SAPAK 14

Esasy pikirleri belläp geçiň

Ýewreýler 8:1

MAKSADY: Diňleýjiler aýdylýan zatlaryň baglanyşygyna düşünmeli. Esasy pikirler nutugyň maksady hem-de temasy bilen baglanyşykly bolmaly.

Maksadyňyz bolsun. Ilki bilen nutugyň maksadyny anyklaň. Onda ýöne bir maglumat berilýärmi ýa-da ol bir zada ynandyrýarmy, höweslendirýärmi? Nutugyň maksadyna gowy düşünip, soňra şoňa görä taýýarlanyň. Esasy pikirleriň goýan maksadyňyza ýetmäge kömek etmelidigini ýatdan çykarmaň.

Käbir soraglar hakda oýlanyň: «Diňleýjilerde tema degişli ilki nähili sorag ýa-da nädogry pikir döräp biler? Ondan soň ýene nähili soraglaryň döremegi mümkin?» Nutukdaky pikirleri hem şol yzygiderlilikde düzüň. Şonda diňleýjilere pikirleriň yzygiderliligini tutmak, oňa düşünmek we maglumaty kabul etmek aňsat bolar.
Nutugyň temasyny nygtaň. Nutugyň dowamynda temany nygtaýan esasy sözleri ýa-da şol sözüň manydaş sözlerini gaýtalaň.
Esasy pikirler ýönekeý we düşnükli bolsun. Saýlan esasy pikirleriňiz tema degişli bolsun we berlen wagtdan çykmaň. Esasy pikirler köp bolmaly däl. Olaryň her birini gowy düşündiriň we arasynda biraz säginiň. Bir pikirden indiki pikire akgynly geçiň.

Esasy pikirleri nutugyň başynda ýa soňunda, ýa bolmasa başynda-da, soňunda-da aýdyp geçseňiz bolýar. Eger esasy pikirleri nutugyň başynda aýtsaňyz, diňleýjiler pikirleriň baglanyşygyna aňsat düşüner. Eger soňunda gaýtalasaňyz, diňleýjilere esasy pikirleri ýatda saklamak aňsat bolar.