Go Tshepega—A go Itlela Fela Kana Re ka Go Tlhopha?
“LE MORORO ke se motho yo o tshepegang ka tlhago, go a tle go itiragalele ka dinako tse dingwe.” Go bolela jalo leferefere le go tweng Autolycus mo bukeng ya The Winter’s Tale e e kwadilweng ke William Shakespeare. Seno se supa bokoa jo bogolo jwa batho—go rata go dira bosula ga rona, e leng selo se se tswang mo ‘pelong e e boferefere.’ (Jeremia 17:9; Pesalema 51:5; Baroma 5:12) A mme seno se raya gore ga re ka ke ra kgona go itlhophela mo kgannyeng eno? A go nna moyamontle ke selo se se itiragalelang fela? Legoka!
Pele ga bana ba Iseraele ba tsena mo Nageng e e Solofeditsweng, Moshe o ne a bua le bone fa ba ne ba sa ntse ba thibeletse mo dipoeng tsa Moabe. O ne a baya fa pele ga bone dilo tse pedi tse ba ka di tlhophang. Ba ne ba ka ikobela ditaolo tsa Modimo mme ba amogele masego a gagwe kana ba di gane mme ba robe maungo a a botlhoko a boleo. (Duteronome 30:15-20) Go ne go ikaegile ka gore bone ba tlhopha eng.
E re ka re le batho ba ba ka kgonang go itlhophela se re se batlang, re ka kgona go tlhopha. Ga go na ope—tota le Modimo—yo o ka re pateletsang go dira se se siameng kana se se bosula. Le fa go ntse jalo, bangwe ba ka nna ba botsa jaana ka tshwanelo, ‘Fa dipelo tsa rona di rata go dira bosula, re ka dira jang se se siameng?’ Gone mme, ngaka ya meno e tlhatlhoba meno ka kelotlhoko gore e tle e bone leino le le kgobogang kana le le bolang pele ga le nna maswe thata. Ka mo go tshwanang, re tlhoka go tlhatlhoba dipelo tsa rona tsa tshwantshetso re batla go bona bokoa le go bola ga boitsholo. Ka ntlha yang? Ka gonne “mo pelong go tswa dikakanyo tsa boikepo, dipolao tsa ka boomo, maakafalo, dikgokafalo, bogodu, ditshupo tsa maaka, ditlhapatso,” Jesu o ne a bolela jalo.—Mathaio 15:18-20.
Go boloka leino, ngaka ya meno e tshwanetse go ntsha gotlhelele sepe fela se se bolang. Ka mo go tshwanang, go tlhokega gore go tsewe kgato ka bonako go ntsha “dikakanyo tsa boikepo” le dikeletso tse di bosula mo pelong. Ka go bala le go tlhatlhanya ka Lefoko la Modimo e leng Baebele, re ka se ka ra itse fela ditsela tsa Mmopi wa rona mme gape re tla ithuta go dira se se siameng.—Isaia 48:17.
Kgosi ya Iseraele e bong Dafite e ne ya amogela thuso e e oketsegileng e a neng a e tlhoka go lwa ntwa ya go dira se se siameng. O ne a rapela jaana: “Modimo, bopa pelo e e itshekileng mo go nna; o bo o šafatse mowa o o siameng mo teng ga me.” (Pesalema 51:10) Ee, ka go ikaega ka Jehofa Modimo ka thapelo, le rona re ka fenya tsela ya rona ya go rata go dira se se bosula mme re tlhagolele ‘moya o o shafetseng’ wa go dira se se siameng. Ka tsela eno, re ka se ka ra dira gore botshepegi bo itiragalela fela. E tla nna kgang ya gore re tlhophe.
[Setshwantsho mo go tsebe 21]
Fela jaaka Dafite, go rapela Jehofa go ka re thusa go dira se se siameng