Kgakololo e e Botlhale ya ga Solomone Malebana Le se O ka Se Balang

“GO DIRWA ga dibuka tse dintsi ga go na bokhutlo, mme go ineela thata mo go tsone go lapisa nama.” (Moreri 12:12) Fa Kgosi Solomone yo o botlhale wa Iseraele a ne a kwala mafoko ao dingwaga di ka nna 3 000 tse di fetileng, o ne a sa kgale go bala. Mme o ne a umaka gore go botlhokwa gore motho a tlhophe se a se balang. Kgakololo eo e mo nakong tota gompieno ka gore ngwaga le ngwaga go gatisiwa dikgatiso tse dintsintsi mo lefatsheng!

Go bonala sentle gore “dibuka tse dintsi” tse Solomone a neng a bua ka tsone e ne e se tse di kgothatsang le tse di lapolosang. Ka jalo, o ne a re go ineela mo go tsone go “lapisa nama,” go na le gore go solegele mmadi molemo goyagoile.

Le fa go ntse jalo, a Solomone o ne a bolela gore ga go na dibuka dipe tse di nayang kgakololo e e molemo, e e ka ikanngwang, e e ka solegelang mmadi molemo? Nnyaa, ka gonne gape o ne a kwala jaana: “Mafoko a ba ba botlhale a tshwana le ditlhabapholo, fela jaaka dimapo tse di kokotetsweng di ntse, ba ba ineelang mo go phutheng dipolelwana ba ntse jalo; di neilwe go tswa kwa modiseng a le mongwe.” (Moreri 12:11) Ee ruri, go na le mafoko a a kwadilweng a a ‘tshwanang le ditlhabapholo,’ a a ka tlhotlheletsang motho ka tsela e e molemo. A ka tlhotlheletsa motho gore a tseye tsela e e siameng. Gape, “jaaka dimapo tse di kokotetsweng,” a ka nonotsha maikemisetso a motho le go mo thusa go nitama.

Re ka bona kae mafoko a a ntseng jalo a a botlhale? Go ya ka Solomone, mafoko a a tlhomologileng go feta otlhe a a ntseng jalo, ke a a tswang mo go Jehofa, Modisa a le mongwe. (Pesalema 23:1) Ka jalo, buka e e molemolemo e motho a ka e balang ke buka e e tlhotlheleditsweng ke Modimo—Baebele. Go bala mafoko a a ntseng jalo a a tlhotlheleditsweng ka metlha go ka thusa motho gore a nne a “tlhomeleletse ka botlalo go dira tiro nngwe le nngwe e e molemo.”—2 Timotheo 3:16, 17.