Tsela e e Raraaneng ya go Atamela Modimo

“KE NNA tsela, le boamarure, le botshelō: ga go tle opè mo go Rara ha e se ka nna,” go ne ga rialo Jesu Keresete. O ne a oketsa jaana: “Amarure, amarure, kea lo raea, Ha lo lōpa Rara señwe, o tla se lo naea ka leina ya me.”—Yohane 14:6; 16:23.

Lefa go ntse jalo, ka makgolo a le mantsi a dingwaga, madumedi a Labodumedi, segolobogolo Kereke ya Roma Katoliki, ka dithuto tsa yone tsa motheo tsa molelo wa dihele, pakatori, le Tharonngwe, ba tlhakatlhakantse “tsela” eo. Jesu o ne a dirilwe gore a lebege, eseng jaaka mmueledi wa pelo e e ratang wa batho bao ba leofileng, mme jaaka lesea le le tshotsweng ka diatla kana jaaka moatlhodi yo o boitshegang, yo o kgatlhegang thata mo go atlholeng le go otlhaeng baleofi go na le gore a ba boloke. Ka jalo he, moleofi o ne a ka kgona jang go atamela Modimo?

Buka ya The Glories of Mary (1750) e a tlhalosa. Fa a ne a tshwantshanya Jesu le letsatsi le le fisang thata la tshiamo, mopapa Innocent III wa lekgolo la bo 13 la dingwaga o ne a bolela jaana: “Mongwe le mongwe yo o mo lefifing la boleo, a a latlhele matlho a gagwe mo ngweding, a a kope mo go Maria.” Maria, mmaagwe Jesu, o ne a tlhangwa jaaka mmueledi yo mongwe gape. Gongwe ka ntlha ya seo go neng go bolelwa gore ke tlhotlheletso ya bommè, motho o ne a ka ratwa ke Jesu le ke Modimo. Ka gone, mo mafokong a ga Laurence Justinian, ebong moruti wa lekgolo la bo 15 la dingwaga, Maria o ne a nna “llere eo e isang paradaiseng, mojako o o yang kwa legodimong, motsereganyi wa mosadi yo eleng wa mmatota tota mo gare ga Modimo le batho.”

Mo godimo ga tlotlo yotlhe eo a neng a e newa, fa nako e ntse e ya o ne a sa tlhole a lejwa fela jaaka “Lekgarebane Maria” mme o ne a nna “Kgosigadi e e Boitshepo, Mmaagwe Boutlwelobotlhoko,” a tsewa jaaka yo o itshekileng fela thata le yo o kwa godimodimo jaana mo eleng gore le ene o ne a le boitshepo thata gore a ka atamelwa ka tlhamalalo. A go ne go santse go ka bonwa mmueledi yo mongwe gape? Go tweng ka mmaagwe?

Ereka Bibela e sa bue sepe ka kgang eno, go ne ga batliwa karabo golo gongwe go sele. Buka nngwe eo go ka se kang ga ikanngwa boammaaruri jwa seo e se buang ya “Protevangelium of James” e bolela ka kgang ya ga Anne (kana Anna), eleng mosadi wa ga Joakime, yo o neng a fetsa dingwaga di le dintsi e le mosadi yo o nyetsweng yo o senang bana. Kwa bokhutlong, moengele o ne a bonala kwa go ene mme a mo itsise gore o ne a tla bona ngwana. Go bolelwa gore ka nako eo e beilweng o ne a nna mmaagwe “Lekgarebane Maria.”

Ka gone go ne ga simologa kobamelo ya ga “Moitshepi” Anne. Mafelo a go obamela baitshepi le dikereke di ne tsa agiwa e le go tlotla ene. Go tlotla “Moitshepi” Anne e ne ya nna selo se se anameng thata mo Yuropa mo lekgolong la bo 14 la dingwaga.

“Abo bodumedi bo raraane jang ne!” go ne ga bolela jalo buka ya The Story of the Reformation. “Batho ba ne ba rapela Anna yo o neng a buelela batho ba ba leofileng mo go Maria yo o neng a ba buelela mo go Morwawe yo o neng a ba buelela mo Modimong. E ne e le selo se se sa tlwaelegang, mme seno e ne e le mofuta wa go dumela mo tumelabotlhoding oo mewa ya batho e neng e tlamelwa ka yone.” Gape, eno ke kgang e nngwe eo mafoko a ga Jesu a neng a dira ka tlhamalalo mo go yone: “Me lo diha lehoko ya Modimo lolea hèla ka mekgwa ea lona e lo e bolèlañ.”—Mareko 7:13.

[Motswedi wa Setshwantsho mo go tsebe 21]

The Metropolitan Museum of Art, Bequest of Benjamin Altman, 1913. (14.40.633)