Kafa Hempe ya Boboa jo bo Tlhabang e Amanang ka Teng le Bomoya

KGOSI LOUIS IX wa Fora o ne a e apara. Fa Sir Thomas More a ne a ithutela go nna mmueledi mo bosheng jwa gagwe, hempe eno e ne e mo thusa gore a nne a tsogile diura di le 19 kana di le 20 ka letsatsi ka lobaka lwa dikgwedi di le mmalwa. More o itsiwe a ne a e apara thata ka nako ya fa a ne a tshela. Mme fa Thomas Becket, Bishopomogolo wa Canterbury a ne a bolawa kwa Kerekeng e Kgolo ya Canterbury, go ne ga fitlhelwa a e apere kafa tlase ga diaparo tsa gagwe go sa lebelelwa. Ke eng se batho bano ba ba itsegeng ba neng ba tshwana ka sone? Ba ne ba utlwisa mebele ya bone botlhoko ka hempe eno ya boboa jo bo tlhabang.

Hempe ya boboa e ne e le seaparo se se tlhabang se se dirilweng ka boboa jwa podi, mme e ne e aparwa mo godimo ga letlalo gore e tle e le ngape, mme e ne e dira gore go nne botlhoko thata. Gape dinta di ne di boitshega mo go yone. Ga twe Thomas Becket o ne a apara hempe ya gagwe ya boboa le borokgwana jwa kafa teng jo le jone bo neng bo dirilwe ka boboa, go fitlha di “nyeuma ka dinta.” Morago ga lekgolo la bo16 la dingwaga, batho ba bangwe ba ne ba dirisa terata e tshesane e e tlhabang mmele wa motho mo boemong jwa go dirisa boboa jwa podi. Go dira hempe jalo go ne go utlwisa motho yo o e apereng botlhoko le go feta.

Go ya ka dikishinare nngwe, maikaelelo a hempe ya boboa, fela jaaka ditsela tse dingwe tse batho ba ikutlwisang botlhoko ka tsone mo mmeleng, e ne e le go “laola dikeletso tsa boleo tsa nama le gore motho a nne le boikutlo le botshelo jwa go rata dilo tsa semoya.” Hempe eno e ne e sa aparwe fela ke baitlami; mme gape e ne e aparwa ke batho ba maemo a a kwa tlase, go akaretsa le batho ba maemo a a kwa godimo. Le gompieno madumedi mangwe a dirisa mokgwa ono.

A go apara hempe ya boboa jo bo tlhabang kana go itima dilo dingwe go ka dira gore motho a rate dilo tsa semoya? Nnyaa, bomoya ga bo a ikaega ka mekgwa eo. Tota e bile, moaposetoloi Paulo o ne a le kgatlhanong le “tshwaro e e botlhoko ya mmele.” (Bakolosa 2:23)a Go na le moo, motho e nna wa semoya ka tsela ya mmatota fa a batla kitso ya Modimo ka go bala Lefoko la gagwe ka tlhoafalo le ka go dirisa kitso eo mo botshelong jwa gagwe.

[Ntlha e e kwa tlase]

[Metswedi ya Ditshwantsho mo go tsebe 32]

King Louis IX, top: From the book Great Men and Famous Women; Thomas Becket, center: From the book Ridpath’s History of the World (Vol. IV); Thomas More, bottom: From the book Heroes of the Reformation, 1904