Dikgotlhang mo Lelapeng—Di Bakwa ke Eng?

SARAHa yo o nnang kwa Ghana e bile a na le dingwaga di le 17 a nyalane le Jacob a re: “Gantsi madi ke one a dirang gore re lwe. Ke galefisiwa ke gore ke dira ka natla go tlhokomela lelapa mme Jacob ga a ke a bua le nna ka ditshenyegelo tsa rona. Re fetsa dibeke re sa buisane.”

Monna wa gagwe e bong Jacob a re: “Ee, go na le dinako tse ka tsone re lwang ka mafoko. Gantsi dikgotlhang di bakwa ke go bo re sa tlhaloganyane sentle e bile re sa tlotle. Gape di bakwa ke tsela e re itshwarang ka yone fa re lebane le maemo a a rileng.”

Nathan wa kwa India yo o sa tswang go nyala, o tlhalosa se se diragetseng letsatsi lengwe fa mogogwadiagwe a ne a omanya matsalaagwe. A re: “O ne a kgopisega a bo a tswa a tsamaya. Fa ke botsa rre gore goreng a ne a omana botlhoko jaana, o ne a tsaya gore nna mogogwadie ke a mo nyatsa. Mme o ne a re omanya rotlhe.”

Gongwe le wena o lemogile gore go bua sengwe se se sa siamang ka nako e e sa siamang go ka baka dikgotlhang mo lelapeng. Motlotlo o o monate o ka felela ka dikgotlhang. Ga go ope yo o ka buang se se siameng ka dinako tsotlhe, ka jalo, re ka nna ra se ka ra tlhaloganya se batho ba bangwe ba se buang kgotsa lebaka la go bo ba se buile. Le fa go ntse jalo, lo ka kgona go dira gore go nne le kagiso le kutlwano.

O ka dirang fa dikgotlhang di simologa? O ka dira eng gore go nne le kagiso mo lelapeng? Malapa a ka dira jang gore a nne le kagiso? Tsweetswee bala ditlhogo tse di latelang.