“A lo Itse Gore ke Eng Fa ke Lo Busetsa Madi a Lona?”

‘A BO ke tlhoka madi jang ne!’ go ne ga akanya jalo Nana, mmè yo o godisang basimane ba le bararo a le esi yo o nnang kwa Kaspi kwa Repaboliking ya Georgia. Moso mongwe keletso ya gagwe ya go nna le madi e ne ya diragadiwa. O ne a sela di-lari di le 300 gaufi le seteishene sa mapodise. Go ne go se na ope fa gaufi. E ne e le madi a mantsi tota. Tota e bile, Nana o ne a ise a ko a bone madi a pampiri a di-lari di le 100 mo dingwageng di le tlhano fa e sa le lari e nna one madi a a dirisiwang mo nageng eo. Bagwebi ba lefelo leo ba ne ba ka se amogele madi ao le fa ba ne ba ka dira ka dingwaga di le mmalwa.

Nana o ne a akanya jaana: ‘Ke isa kae madi ano fa e le gore a tla dira gore ke felelwe ke tumelo, poifomodimo le bomoya?’ O ne a dirile ka natla gore a nne le dinonofo tseo tsa Bokeresete, a ba a itshokela go bogisiwa le go itewa ka ntlha ya se a se dumelang.

Fa Nana a ya kwa seteisheneng sa mapodise, o ne a bona mapodise a le matlhano a batla sengwe ka tlhoafalo. O ne a lemoga gore ba ne ba batla madi ao, ka jalo o ne a ba atamela a bo a re: “A lo latlhegetswe ke sengwe?”

Ba ne ba re: “Ee, re latlhegetswe ke madi.”

“Bokae?”

“Di-lari di le 300!”

Nana o ne a re: “Madi a lona ke a ke a setse.” Go tswa foo o ne a ba botsa jaana: “A lo itse gore ke eng fa ke lo busetsa madi a lona?” Ba ne ba sa itse.

Nana o ne a tswelela jaana: “Ka gonne ke mongwe wa Basupi ba ga Jehofa. Fa ke ne ke se ene, nka bo ke sa lo busetsa madi a lona.”

Tlhogo ya mapodise e e neng e latlhegetswe ke madi ao e ne ya naya Nana di-lari di le 20 go lebogela boikanyegi jwa gagwe.

Kgang eno e ne ya anama ka bonako mo kgaolong yotlhe ya Kaspi. Letsatsi le le latelang, mosadi mongwe yo o phepafatsang yo o neng a tswa mo seteisheneng sa mapodise o ne a raya Nana a re: “[Tlhogo ya mapodise] o nna a beile dibuka tsa lona mo ofising ya gagwe. Gongwe o tla simolola go di anaanela thata go feta pele.” Lepodise le lengwe le ne la ba la re: “Fa batho botlhe e ka bo e le Basupi ba ga Jehofa, ke mang yo o neng a ka dira bokebekwa?”