Go Utlwela Molepero Botlhoko

FA JESU le barutwa ba gagwe ba le bane ba etela metse ya Galalea, dikgang kaga dilo tse di gakgamatsang tseo a di dirang di anama go ralala kgaolo eo. Dikgang tsa ditiro tsa gagwe di fitlha kwa motseng mongwe koo go nang le monna yo o bolawang ke lepero gone. Ngaka Luke o mo tlhalosa jaaka yo o “tletseñ lepero.” Fa bolwetse jono jo bo maswe bo setse bo etegetse, bo ja dikarolo tse di farologaneng tsa mmele ka iketlo. Jalo molepero yono o mo boemong jo bo tlhomolang pelo.

Fa Jesu a fitlha mo motseng oo, molepero yono o a mo atamela. Go ya ka molao wa Modimo, molepero o tshwanetse go ntsha tlhagiso ka go goa a re, “Itshekologō, itshekologō!” go sireletsa ba bangwe gore ba seka ba tla gaufi thata le ene mme jwa ba tshelegela. Jaanong molepero yono o wela fa fatshe ka sefatlhego mme o kopa Jesu a re: “Morèna, ha u rata, u na le thata go nntlahatsa.”

Abo monna yono a na le tumelo mo go Jesu jang ne! Lefa go ntse jalo, abo bolwetsi jwa gagwe bo mo dira gore a lebege a tlhomola pelo jang ne! Jesu o tla dirang? O ne o tla dirang? Jesu a tlhotlhelediwa ke kutlwelobotlhoko o otlolola letsogo la gagwe mme o ama monna yono, a re: “Kea rata: u ntlahalè.” Mme ka bonako fela lepero le a mo tlogela.

A o ne o ka rata gore mongwe yo o kutlwelobotlhoko jaaka yono a nne kgosi ya gago? Tsela eo Jesu a tshwarang molepero yono ka yone e neela tsholofelo ya gore ka nako ya puso ya Bogosi jwa gagwe polelelopele eno ya Bibela e tla diragadiwa: “O tla tlhomogèla bahumanegi le batlhoki pelo.” Ee, Jesu ka nako eo o tla diragatsa keletso ya pelo ya gagwe ya go thusa botlhe bao ba bogang.

Le eleng pele ga a fodisa molepero, bodihedi jwa ga Jesu bo ne bo setse bo ntse bo tsosa kgatlhego e kgolo mo bathong. Jesu jaanong o diragatsa boperofeti jwa ga Isaia ka go laela monna yono yo o fodisitsweng gore: “A seka a bolèlèla opè.” Morago ga moo o mo laela ka go re: “Tsamaea u ichupetsè moperisiti, u ntshetsè bontlahaco yoa gago kaha Moshe o laotseñ ka gōna, gore e nnè chupō mo go bōnè.”

Mme monna yono o itumetse thata mo eleng gore ga a kgone go sa rothise mmutla madi kaga motlholo ono. O a tsamaya mme o simolola go anamisa dikgang gongwe le gongwe, kwantle ga pelaelo a baka kgatlhego le go batla go itse mo bathong mo eleng gore Jesu ga a kgone go tsena ka tlhamalalo mo motseng oo. Ka gone Jesu o nna kwa mafelong a a kwa thoko koo go sa nneng ope gone, mme batho go tswa gongwe le gongwe ba tla koo go mo reetsa le gore ba fodisiwe malwetsi a bone. Luke 5:12-16; Mareko 1:40-45; Mathaio 8:2-4; Lefitiko 13:45; 14:10-13; Pesalema 72:13; Isaia 42:1, 2.

◆ Ke phelelo efe eo lepero le ka nnang le yone, mme ke tlhagiso efe eo molepero a neng a tshwanetse go e neela?

◆ Molepero mongwe o ne a ikuela jang mo go Jesu, mme re ka ithuta eng go tswa mo karabelong ya ga Jesu?

◆ Monna yo o neng a fodisitswe o ne a palelwa ke go utlwa Jesu jang, mme diphelelo e ile ya nna dife?