ኣብ ኣገልግሎት ክእለትካ ኣመሓይሽ—ብሕታዊ ተገዳስነት ኣርኢ

ኣገዳሲ ዝዀነ ስለምንታይ እዩ፧ የሱስ ንሰባት ፍቕራዊ ተገዳስነት ብምርኣይ ብዛዕባ ነፍሲ ወከፎም ከም ዝግደስ ኣርኣየ። ንኣብነት፡ ኣብ ሓደ ኣጋጣሚ፡ ብዅነታቱ ተሸቝሪሩ ንዝነበረ ጽሙም ሰብኣይ ምስ ኣስተብሃለሉ፡ ካብቶም እኩባት ሰባት ፈልዩ ንበይኑ ገይሩ ኣሕወዮ። (ማር. 7:31-35) ንደቀ መዛሙርቱ፡ ዓቕሞም ኣብ ግምት ብምእታውን ካብ ዓቕሞም ንላዕሊ ሓበሬታታት ብዘይ ምሃብን ሓልዮት ኣርኣዮም። (ዮሃ. 16:12) ብዘይካዚ፡ ናብ ሰማይ ምስ ዓረገ፡ ብሕታዊ ተገዳስነት ከም ዜርኢ ኣረጋጊጹ እዩ። (2 ጢሞ. 4:17) ንሕና እውን ከም ሰዓብቱ መጠን ንዕኡ ኽንመስል ኢና እንደሊ። (1 ጴጥ. 2:21፣ 1 ዮሃ. 3:16, 18) ንኣብነት፡ ንሓደ በዓል ቤት ብዛዕባ ዘለዎ ፍሉይ ዅነታት ኰነ፡ ብዛዕባ ዜገድሶን ዜተሓሳስቦን ነገራት ብምስትውዓል ሓልዮትና እንተ ኣርኢናዮ፡ ኣብ ኣገልግሎትና ብዝያዳ ኣሳልጦ ኽንረክብ ንኽእል ኢና። ናብ ቤቱ መምጽኢና፡ መልእኽቲ ንምብጻሕ ወይ ጽሑፋት ንምዝርጋሕ ጥራይ ዘይኰነስ፡ ብብሕቱ ንግደሰሉ ምዃንና እንተ ኣስተውዒሉ ንኺሰምዓና ብዝያዳ ኺድረኽ እዩ።

እንታይ ክትገብር ኣሎካ፧

ጽቡቕ ጌርካ ተዳሎ። ህድእ በል፡ ፍሽሕውን ምቕሉልን ከኣ ኩን።
ኣስተብህል። እቲ ሰብ ውሉዳት ከም ዘለዎ፡ ኣታኽልትን እንስሳታትን ከም ዚፈቱ፡ ብሃይማኖት ከም ዚግደስ ዜርኢ ምልክታት ኣስተብሂልካዶ፧ እንተ ኣስተብሂልካ፡ ንመእተዊኻ ምስ ኵነታቱ ብዚሰማማዕ ከተታዓራርዮ ትኽእል ኢኻ።
ርእይቶኡ ንኺህበካ ሕተቶ፡ ከይኰለፍካ ድማ ጽን ኢልካ ስምዓዮ። ትሰምዖ ኸም ዘለኻ ንኸተርኢ ጠምቶ። እንተ ተኻኢሉ ኸኣ ካብ ልቢ ንኣዶ። ካብ ክትዕ ርሓቕ።
ተዓጻጻፊ ኹን። ኣድላዪ እንተ ዀይኑ፡ ብዛዕባ እቲ ዜገድሶ ጕዳይ ንምዝርራብ ኣብ ኣቀራርባኻ ምትዕርራይ ግበር። እዚ ኸቢድ ኣይኰነን፣ ከመይሲ፡ ትራክትታትናን ብሮሹራትናን መጽሔታትናን ብዛዕባ እተፈላለየ ጕዳያት ይገልጽ እዩ። ነቲ በዓል ቤት ኣብ ዘይምሹእ ኵነታት እንተ በጺሕካዮ፡ ንኣብነት፡ ብስራሕ ትሑዝ እንተ ዀይኑ፡ ንምይይጥካ ኣሕጽሮ።

ኣብዛ ወርሒ እዚኣ፡ ነዚ ፈትኖ፦

ኣብ ኣምልኾ ስድራ ቤት ወይ ከኣ ኣብ ኣገልግሎት ምስ መገላግልትኻ ዄንካ፡ ንኣቀራርባኻ ምስቲ በዓል ቤት ዚብሎ ኸም ዚሰማማዕ ጌርካ ኸተቕርቦ ተለማመደሉ።
ሓድሓደ ግዜ፡ ኣብ ኣኼባታት ወፍሪ እቲ ዚመርሕ ሓው፡ ከመይ ጌርና ብሕታዊ ተገዳስነት ከነርኢ ኸም እንኽእል ኬመያይጥ ወይ መርኣያ ኬቕርብ ይኽእል እዩ።