Ɔkɔndɔ wa Sɔlɔmɔna ɔnɛ mɛnyaka kɛnɛ kakoka komɛ ɔtɛmɔdi wa Jehowa tshɛ. Nde mbeyaka nsala pɛkato ka woke ko ndjota l’ɔkɔngɔ ɔnɛ akambo tshɛ wakasalemi mbala kakɔ ɔtɔi. Kana mbeyaka mbuta ate: “Akasalemi tsho.” Koko naka nde nkanyiya lo dikambo dia awui tshɛ wakasalemi, kete nde mbeyaka ndjoshola dia nde akasadi awui amɔtshi wakayookonya dia nsala pɛkato. Awui asɔ koka monga: Lɔngɛnyi la kɔlɔ, tɔkɛnyɔ ta kɔlɔ kana membola ahole amɔtshi wahateye dimɛna l’okoko l’okoko kana l’Ɛtɛrnɛtɛ. Ondo nde ambotshikaka nɔmba, mbadia Bible, mbɔtɔ nsanganya kana nsambisha. Oko ɔlɔngɔ a pami wɔtɛkɛtami lo Tokedi, mbeyaka monga ko nde hasadi pɛkato mbala kakɔ ɔtɔi. Wetshelo akɔna wakokaso nkondja? Sho pombaka mbewɔ aha tsho pɛkato koko ndo awui watokonya dia kisala. Sɔlɔmɔna akate dui sɔ etena kakandakɔndɔla ɔkɔndɔ.—Mat. 5:29, 30. w24.07 16 od. 10-11

Naa ɛngɔ ka nɛmɔ kɛsɔ? Ɔsɔ ekɔ olimu washimbɛ nsɛnɔ w’esambishelo ka losango la Diolelo. (2 Kɔr. 4:1) Ko waa na wele mpoke y’awomba? Mpoke shɔ yekɔ didjidji di’ekambi wa Nzambi, wanɛ wasambisha anto akina lokumu l’ɔlɔlɔ. Lo nshi ya Pɔɔlɔ, amundji w’okanda wakakambaka la mbaka y’awomba dia mɛmbaka diangɔ dia nɛmɔ diele oko, mbo ya ndɛ, wanu ndo falanga. Woho akɔ waamɛ mbele, Jehowa akatosha losango l’ohomba lendana la lokumu l’ɔlɔlɔ. L’ekimanyielo ka Jehowa, sho koka monga la wolo wa mbewoya losango lɔsɔ la kɔlamelo tshɛ. Tena dimɔtshi, sho koka monga la wɔma w’onto kana wɔma wa vɔ tototshanya l’esambishelo. Ngande wakokaso ntondoya okakatanu ɔsɔ? Tɔsɛdingole dɔmbɛlɔ di’apɔstɔlɔ etena kakawawadjangɛ diaha nsambisha. Lo dihole dia vɔ mboka wɔma, vɔ wakalɔmbɛ Jehowa dia mbakimanyiya dia ntetemala nsambisha la dihonga tshɛ. Jehowa akakadimola lo dɔmbɛlɔ diawɔ mbala kakɔ ɔtɔi. (Ets. 4:18, 29, 31) Naka lo tena dimɔtshi wɔma w’onto koshaka wɔma dia nsambisha, kete lɔmba Jehowa dia kokimanyiya dia nkeketsha ngandji kokayɛ anto diaha wɛ mboka wɔma wa nsambisha lokumu l’ɔlɔlɔ. w24.04 16 od. 8-9

Ngandji kokaso Jehowa totshutshuyaka dia nkidia lokombo lande. Sho nangaka mbutɛ anto akina di’akambo wa kɔlɔ efula wakate Satana lo dikambo dia Jehowa wekɔ kashi. (Eta. 3:1-5; Jɔbɔ 2:4; Jni. 8:44) L’olimu aso w’esambishelo, sho nomɔlomɔka dia mamɛ Nzambi kaso, lo mbutɛ anto tshɛ watohokamɛ awui wa mɛtɛ wendana la nde. Sho kombolaka di’onto tshɛ mbeya dia dionga diande dioleki woke ele ngandji ndo yoho yande ya nɔmbɔla yekɔ ɔlɔlɔ ndo losembwe, ndo Diolelo diande diayanga nkomiya keem’edja asui tshɛ, diayanga mbela wɔladi ndo ɔngɛnɔngɛnɔ le anto. (Os. 37:10, 11, 29; 1 Jni. 4:8) Etena kaamɛso lokumu la Jehowa l’esambishelo, sho kidiaka lokombo lande. Sho mongaka nto l’ɔngɛnɔngɛnɔ wa mbeya dia tekɔ lo nsɛna lo yoho yɔtɔnɛ la lokombo laso. w24.05 18 od. 12