Baebele e Ntšha ka Segerika sa Segompieno

AUGUST 23, 1997, e ne e le letsatsi le le kgethegileng mo go ba ba neng ba kokoane kwa Kopanong ya Kgaolo ya “Tumelo mo Lefokong la Modimo” kwa Greece. Kwa bofelong jwa thulaganyo ya thapama, go ne ga gololwa Baebele e ntšha—New World Translation of the Holy Scriptures ka Segerika sa segompieno. Bareetsi bao ba ba neng ba sa e lebelela ba ne ba tsibogela seo ka go lela selelo sa boitumelo le go ema ka dinao ka lobaka lo loleele ba opa diatla!

Fa e sa le go tloga ka 1905, Basupi ba ga Jehofa ba koo ba ntse ba dirisa Baebele ya thanolo ya lekgolo la bo19 la dingwaga e e neng ya gatisiwa ke moruti wa Greek Orthodox. Baebele eno e ile ya ba thusa thata ka dingwaga di le dintsi. Le fa go ntse jalo, e ne e setse e le lobaka lo loleele Basupi ba ga Jehofa ba eletsa go ka nna le thanolo ya Baebele e e tlhomameng le e e tlhaloganyegang motlhofo. Ka 1993 ba ne ba itumelela go amogela kgatiso ya Segerika ya Thanolo ya Lefatshe le Lesha ya Dikwalo Tsa Bokeresete Tsa Segerika. Le fa go ntse jalo, jaanong ba ne ba itumela le e leng go feta fa ba ne ba amogela Baebele e e feletseng ka Segerika sa segompieno.

Mosupi mongwe yo o neng a itumeletse New World Translation thata o ne a e bitsa gore ke “leboko, ke pheswana e e iketlileng e e tshotseng lentswe la ga Jehofa le e tla bong e le la ntlha re le tlhaloganya sentle ka segarona.” Bangwe ba ne ba simolola go bala Baebele ya bone e ntšha ka bonako fela fa ba fitlha kwa magaeng a bone. Motlakopanong mongwe yo o neng a itumetse thata o ne a bala Baebele ya gagwe go fitlha ka ura ya bongwe mo mosong, morago ga go wetsa go bala buka yotlhe ya Jobe!

New World Translation of the Holy Scriptures ya Segerika e tsere matsapa a magolo a dingwaga di le supa gore e wediwe. Lekwalo lengwe le le neng la amogelwa le ne le re: “Ga ke na pelaelo ya gore New World Translation e ile go re thusa thata mo go thuseng batho ba ba pelo e phepa go ithuta ka Jehofa.”