ኣመሓዳሪ ኣካል ናይ የሆዋ መሰኻኽር እንታይ እዩ፧

ኣመሓዳሪ ኣካል ብብሱላት ክርስትያናት ዝቘመ ንእሽቶ ጕጀለ ዀይኑ፡ ኣብ መላእ ዓለም ንዚርከቡ ናይ የሆዋ መሰኻኽር መምርሒ ይህብ። ዕዮኡ ድማ ኣብ ክልተ ይኽፈል፦

• ንምድላው እቲ ብጽሑፋትን ብኣኼባታትን ብኣብያተ ትምህርቲ ናይ የሆዋ መሰኻኽርን ኣቢሉ ዚውሃብ ኣብ መጽሓፍ ቅዱስ እተመስረተ መምርሒታት ብሓላፍነት ይከታተል።—ሉቃስ 12:42።

• ንህዝባዊ ኣገልግሎትና ብምምራሕን ንኣጠቓቕማ እተወፈየ ገንዘብ ብምቍጽጻርን ንዓለምለኻዊ ዕዮ ናይ የሆዋ መሰኻኽር ብሓላፍነት ይከታተል።

ኣመሓዳሪ ኣካል ኣብነት እቶም ምእንቲ መላእ ክርስትያናዊት ጉባኤ ኣገዳሲ ውሳነታት ዚገብሩ ዝነበሩ ኣብ ቀዳማይ ዘመን፡ “ኣብ የሩሳሌም ዝነበሩ ሃዋርያትን ሽማግለታትን” እዩ ዚስዕብ። (ግብሪ ሃዋርያት 15:2) ልክዕ ከምዞም እሙናት ሰብኡት እዚኦም፡ ኣባላት ኣመሓዳሪ ኣካል እውን መራሕቲ ውድብና ኣይኰኑን። የሆዋ ኣምላኽ ንየሱስ ክርስቶስ ርእሲ እታ ጉባኤ ገይሩ ኸም ዝሸሞ ኣፍልጦ ብምሃብ፡ መምርሒ ንምርካብ ንመጽሓፍ ቅዱስ እዮም ዚውከሱ።—1 ቈረንቶስ 11:3፣ ኤፌሶን 5:23።

ኣባላት ኣመሓዳሪ ኣካል መን እዮም፧

ኣባላት ኣመሓዳሪ ኣካል እዞም ዚስዕቡ እዮም፦ ማርክ ሳንደርሰን፡ ሳሙኤል ሀርድ፡ ስቲቨን ለት፡ ዴቪድ ስፕለይን፡ ጀካብ ራምፍ፡ ጀፍሪ ዊንደር፡ ጀፍሪ ጃክሰን፡ ጆዲ ጃድለ፡ ከነት ኩክ፡ ገራት ሎሽ፡ ከምኡ ድማ ገይጅ ፍሊግል። ኣብቲ ኣብ ዎርዊክ፡ ኒው ዮርክ፡ ሕ.መ.ኣ. ዚርከብ ቀንዲ ቤት ጽሕፈትና ዀይኖም ድማ እዮም ዚዓይዩ።

ኣመሓዳሪ ኣካል ብኸመይ እዩ ዚውደብ፧

ኣመሓዳሪ ኣካል ንእተፈላለየ መዳያት ዕዮና ንምክትታል ሽዱሽተ ኮሚተ ኣቚሙ እዩ፣ ነፍሲ ወከፍ ኣባል ኣመሓዳሪ ኣካል ድማ ኣብ ሓደ ወይ ካብ ሓደ ንላዕሊ ኮሚተታት የገልግል።

• ኮሚተ ኣተሓባበርቲ፦ ሕጋዊ ጕዳያት ይከታተል፣ ሓደጋታት ኬጋጥም ከሎን ኣባላትና ብሰንኪ ሃይማኖታዊ እምነቶም መስጐጕቲ ኺወርዶም ከሎን ንናይ የሆዋ መሰኻኽር ዚጸሉ ኻልእ ህጹጽ ጕዳያት ኪህሉ ኸሎን ቅልጡፍ ምላሽ ይህብ።

• ኮሚተ ፐርሶነል፦ ንኣባላት ስድራ ቤት-ኤል እተገብረ መሰናድዎ ይከታተል።

• ኮሚተ ሕትመት፦ ንዕዮ ሕትመትን ምልኣኽ ኣብ መጽሓፍ ቅዱስ እተመስረተ ጽሑፋትን ንህንጸት መአከቢ ቦታታትን ኣብያተ ጽሕፈት ትርጉምን መሳለጥያታት ጨንፈርን ይከታተል።

• ኮሚተ ኣገልግሎት፦ ንዕዮ ስብከት “ብስራት መንግስቲ” ይከታተል።—ማቴዎስ 24:14።

• ኮሚተ ትምህርቲ፦ ንምድላው እቲ ብኣኼባታትን ብኣብያተ ትምህርትን ብመደባት ድምጽን ቪድዮን ኣቢሉ ዚውሃብ መንፈሳዊ መምርሒ ይከታተል።

• ኮሚተ ጽሕፈት፦ ንምድላው እቲ ብእተሓትመ ጽሑፋትን ብወብሳይትናን ኣቢሉ ዚውሃብ መንፈሳዊ መምርሒ የቕርብ፡ ንዕዮ ትርጉም ድማ ይከታተል።

ኣመሓዳሪ ኣካል ኣብ ርእሲ እቲ በዚ ኮሚተታት እዚ ኣቢሉ ዚዓዮ ዕዮ፡ ነቲ ውድብ ብዛዕባ ዜድልዮ ነገራት ንምምይያጥ ኣብ ሰሰሙን ይእከብ እዩ። ኣብዚ ኣኼባታት እዚ፡ ኣባላት ኣመሓዳሪ ኣካል ቅዱሳት ጽሑፋት እንታይ ከም ዚብል ይመያየጡ፣ ኵላቶም ኣብ ዚሰማምዑሉ ሓደ ውሳነ ምእንቲ ኺበጽሑ ድማ መንፈስ ኣምላኽ ኪመርሖም ይፈቕዱ።—ግብሪ ሃዋርያት 15:25።

ሓገዝቲ ኣመሓዳሪ ኣካል መን እዮም፧

እዚኣቶም ንኮሚተታት ኣመሓዳሪ ኣካል ዚሕግዙ እሙናት ክርስትያናት እዮም። (1 ቈረንቶስ 4:2) እቲ እተመደቡሉ ኮሚተ ኣብ ዚከታተሎ ዕዮ፡ ክእለትን ተመክሮን ኣለዎም፣ ኣብቲ ኣብ ሰሰሙን ዚግበር ኣኼባኡ ድማ ይእከቡ እዮም። እዞም ሓገዝቲ እዚኦም፡ ውሳነታት ኣብ ምግባር ዘይካፈሉ እኳ እንተዀኑ፡ ኣገዳሲ ምኽርን ድሕረ ባይታዊ ሓበሬታን ይህቡ፣ ውሳነታት እቲ ኮሚተ የተግብሩ፣ ንውጽኢት እዚ ውሳነታት ድማ ብቐጻሊ ይከታተሉ። ኣብ እተፈላለየ ዅርናዓት ዓለም ንዚርከቡ ኣሕዋት ኪበጽሑ ወይ ኣብ ከም ዓመታዊ ኣኼባታት ወይ ስነ ስርዓት ምረቓ ጊልዓድ ዝኣመሰለ ኣጋጣሚታት ክፍሊ ኬቕርቡ ብኣመሓዳሪ ኣካል ኪምዘዙ ይኽእሉ እዮም።