ምእንቲ ኺሕግዙ፡ ደው ኢሎም

ኣብ ኣልበርታ፡ ካናዳ ዚነብር ቦብ፡ ቍርን ብርቱዕ ንፋስን ኣብ ዝነበራ መዓልቲ ብኣስታት 100 ኪሎ ሜተር ኣብ ሰዓት ማኪና እናዘወረ ኸሎ፡ ናይ ድሕሪት ጸጋመይቲ ጎማኡ ተተኰሰት። ኣብ ፈለማ፡ እንታይ ከም ዝዀነ ኣይተረድኦን፣ ስለዚ፡ ናብ ገዛኡ ዝተረፎ ሓሙሽተ ኪሎ ሜተር ኪዝውር ሓሰበ።

ቦብ ናብ ሓንቲ ኣብቲ ዓዲ እትርከብ ኣዳራሽ መንግስቲ ኣምላኽ ናይ የሆዋ መሰኻኽር ኣብ ዝጸሓፋ ደብዳበ ግና፡ ከምዚ ዚስዕብ ብምባል ቀጺሉ እንታይ ከም ዝዀነ ገሊጹ ኣሎ፦ “ኣብ ሓንቲ ማኪና ዚኸዱ ዝነበሩ ሓሙሽተ መንእሰያት ናብ ጐድነይ መጺኦም ነቲ መስኰቶም ኣውሪዶምዎ። ጎማይ ከም እተተኰሰት ድማ ነጊሮምኒ። ናብ ጸግዒ መገዲ ኸኣ ወጺእና፣ ሽዑ ድማ ጎማይ ኪቕይሩለይ ከም ዚኽእሉ ነጊሮምኒ። ቅያር ጎማ ወይ ክሪክ እንተ ኣልዩኒ እኳ ኣይፈልጥን እየ ነይረ። ኣብ ጸግዒ እቲ መገዲ ኣብ ብሽክለታ ስንኩላን ኮፍ ኢለ ኸለኹ፡ ኣብ ትሕቲ እታ ማኪናይ ኣትዮም ነቲ ቕያር ጎማን ነቲ ክሪክን ረኺቦምዎ፡ ነታ ጎማ እውን ቀዪሮምለይ። ቍሪ እዩ ነይሩ፡ ውርጪ እውን ይወርድ ነይሩ። ጽቡቕ ተኸዳዲኖም እዮም ነይሮም፣ ነቲ ስራሕ ሰሪሖም ግና ኣፋንዮምኒ። ባዕለይ ክገብሮ ኣይምኸኣልኩን።

“ነቶም ዝሓገዙኒ ሓሙሽተ ናይ የሆዋ መሰኻኽር መንእሰያት ከመስግኖም እፈቱ። መልእኽቶም ኪሰብኩ እዮም ኣብ በቤት ዚዞሩ ነይሮም። እዞም መንእሰያት እዚኦም ነቲ ዚሰብክዎ ቓል ብቓሉ ተግቢሮምዎ እዮም። ካብ ነዊሕ ሃልኪ እዮም ሰቲሮምኒ፣ ብሓቂ ድማ እየ ዘመስግኖም። በታ መዓልቲ እቲኣ፡ ከምዚኦም ዝበሉ መንእሰያት መላእኽቲ ኣብ መገዲ ኸም ዝነበሩ መን እሞ እዩ ፈሊጡ፧”