ene e ne e le motlhanka. E bile tota o ne a sa fitlhwa jaaka bahumi ba ne ba fitlhwa. Dithoto tsa gagwe tse di neng di setse, tse di neng di fitlhilwe le ene, e ne e le pitsa e le nngwe, mme setopo se sengwe se ne se fitlhilwe mo godimo ga sa gagwe.

Ke eng fa re kgatlhegela kgang eno? Mo lekgolong la ntlha la dingwaga C.E. go anama ga molaetsa wa Bokeresete go ne go ikaegile ka gore batho ba bogologolo ba ne ba tsamaya sekgala se se kana kang. Baebele e bega gore morago ga Pentekosete ya 33 C.E., baeng ba dinaga di sele ba ba neng ba etela Jerusalema ba ne ba anamisa dikgang tse di molemo. (Ditiro 2:1-12, 37-41) Mme gone, marapo ano a a bonweng a bontsha gore mo e ka nnang ka yone nako eo batho bangwe ba ne ba tsaya mesepele go tswa kwa Asia Botlhaba go ya kwa kgaolong ya Mediterranean.b

[Dintlha tse di kwa tlase]

[Mmapa mo go tsebe 29]

(Go bona mokwalo o o feletseng, leba kgatiso)

ROMA

Vagnari

Lewatle la Mediterranean

ASIA BOTLHABA

LEWATLE LA PACIFIC

[Setshwantsho mo go tsebe 29]

Marapo a setopo sa monna wa kwa Asia Botlhaba a a epolotsweng kwa mabitleng a bogologolo a kwa Roma

[Motswedi wa Setshwantsho]

© Su concessione del Ministero per i Beni e le Attività Culturali-Direzione Regionale per i Beni Culturali e Paesaggistici della Puglia-Soprintendenza per i Beni Archeologici della Puglia