“Bua Lehoko ya Modimo ka Pelokgale”

JEHOFA Modimo o kgona go naya batlhanka ba gagwe maatla a go “bua lehoko ya Modimo ka pelokgale.” (Ditihō 4:31) Le eleng bao ba santseng ba le basha mo ditseleng tsa boammaaruri ba bile ba sena boitemogelo mo tirong ya boefangele ga ba a tshwanela go etsaetsega go bua mafoko a a molemo ka bopelokgale. Kwa Côte d’Ivoire, baboledi ba babedi ba ne ba le mo tirong ya bodihedi jwa ntlo le ntlo fa ba ne ba kopana le moporofesa wa unibesithi. Mmulatsela yo mmotlana, Seriki, ka go ikutlwa a sa tshwanele go bua le monna yo o rutegileng jalo, o ne a letla Mosupi yo mongwe go bua.

Moporofesa o ne a tshwenyegile ka go tlhaolana ga merafe mme o ne a pega Modimo molato ka ntlha ya mathata a a leng gone a bomorafe, a ikutlwa gore ke ene a dirileng merafe e e farologaneng. Morago ga puisano e telele eo go neng go lebega e sa ba ise gope, kgabagare Seriki o ne a nna pelokgale go bua, mme a tsenelela mo kgannyeng ka bonolo. (1 Bathesalonia 2:2) Fa a bona gore ntlo ya moporofesa e ne e kgabisitswe ka mebala e mentle e e tlhophilweng sentle, Seriki o ne a botsa moporofesa yono a re, “Ke ka ntlhayang fa o ne o sa dire gore ntlo ya gago yotlhe e nne mmala o le mongwe fela?”

“O ne o tla akanya gore ke a tsenwa!” moporofesa a araba jalo. Seriki ene o ne a araba jaana: “Nnyaa, mme ke ka ntlhayang fa re tshwanetse go lebelela gore Modimo o dire sengwe le sengwe le mongwe le mongwe mmala o le mongwe?” Ntlha eo e ne e phepafetse. Sekai se se motlhofo seo se ne sa itshupa se le molemo, mme Seriki yo a neng a le ditlhong pele o ne a naya bosupi jo bo molemo.