Tsebe 2

“Ba gobea ka digongwanagongwana, ba robala mo dipeiping tsa go aga, mo matlotleng a a tletseng dipeba kana mo dikhutlong tsa mebila e le mekgobe e e tlhomolang pelo. Malao a bone ke makwalo-dikgang a a onetseng, diaparo tsa bone ke marantha fela a matsela. Ba tshela ka go utswa, ka go dira boaka le ka bokebekwanyana jo bo sa reng sepe. Ba a utswelana ka bobone mmogo le go utswetsa ba ba fetang ka tsela.” Ke bomang bano? Ke bana ba ba se nang magae bao ba nnang mo karolong e kgolo ya motse-mogolo wa Latin America, go bolela jalo makasine wa Time. Mme e ka nna ya nna mosha yo o se nang legae wa mo e ka nnang toropo epe fela e kgolo mo lefatsheng. Go na le ba le dimilione-milione ba bone, mme palo ya bone e gola ka lobelo lo lo boitshegang.