Botshelo le Bodihedi tsa ga Jesu

Fa Lasaro A Tsosiwa

JESU, gammogo le bao ba tsamayang nae, jaanong ba fitlha kwa phupung ya ga Lasaro. Totatota, ke logaga leo go beilweng letlapa mo matsenong a lone. “Tlosañ letlapa,” ga rialo Jesu.

Maratha o a gana, ga a ise a tlhaloganye seo Jesu a ikaeletseng go se dira. “Morèna,” a rialo: “gompiyeno o setse a nkga: gonne o tlhotse malatsi a le manè a shule.”

Mme Jesu o botsa jaana: “A ga kea gu raea, ka re, ha u nu u dumèla, u tla bōna kgalalèlō ea Modimo?”

Ka jalo letlapa le a tlosiwa. Morago ga moo Jesu o a lelala a bo a rapela jaana: “Rara, kea gu leboga ka u nkutlwile: Me ke ne ke itse ha a nkutlwa galè: me ka bo ke buisiwa ke bontsi yoa batho yo bo emeñ ha ba ntikanyeditse, ka re, ba tle ba dumele ha u nthomile.” Jesu o rapela phatlalatsa gore batho ba tle ba itse gore seo a tlileng go se dira se tla diragadiwa ka thata e e tswang kwa Modimong. Ka jalo o goa jaana ka lentswe le legolo: “Lasaro, cwa.”

Fa a bua jalo, Lasaro o a tswa. Matsogo a gagwe le maoto a gagwe di santse di bofilwe ka matsela a phitlho, le sefatlhego sa gagwe se santse se bofilwe ka matsela. “Mo hapololeñ, to mo lese a tsamaeè,” ga rialo Jesu.

Bontsi jwa Bajuda bao ba neng ba tlile go gomotsa Maria le Maratha fa ba bona kgakgamatso eno, ba dumela mo go Jesu. Lefa go le jalo, ba bangwe ba tswa ba ya go bolelela Bafarasai ka seo se diragetseng. Mme bone le baperesiti ba bagolo ka bonako fela ba rulaganyetsa kopano ya kgotlatshekelo a kgolo ya Bajuda, ebong Sanehederine.

Sanehederine a akareletsa Bafarasai le Basadukai, baperesiti ba bagolwane, moperesiti yo mogolo wa ga jaanong, ebong Kaiafase, le bao a neng a le baperesiti ba bagolo pele. Mme bone ba le mo khutsafalong ba bolela jaana: “Re dihañ? gonne monna eo o diha dichupō di le dintsi. Ha re mo lesa hèla yana, batho botlhe ba tla dumèla mo go èna; me Baroma ba tla tla ba tlosa bonnō yoa rona, le morahe oa rona.”

Lemororo baeteledipele bano ba bodumedi ba dumela gore Jesu “o diha dichupō di le dintsi,” selo se le sengwe fela seo ba amegileng ka sone ke boemo jwa bone le bolaodi jwa bone. Go tsoga ga ga Lasaro go ama segolo-bogolo Basadukai mo go botlhoko, ereka ba sa dumele mo tsogong.

Kaiafase, yo gongwe a leng Mosadukai, jaanong a re: “Ga to itse sepè, Le gōna ga to tlhokomele ha go ka nna molemō mo go lona gore motho a le moñwe hela a shwèle seshaba, e señ morahe otlhe go nyèlèla.”

Modimo o ne o tlhotlheletsa Kaiafase gore a bolele seno, ka gonne moaposetoloi Johane o ne a kwala jaana moragonyana: “Me yana go mo [Kaiafase] a bo a sa go bue hela ka esi.” Seo Kaiafase a neng tota a se bolela a ne a le gore Jesu o tshwanetse a bolawa go Mo thibela gore a seke a tswelela a isa maemo a bone a bolaodi le tlhotlheletso ya bone kwa tlase. Lefa go le jalo, go ya ka Johane, ‘Kaiafase o ne a bolelela pele gore Jesu o ne a tla swela morafe, mme eseng morafe oo o le osi, mme le gone a le gore a tle a phuthele gongwe bana ba Modimo ba ba faletseng.’ Eleruri, ebile ke boikaelelo jwa Modimo gore Morwawe a swe jaaka thekololo ya botlhe.

Jaanong Kaiafase o a atlega mo go tlhotlheletseng Sanehederine gore a dire dithulaganyo tsa go bolaya Jesu. Mme Jesu, go bonala a ne a utlwile ka dithulaganyo tseno go tswa mo go Nikodimo, ebong leloko la Sanehederine leo le neng le le molemo mo go ene, o tswa mo lefelong leo. Yohane 11:38-54.

◆ Ke ka ntlhayang fa Jesu a rapela phatlalatsa pele ga a tsosa Lasaro?

◆ Bao ba boneng tsogo eno ba arabela jang malebana le yone?

◆ Ke eng seo se senolang boikepo jwa maloko a Sanehederine?

◆ Kaiafase o ne a ikemiseditse eng, mme Modimo o ne wa mo dirisa gore a bolelele eng pele?