‘Lokwalopaka lo lo Gatisiwang ka Thuso ya Modimo’

MONNA mongwe yo o ithutang Baebele le Basupi ba ga Jehofa kwa Nigeria o ne a ya kwa Seminareng e e neng e rulagantswe ke Inter-African Committee on Women and Children (Komiti ya Dinaga Tsa Afrika e e Kaga Basadi le Bana). O ne a tsamaya a tshotse dimakasine tse pedi tsa bosheng tsa Tsogang!

Mo letsatsing la ntlha la Seminara, monna yono o ne a lemoga gore sebui se ne se dirisa dintlha dingwe tse di tswang mo go nngwe ya dimakasine tse a neng a tlile ka tsone, e e neng e tlotla ka dintlha tsa setlhogo se se reng, “Life is Worth Living.” (October 22, 2001) Ka bonako fela o ne a ntsha makasine wa gagwe mme a nna a ntse a tsamaisana le sebui.

Kwa bokhutlong jwa letsatsi leo, mmueledi mongwe yo o neng a tshwanetse go neela puo letsatsi le le latelang o ne a bona setlhogo se se kafa ntle sa makasine o mongwe wa Tsogang!, o moithuti yono wa Baebele a neng a o tshotse, o o neng o na le metseletsele ya ditlhogo tse di reng “Go Thusa Basadi ba ba Itewang.” Mmueledi yono o ne a adima makasine oo. Maitseboa ao, o ne a gagola pampiri e a neng a kwadile dintlha tsa gagwe mo go yone mme a baakanyetsa puo e nngwe e e theilweng mo ditlhogong tsa Tsogang! eno. Ka letsatsi le le latelang, fa mmueledi yono a ne a ntse a neela puo ya gagwe, mosadi mongwe yo o neng a dutse mo go one mola o moithuti yole wa Baebele a neng a dutse mo go one, o ne a ntsha makasine wa gagwe wa Tsogang!, mme a simolola go tsamaisana le sebui fa se ntse se bua.

Moithuti wa Baebele ka boene o ne a kgona go akgela ka dintlha tse di molemo mo dipuisanong tse di neng di tshwerwe kwa seminareng ka gonne o ne a badile ditlhogo tse di mo makasineng wa Tsogang! O ne a re: ‘Ga ke na pelaelo epe gore lokwalopaka lono lo gatisiwa ka thuso ya Modimo.’

A o ka rata gore o tlisediwa lokwalopaka lono kwa legaeng la gago ka metlha? Ke eng fa o sa rulaganye le Mosupi wa ga Jehofa gore a go tlisetse lone?