“Ba Ile ba Nna Ditsala Tsa me, ba Mpontsha Lorato le go Amega ka Nna”

“BOTLHE ba tla itse gore lo barutwa ba me ka seno, fa lo ratana.” (Johane 13:35) Fela jaaka Jesu a ile a bolela, lorato e ne ya nna letshwao le le tlhaolang bokaulengwe jwa Bakeresete ba bogologolo. Tertullian o ne a kwala jaana dingwaga tse di fetang lekgolo morago ga loso lwa ga Keresete, a nopola batho ba ba neng ba etse dilo tlhoko: ‘Bona kafa ba ratanang ka teng le kafa mongwe le mongwe wa bone a ikemiseditseng go swela yo mongwe ka teng.’

A go sa ntse go na le lorato lo lo ntseng jalo mo lefatsheng? Ee. Ka sekai, akanya ka lekwalo le le amogetsweng kwa ofising ya lekala ya Basupi ba ga Jehofa kwa Brazil. Lekwalo leo le ne la kwalwa ke mosadi mongwe e bong Marília, mme o ne a re:

“Fa ke ne ke ntse ke nna kwa Villa Mercedes kwa Argentina, mmè, yo e leng Mosupi wa ga Jehofa, o ne a nna le bolwetse jo bo neng jwa dira gore a swe ditokololo go tswa mo lethekeng go ya kwa tlase. Basupi ba kwa Villa Mercedes ke bone ba ba neng ba mo tlhokomela mo dikgweding tsa ntlha tse robedi fa a ne a lwala. Ba ne ba dira sengwe le sengwe, ba phepafatsa ntlo ya gagwe le go mo apeela dijo. Tota le fa Mmè a ne a sa ntse a le kwa kokelong, ka metlha go ne go na le mongwe yo o neng a le fa thoko ga gagwe, bosigo le motshegare.

“Nna le Mmè re boetse Brazil, mo a sa ntseng a kokotlegela gone. Basupi ba lefelo le re nnang kwa go lone gone jaanong ba dira sengwe le sengwe go thusa Mmè go fola.”

Marília o konela lekwalo la gagwe jaana: “Se nka se tlhalosang fela ke gore nna ga ke Mosupi, le fa go ntse jalo, Basupi e ne ya nna ditsala tsa me, ba mpontsha lorato le go amega ka nna.”

Ee, go sa ntse go na le batho ba ba bontshang lorato lwa boammaaruri lwa Bokeresete. Ka go dira jalo, ba bontsha kafa dithuto tsa ga Jesu di ka amang matshelo a rona thata ka teng.