A Baebele E ka Re Thusa Gompieno?
“FA KE bua ka Baebele yotlhe, ke mo e ka nnang peresente e le 1 fela e go leng molemo go ka e bala, mme karolo e e setseng yotlhe ga e mosola e bile e fetilwe ke nako.” Go ne ga rialo lekawana lengwe. Ba le bantsi ba tla dumalana le ene. Le fa Baebele e sa ntse e le buka e e rekwang thata mo lefatsheng lotlhe, dimilione ga di e tseye tsia e bile ga di a tlwaelana le dithuto tsa yone.
Mo kgatisong ya lone ya Keresemose ya 1996, lokwalodikgang lwa kwa Jeremane lwa Süddeutsche Zeitung lo ile lwa bolela gore babadi ba Baebele “ba nna ba ntse ba fokotsega. Mo motlheng ono wa saense ya tlholego le go ntsifala ga dilo tse e seng tsa bodumedi, dipego tsa Baebele di bonala mo bathong ba le bantsi di sa tlwaelega e bile go le thata go di tlhaloganya.” Dipatlisiso di tlhomamisa gore pego eno e boammaaruri. Dipatlisiso dingwe di bontsha gore bana ba le bantsi ga ba itse le e leng gore Jesu ke mang tota. Mo patlisisong nngwe, mo bathong ba ba ileng ba botsolodiwa, go ne go na le ba ba kwa tlase ga sephatlo ba bone ba ba neng ba kgona go tlhalosa dikgang tsa Baebele tsa morwa sesenyi le Mosamaria yo molemo.
Kgatiso nngwe ya Swiss Evangelical Church ya Reformiertes Forum e bolela gore kwa Switzerland Baebele ga e tlhole e batliwa thata jaaka pele. Tota le batho ba ba nang le Baebele, gantsi e dula fela mo shelofong e sa dirisiwe. Kwa Boritane le teng go a tshwana. Go ya ka patlisiso nngwe, le fa gone bontsi jwa batho ba na le khopi ya Baebele, ba le bantsi ba bone ga ba ke ba e bala le go e bala.
Ka fa letlhakoreng le lengwe, dimilione go ralala lefatshe ba ikutlwa ka tsela e e farologaneng ka Baebele. Ba e leba e le Lefoko la Modimo mme ba akanya gore e botlhokwa e bile e mosola. Ka jalo, ba e bala ka metlha. Mosadi mongwe yo o sa leng mosha o ne a kwala jaana: “Ke leka go bala kgaolo e le nngwe kana di le pedi tsa Baebele letsatsi lengwe le lengwe. Ke itumelela thata go e bala.” Batho ba ba ntseng jalo ba tsaya tsia thata se Baebele e se rutang, mme ba leka go dirisa kgakololo ya yone mo matshelong a bone. Ba dumela gore Baebele e ka ba thusa mo lefatsheng leno le le tletseng mathata.
Wena o ikutlwa jang? A Baebele ga e na mosola mo motlheng wa gompieno? Kana a e botlhokwa le go nna mosola? A Baebele e ka re thusa gompieno?