“Se ke Mmele oa Mme”
“TSAEAÑ, lo yè; se ke mmele oa me.” (Mathaio 26:26)
Jesu Keresete o ne a naya barutwa ba gagwe senkgwe se se sa bedisiwang a bua mafoko ano fa a ne a tlhoma Sejo sa Morena sa Maitseboa. Mme o ne a kaya eng ka mafoko ano, “Se ke mmele oa me”?
KARABO ya potso eno e botlhokwa thata go Baroma Katoliki, ereka mafoko ano a ga Jesu a dira motheo wa thuto ya bone ya go tswa ga botshelo jwa setshedi se sengwe bo ya mo go se sengwe. Go ya ka tumelo eno, fa Bakatoliki ba keteka Misa mme ba kometsa papetlana ya senkgwe, e fetoga mmele wa ga Keresete wa mmatota kana nama ya gagwe. Ka gone ba ne ba tla ganetsa New World Translation of the Holy Scriptures thata, ka go bo yone e baya mafoko ao a ga Jesu jaana: “Tsayang lo je. Se se kaya mmele wa me.” Tsela eo seno se kwadilweng ka yone e akantsha gore senkgwe se ne se tshwantshetsa nama ya ga Jesu, eseng gore ke nama ka boyone. Ke thanolo efe e e re nayang kgopolo e e tlhomameng?
Lefoko la Segerika fano le le ranotsweng jaaka “ke” kana “kaya” fano ke e·stinʹ. Totatota le kaya “ke,” mme gape le ka nna la kaya “emela, kana supa.” Ke tsela efe e e botoka thata fa go iwa ka se go buiwang ka sone fano?
Sengwe se re se tlhokomelang gape ke ntlhanyana e e kwa tlase mo go Mathaio 26:26 mo go La Sagrada Escritura, Texto y comentario por Profesores de la Compañía de Jesús, Nuevo Testamento I (The Holy Scripture, Text and Commentary by Professors of the Company of Jesus, New Testament) ya puo ya Sepanishe. E bolela jaana: ‘Go ya ka thutapuo, seno se ka ranolwa jaaka go supa kana go tshwantshetsa fela jaaka ke—e kaya selo ka mmatota. Re ka umaka Genesise 41:26; Esekiele 5:5; Daniele 7:17; Luke 8:11; Mathaio 13:38; 16:18; Bagalatia 4:24; Tshenolō 1:20 jaaka dikao tseo di kayang go tshwantshetsa. Seno se akantsha gore bokao jwa ke ([ka tlhaloganyo ya] se se tshwanang le), jaaka go ka bonwa go tswa mo dikwalong tsa tumelo, fa go tlogelwa gore lefoko leno le ka tswa e le le le dirisitsweng mo boemong jwa le lengwe go supa fa dilo tse pedi tseo di tshwana, kana e le tshwantshetso, mme gape Kereke ya Pele e ne e tlhaloganya polelwana eno.’
Jaaka thanolo eo ya Roma Katoliki e supa fela ka tlhamalalo, go ya ka thutapuo mafoko ano a ga Jesu a ka tlhaloganngwa ka nngwe ya ditsela tseno. Ebile tota, lefoko la Segerika e·stinʹ le ranolwa jaaka “bokao jwa” felo gongwe gape mo go New Jerusalem Bible ya Katoliki. (Mathaio 12:7) Moranodi o tshwanetse go tlhopha lefoko lefe mo go Mathaio 26:26? Ereka Jesu a ne a santse a tshela ka mmele o o itekanetseng fa a ne a bua mafoko a temana eo, senkgwe seo a neng a se naya barutwa ba gagwe ga e kake ya bo e ne e le nama ya gagwe tota. Mo godimo ga moo, mmele otlhe wa gagwe o o itekanetseng wa motho o ne wa ntshiwa setlhabelo sa thekololo. (Bakolosa 1:21-23) Ka gone, temana eno tota e ka kwalwa sentle jaana: “Seno se kaya mmele wa me.” Senkgwe se se sa bedisiwang se ne se tshwantshetsa mmele wa ga Jesu o o neng o setse o tla ntshiwa setlhabelo mo boemong jwa batho.
Le eleng lefa Bibela ya gago ka namana e na le polelwana e e reng “Se ke mmele oa me,” o se ka wa tlhakana tlhogo. Jesu o ne a tlhola a bua ka tsela e e tshwanang. Fa a ne a re, “Ke nna kgōrō” le, “Ke nna mofine oa amarure,” ga go ope yo a neng a tlhaloganya seno e le se se rayang gore e ne e le kgoro ya mmatota kana mofine tota. (Yohane 10:7; 15:1) Mme fa a ne a naya barutwa ba gagwe senwelo sa mofine o ne a bolela jaana go ya ka The New Jerusalem Bible: “Senwelo seno ke kgolagano e ntšha,” mme ga go ope yo a neng a akanya gore senwelo seo tota e ne e le kgolagano e ntšha. (Luke 22:20) Ka mo go tshwanang, fa a ne a re senkgwe ‘e ne e le’ mmele wa gagwe, re tshwanetse go tlhaloganya gore senkgwe se ne se ‘kaya’ kana se tshwantshetsa, mmele wa gagwe.