ሓሳብ ክርስቶስ ይሃሉኻ
1. የሱስ እንታይ ሓሳብ እዩ ዘንጸባረቐ፧
1 ንወዲ ኣምላኽ ርኢናዮ ዘይንፈልጥ እኳ እንተ ዀንና: ካብቲ ብዛዕባ ህይወትን ኣገልግሎትን የሱስ እተመዝገበ ጽሑፍ ግን ብሓቂ ኸነፍቅሮ ኽኢልና ኢና። (1 ጴጥ. 1:8) ንፍቓድ ኣቦኡ ተኣዚዙ: ነቲ ኽብ ዝበለ ሰማያዊ ቦታኡ ሓዲጉ ናብ ምድሪ መጸ። ሰብ ኣብ ዝነበረሉ እዋን: ብተወፋይነት ንሰባት ኣገልገለ: ህይወቱ ኸኣ ምእንቲ ብዙሓት ኣሕለፈ። (ማቴ. 20:28) ቃል ኣምላኽ “እቲ ኣብ ክርስቶስ የሱስ ዝነበረ ሓሳብ ኣባኻትኩምውን ይሀሉኹም” ኢሉ እዩ ዚምሕጸነና። ነቲ የሱስ ዘንጸባረቖ ጥቕሚ ርእስኻ ናይ ምስዋእ መንፈስ ብኸመይ ክንቀድሖ ንኽእል፧—ፊል. 2:5-8
2. ብዙሓት ክርስትያናት እንታይ ጸገም እዩ ዜጋጥሞም: ነዚ ንኺሰግርዎ ዚሕግዞምከ እንታይ እዩ፧
2 ክትደክም ከለኻ:- የሱስ ፍጹም እኳ እንተ ነበረ: ዝደኸመሉ እዋን ግን ነይሩ እዩ። ኣብ ሓደ ኣጋጣሚ “ብምኻድ መገዲ ደኺሙ” ምስ ተቐመጠ: ንሓንቲ ሳምራዊት ሰበይቲ መስከረላ። (ዮሃ. 4:6) ሎሚ ዘለዉ ሓያሎ ክርስትያናት ተመሳሳሊ ጸገም የጋጥሞም እዩ። ሰሙን ምሉእ ድሕሪ ምድካሞም: ኣብ ዕዮ ስብከት ንምስታፍ ዜድሊ ሓይሊ ምርካብ የጸግሞም ይኸውን። ይኹን እምበር: ኣዘውቲርና ንሰብኽ እንተደኣ ዄንና: ክርስትያናዊ ኣገልግሎት ብመንፈስ ዕረፍቲ ዜምጽኣልና ዀይኑ ኢና እንረኽቦ።—ዮሃ. 4:32-34
3. ነቲ የሱስ ንኺምህር ዝነበሮ ድሌት ብኸመይ ክንቀድሖ ንኽእል፧
3 ኣብ ካልእ ኣጋጣሚ የሱስን ደቀ መዛሙርቱን ሓንሳእ ንኼዕርፉ ናብ ጽምዊ ቦታ ኸዱ። እንተዀነ ግን: ብዙሕ ህዝቢ ኣበይ ከም ዘለዉ ፈሊጦም ንኺረኽብዎም ጐዪዮም ኣርከብዎም። የሱስ በዚ ኣብ ክንዲ ዚሓርቕ “ደንገጸሎም: ብዙሕውን ኪምህሮም ጀመረ።” (ማር. 6:30-34) ንሕናውን መጽናዕቲ መጽሓፍ ቅዱስ ንኸነጀምርን ንኽንመርሕን ከምዚ ዝኣመሰለ ሓሳብ ክርስቶስ ክህልወና ኣለዎ። ወትሩ ኽንጽዕርን ንሰባት ናይ ሓቂ ፍቕሪ ኺሓድረናን የድሊ። ኣብዚ እዋን እዚ መጽናዕቲ መጽሓፍ ቅዱስ ትመርሕ እንተደኣ ዘየሎኻ: መጽናዕቲ መጽሓፍ ቅዱስ እትመርሓሉ ሰብ ንኽትረክብ ከይተሓለልካ ጽዓር።
4. ሓጋዚ ፓይነር ምዃን ሓሳብ ክርስቶስ ንኺህልወና ዚሕግዘና ብኸመይ እዩ፧
4 ንመንፈሳዊ ነገራት ቀዳምነት ሃቦ:- ሓጋዚ ፓይነር ኴንካ ምግልጋል: ብዝያዳ ኣብ መንፈሳዊ ነገራት ንኸነተኵር ኪሕግዘና ይኽእል እዩ። ሓንቲ ሓብቲ ብዛዕባ እዚ ኸምዚ ኢላ ጸሓፈት:- “ኣደ መሓዛይ: ኣነን መሓዛይን ምስኣ ሓደ ወርሒ ሓገዝቲ ፓይነራት ኴንና ንኸነገልግል ኣተባብዐትና። ሓቢርና ምስኣ ብምግልጋልና ብሓቂ እዩ ኣሐጒሱኒ። ነሕዋትን ኣሓትን ብዝያዳ ንኽፈልጦም ኣኽኢሉኒ: ነዊሕ ከይጸንሐ ኸኣ ከም ስድራቤት እዮም ኰይኖምኒ። ብዛዕባ የሆዋ ንሰባት ንኽዛረብን እቲ ዜደንቕ ሓቅታት መንግስቲ ኣምላኽ ንኽነግሮምን ዝያዳ ኣጋጣሚ ብምርካበይ እውን ተሓጒሰ እየ። እዚ ዅሉ ናብ የሆዋን ማሕበሩን ብዝያዳ ዝቐረብኩ ዀይኑ ንኺስምዓኒ ኣኽኡሉኒ።”—መዝ. 34:8
5. ሓሳብ የሱስ ንኺህልወና ወትሩ ኽንጽዕር ዘሎና ስለምንታይ ኢና፧
5 ኵላትና ኣብ መንጎ እቲ ዘይፍጹም ስጋናን ኣብ መንጎ እቲ ንየሆዋ ንኸነሐጕስ ዘሎና ባህግን ቃልሲ የጋጥመና እዩ። (ሮሜ 7:21-23) ነቲ እዛ ዓለም እዚኣ እተንጸባርቖ ንተወፋይነትና ዜዳኽም መንፈስ ክንጻረሮ ኣሎና። (ማቴ. 16:22, 23) ኣብዚ መዳይ እዚ ንኽንዕወት የሆዋ ብመንፈስ ቅዱሱ ኣቢሉ ኺሕግዘና ይኽእል እዩ። (ገላ. 5:16, 17) ናብታ ጽድቂ ዚሰፍና ሓዳስ ዓለም ንኽንኣቱ ኣብ እንጽበየሉ ዘለና እዋን: ንመንግስቲ ኣምላኽን ንጥቕሚ ኻልኦትን ካብ ጥቕሚ ርእስና ኣብሊጽና ብምርኣይ ሓሳብ የሱስ ይሃልወና።—ማቴ. 6:33፣ ሮሜ 15:1-3