Go Fenya Bosula

“ANA ntša e e suleng e, e hutsetsang kgosi morena wa me? Ke a go rapela, mma ke kgabaganye ke ye go mo kgaola tlhogo.” E ne e le kopo ya ga Abishai yo e neng e le molaodi wa masole wa Moiseraele. O ne a tsiboga jalo ka bogale fa a utlwa morena wa gagwe, Kgosi Dafide a hutsiwa ka letlhoo ke Mobenjamine yo go tweng ke Shimei.—2 Samuele 16:5-9.

Abishai o ne a dirisa filosofi e e tlwaelegileng gompieno—kgopolo ya go tima molelo ka molelo. Ee, Abishai o ne a batla gore Shimei a boge ka ntlha ya go kgoba ga gagwe Dafide.

Gone mme, Dafide o ne a reng ka seno? Dafide o ne a kganela Abishai, a re: “Mo leseng.” Le fa Dafide a ne a sa tshwanelwa ke ditatofatso tseno tsa ga Shimei, ka boikokobetso o ne a emelana le thaelo ya go ipusolosetsa. Go na le moo, o ne a tlogela kgang mo diatleng tsa ga Jehofa.—2 Samuele 16:10-13.

Fa Dafide a boela mo setulong sa bogosi morago ga go tshaba botsuolodi jwa morwawe yo o sa atlegang, motho wa ntlha go mo dumedisa le go mo kopa maitshwarelo e ne e le Shimei. Abishai o ne a batla go mmolaya gape, mme le mo lekgetlong leno gape Dafide ga a ka a mo letla.—2 Samuele 19:15-23.

Mo lekgetlong leno, Dafide o ne a itshupa a tshwanela go tshwantshetsa Jesu Keresete, yo moaposetoloi Petere a neng a kwala jaana ka ene: “E rile a gobololwa, a se ka a simolola go gobolola le ene . . . mme o ne a nna a ineela mo go ene yo o atlholang ka tshiamo.”—1 Petere 2:23.

Gompieno, Bakeresete ba kgothalediwa gore ba nne ‘boikokobetso mo mogopolong ba sa lefe kutlwisobotlhoko ka kutlwisobotlhoko.’ (1 Petere 3:8, 9) Ka go latela sekao se se tlhomilweng ke Dafide le Jesu Keresete, le rona re ka ‘nna re fenya bosula ka molemo.’—Baroma 12:17-21.